Պատճառներ - Ատորֆիկ վագինիտ

Դաշտանադադարի միզասեռական համախտանիշը (ԴՄՀ) պատճառվում է էստրոգեն հորմոնի արտադրության կրճատմամբ:

Ավելի քիչ էստրոգենը ձեր հեշտոցային հյուսվածքները դարձնում է ավելի բարակ, ավելի չոր, պակաս առաձգական և ավելի փխրուն:

Էստրոգենի մակարդակների անկում կարող է առաջանալ՝

• դաշտանադադարից հետո (հետդաշտանադադար կամ պոստմենոպաուզա)
• դաշտանադադարին մոտենալու տարիների ընթացում (հարդաշտանադադար կամ պերիմենոպաուզա)
• երկու ձվարանների վիրահատական հեռացումից հետո (վիրաբուժական դաշտանադադար)
• կրծքով կերակրման ժամանակաշրջանում
• այնպիսի դեղամիջոցներ օգտագործելիս, որոնք կարող են ազդել էստրոգենի մակարդակների վրա (օրինակ՝ որոշ հակաբեղմնավորիչ հաբեր)
• քաղցկեղի կապակցությամբ կոնքի շրջանում անցկացված ճառագայթային թերապիայից հետո
• քաղցկեղի դեմ քիմիոթերապիա ստանալուց հետո
• որպես կողմնակի ազդեցություն՝ կրծքագեղձի քաղցկեղի հորմոնային թերապիայից հետո:

ԴՄՀ-ի գանգատներն ու ախտանիշները կարող են սկսել ձեզ անհանգստացնել դաշտանադադարին նախորդող տարիների ընթացքում կամ կարող են խնդիր չդառնալ, քանի դեռ դաշտանադադարից չի անցել մի քանի տարի: Չնայած սա տարածված վիճակ է, դաշտանադադարի տարիքի ոչ բոլոր կանայք է, որ ունեն ԴՄՀ: Կանոնավոր սեռական ակտիվությունը՝ զուգընկերոջ հետ կամ առանց դրա, կարող է օգնել ձեզ պահպանելու հեշտոցային հյուսվածքները:

Ռիսկի գործոններ

Որոշակի գործոններ կարող են նպաստել ԴՄՀ-ի առաջացմանը:

• Ծխելը. ծխախոտ ծխելը բացասաբար է ազդում ձեր արյան շրջանառության վրա և կարող է նվազեցնել արյան և թթվածնի հոսքը դեպի ձեր հեշտոց և այլ մոտակա հյուսվածքներ: Ծխելը նաև նվազեցնում է ձեր օրգանիզմում բնական էստրոգենների ազդեցությունը:
• Հեշտոցային ծննդաբերությունների բացակայություն. հետազոտողները նկարագրել են, որ այն կանայք, ովքեր երբեք հեշտոցային ճանապարհով չեն ծննդաբերել, ավելի հավանական է, որ ունենան ԴՄՀ ախտանիշներ, քան հեշտոցային (բնական) ճանապարհով ծննդաբերած կանայք:
• Սեռական ակտիվության բացակայություն․ սեռական ակտիվությունը՝ զուգընկերոջ հետ կամ առանց դրա, մեծացնում է արյան հոսքը և հեշտոցային հյուսվածքները դարձնում է ավելի առաձգական: