Բուժում - Ատորֆիկ վագինիտ

Դաշտանադադարի միզասեռական համախտանիշը (ԴՄՀ) բուժելու համար ձեր բժիշկը նախ կարող է առաջարկել սովորական բուժման տարբերակներ:

• Հեշտոցային խոնավացնող միջոցներ. փորձեք որևէ հեշտոցային խոնավացնող միջոց (K-Y Լիքվիբեդս, Ռեպլենս, Սլիքվիդ և այլն)՝ ձեր հեշտոցային խողովակի խոնավությունը որոշակիորեն վերականգնելու համար: Հնարավոր է, որ դուք ստիպված լինեք քսել խոնավացնող միջոցը մի քանի օրը մեկ: Այն սովորաբար ազդում է մի փոքր ավելի երկար, քան քսանյութը:
• Ջրային հիմքով քսանյութեր (լուբրիկանտներ). այս քսանյութերը (Աստրոգլայդ, K-Y Ջելլի, Սլիքվիդ և այլն) կիրառվում են սեռական ակտիվությունից անմիջապես առաջ և կարող են նվազեցնել սեռական հարաբերությանն ուղեկցող անհարմարավետությունը: Ընտրեք այնպիսի արտադրանքներ, որոնք չեն պարունակում գլիցերին կամ չունեն ջերմացնող հատկություն, քանի որ այն կանայք, ովքեր զգայուն են այս նյութերի նկատմամբ, կարող են նշել հեշտոցի գրգռվածություն։ Խուսափեք նաև նավթային ժելեից կամ նավթի վրա հիմնված այլ քսանյութերից, եթե դուք նույնպես պահպանակ եք օգտագործում, քանի որ նավթը կարող է շփման ժամանակ քայքայել լատեքսային պահպանակները:

Եթե այս տարբերակները չեն թեթևացնում ձեր ախտանիշները, ձեր բժիշկը կարող է խորհուրդ տալ որոշ բուժումներ:

Տեղային (տոպիկ) էստրոգեն

Հեշտոցային էստրոգենն ունի առավելություն. այն արդյունավետ է ավելի ցածր դեղաչափերով և գրեթե չի դրսևորում ընդհանուր (համակարգային) ազդեցություն (հետևաբար, ունի ավելի քիչ ընդհանուր կողմնակի ազդեցություններ), քանի որ ավելի քիչ է հասնում ձեր արյան հոսքին: Այն նաև կարող է ապահովել ախտանիշների ավելի լավ ուղղակի թեթևացում, քան բերանային ընդունման (օրալ) Էստրոգենը:

Հեշտոցային էստրոգենային թերապիան կարող է իրականացվել մի քանի տարբերակով: Դրանք բոլորը գրեթե հավասարապես լավ են ազդում, ուստի դուք և ձեր բժիշկը կարող եք որոշել ձեզ համար լավագույն ընտրությունը:

• Հեշտոցային էստրոգենային նրբաքսուք (կրեմ) (Էստրաս, Պրեմարին)․ դուք ապլիկատորի միջոցով այս նրբաքսուքը տեղադրում եք անմիջապես ձեր հեշտոցի մեջ, սովորաբար՝ քնելուց առաջ: Սովորաբար կանայք այն օգտագործում են ամեն օր 1-3 շաբաթ, իսկ հետո՝ շաբաթական 1-3 անգամ, սակայն ձեր բժիշկը ձեզ կտեղեկացնի, թե ինչ քանակի և որքան հաճախ նրբաքսուք օգտագործել:
• Հեշտոցային էստրոգենային մոմիկներ (Իմվեքսի)․ այս ցածր դեղաչափով էստրոգենային մոմիկներն ամեն օր տեղադրվում են հեշտոցային խողովակի մեջ: Բուժումը տևում է շաբաթներ, որից հետո մոմիկները պետք է տեղադրել միայն շաբաթը երկու անգամ:
• Հեշտոցային էստրոգենային օղակ (Էստրինգ, Ֆեմրինգ)․ դուք կամ ձեր բժիշկը փափուկ, ճկուն օղակ եք տեղադրում ձեր հեշտոցի վերին մասում: Օղակը տեղում արձակում է էստրոգենի կայուն դեղաչափ, և այն պետք է փոխարինվի մոտ երեք ամիսը մեկ: Բազմաթիվ կանայք նախընտրում են այս տարբերակը օգտագործման հարմարավետության շնորհիվ: Մեկ այլ, ավելի բարձր դեղաչափերով օղակը համարվում է համակարգային, այլ ոչ թե տեղային բուժում:
• Հեշտոցային էստրոգենային հաբեր (Վագիֆեմ)․ դուք միանգամյա օգտագործման ապլիկատորի օգնությամբ հեշտոցային էստրոգենային հաբերը տեղադրում եք ձեր հեշտոցի մեջ: Բժիշկը ձեզ կտեղեկացնի, թե որքան հաճախ պետք է տեղադրվեն հեշտոցային հաբը: Դուք կարող եք, օրինակ, օգտագործել այն ամեն օր՝ առաջին 2 շաբաթվա ընթացքում, որից հետո՝ շաբաթական 2 անգամ:

Օսպեմիֆեն (Օսֆենա)

Ամեն օր ընդունվող այս հաբը կարող է օգնել ցավոտ սեռական հարաբերության ախտանիշների մեղմացմանն այն կանանց մոտ, ովքեր ունեն միջին և ծանր ընթացքով դաշտանադադարի միզասեռական համախտանիշ (ԴՄՀ): Օսպեմիֆեինը ստուգված չէ այն կանանց համար, ովքեր ունեցել են կրծքագեղձի քաղցկեղ կամ ովքեր ունեն կրծքագեղձի քաղցկեղի զարգացման բարձր ռիսկ:

Պրոստերոն (Ինտրառոզա)

Այս հեշտոցային ներդիրները DHEA հորմոնը փոխանցում են անմիջապես հեշտոց՝ օգնելու սեռական հարաբերությանն ուղեկցող ցավերի մեղմացմանը: DHEA-ն հորմոն է, որն օգնում է օրգանիզմին, որ այն արտադրի այլ հորմոններ, այդ թվում՝ էստրոգեն: Պրաստերոնը նշանակվում է գիշերներն օգտագործելու համար՝ չափավոր և ծանր հեշտոցային ատրոֆիայի դեպքում:

Համակարգային էստրոգենային թերապիա

Եթե հեշտոցային չորությունը կապված է դաշտանադադարի այլ ախտանիշների հետ, ինչպիսիք են չափավոր կամ ուժեղ ջերմահորդանքները, ձեր բժիշկը կարող է առաջարկել Էստրոգենի դեղահաբեր, պատիճներ (կապսուլաներ) կամ գել կամ ավելի բարձր դեղաչափով Էստրոգենային օղակ: Բերանային (օրալ) ընդունված Էստրոգենը մուտք է գործում ձեր ամբողջ օրգանիզմ և դրսևորում համակարգային ազդեցություն: Խնդրեք ձեր բժշկին բացատրել բերանային Էստրոգենի օգուտներն ու ռիսկերը, և այն, թե արդյոք դուք պետք է Էստրոգենի հետ միասին ընդունեք նաև մեկ այլ հորմոն՝ Պրոգեստին, թե ոչ:

Հեշտոցային ընդլայնիչներ (վագինալ դլատորներ)

Դուք կարող եք նախընտրել հեշտոցային լայնացուցիչները որպես ոչ հորմոնալ բուժման տարբերակ: Դրանք նաև կարող են օգտագործվել Էստրոգենային թերապիայի հետ միասին: Այս գործիքները խթանում և ձգում են հեշտոցային մկանները՝ հակադարձելով հեշտոցի նեղացմանը:

Եթե ձեզ անհանգստացնում է ցավոտ սեռական հարաբերությունը, հեշտոցային ընդլայնիչները կարող են թեթևացնել հեշտոցային անհարմարավետությունը՝ ձգելով հեշտոցը: Եթե ձեր ախտանիշները ծանր են, բժիշկը կարող է խորհուրդ տալ կոնքի հատակի ֆիզիոթերապիա և հեշտոցային ընդլայնիչներ: Ձեր բժիշկը կամ ֆիզիոթերապևտը կարող են սովորեցնել ձեզ, թե ինչպես օգտագործել հեշտոցային ընդլայնիչները:

Տեղային (տոպիկ) Լիդոկային

Այս միջոցը հասանելի է որպես տեղային օգտագործման քսուք կամ գել: Տեղային Լիդոկայինը կարող է օգտագործվել սեռական ակտիվության հետ կապված անհարմարավետությունը նվազեցնելու համար: Կիրառեք այն սեռական ակտիվությունը սկսելուց 5-10 րոպե առաջ:

Եթե ունեցել եք կրծքագեղձի քաղցկեղ

Եթե ունեք կրծքագեղձի քաղցկեղի պատմություն, տեղեկացրեք այդ մասին ձեր բժշկին և միասին քննարկեք հետևյալ տարբերակները:

• Ոչ հորմոնալ բուժում. փորձեք խոնավացնողներ և քսանյութեր որպես առաջին ընտրություն:
• Հեշտոցային ընդլայնիչներ. հեշտոցային ընդլայնիչները ոչ հորմոնային տարբերակ են, որոնք կարող են խթանել և ձգել հեշտոցային մկանները: Սա օգնում է հեշտոցի նեղացման կանխարգելմանը:
• Հեշտոցային էստրոգեն. խորհրդակցելով ձեր քաղցկեղի մասնագետի (ուռուցքաբանի) հետ, ձեր բժիշկը կարող է խորհուրդ տալ հեշտոցային էստրոգենի ցածր դեղաչափեր, եթե ոչ հորմոնային բուժումները չեն մեղմացնում ձեր ախտանիշները: Այնուամենայնիվ, կա որոշակի մտահոգություն, որ հեշտոցային էստրոգենը կարող է մեծացնել քաղցկեղի կրկնման ռիսկը, հատկապես, եթե ձեր կրծքագեղձի քաղցկեղը հորմոն-զգայուն է:
• Համակարգային էստրոգենային թերապիա. համակարգային էստրոգենի բուժումը հիմնականում խորհուրդ չի տրվում, հատկապես, եթե ձեր կրծքագեղձի քաղցկեղը եղել է հորմոն-զգայուն: