Բուժում - Աուտիզմ

Աուտիստիկ սպեկտրի խանգարման համար որևէ դեղամիջոց գոյություն չունի, և չկա մեկ համընդհանուր բուժում, որը համապատասխանում է բոլորին:

Բուժման նպատակն է առավելագույնի հասցնել ձեր երեխայի գործելու կարողությունը՝ նվազեցնելով աուտիստիկ սպեկտրի խանգարման ախտանիշները և աջակցելով զարգացմանն ու ուսուցմանը: Նախադպրոցական տարիքի վաղ միջամտությունը կարող է օգնել ձեր երեխային սովորել կարևոր սոցիալական, հաղորդակցական, գործառնական և վարքագծային հմտություններ:

Աուտիստիկ սպեկտրի խանգարման տնային և դպրոցական բուժումների և միջամտությունների շրջանակը կարող է ճնշող լինել, և ձեր երեխայի կարիքները կարող են փոխվել ժամանակի ընթացքում: Ձեր բժիշկը կարող է առաջարկել տարբերակներ և օգնել բացահայտելու ձեր տարածքում առկա ռեսուրսները:

Եթե ձեր երեխային ախտորոշել են աուտիստիկ սպեկտրի խանգարում, խոսեք մասնագետների հետ բուժման ռազմավարություն ստեղծելու մասին և ստեղծեք մասնագետների թիմ՝ ձեր երեխայի կարիքները բավարարելու համար:

Բուժման տարբերակները կարող են ներառել հետևյալը:

• Վարքաբանական և հաղորդակցման թերապիաներ. բազմաթիվ ծրագրեր անդրադառնում են աուտիստիկ սպեկտրի խանգարման հետ կապված սոցիալական, լեզվական և վարքային դժվարությունների լայն շրջանակին: Որոշ ծրագրեր ուղղված են խնդրահարույց վարքագծի նվազեցմանը և նոր հմտություններ սովորեցնելուն: Այլ ծրագրերը կենտրոնանում են երեխաներին սովորեցնելու վրա, թե ինչպես վարվել սոցիալական իրավիճակներում կամ ավելի լավ շփվել ուրիշների հետ: Կիրառական վարքագծի վերլուծությունը (ABA) կարող է օգնել երեխաներին, որ սովորեն նոր հմտություններ և ընդհանրացնեն այդ հմտությունները բազմաթիվ իրավիճակներում՝ պարգևների վրա հիմնված մոտիվացիայի համակարգի միջոցով:
• Կրթական թերապիաներ. աուտիստիկ սպեկտրի խանգարում ունեցող երեխաները հաճախ լավ են արձագանքում բարձր ստրուկտուրավորված կրթական ծրագրերին: Հաջողակ ծրագրերը սովորաբար ներառում են մասնագետների թիմ և տարաբնույթ միջոցառումներ՝ ուղղված սոցիալական հմտությունների, հաղորդակցման և վարքագծի բարելավմանը: Նախադպրոցական տարիքի երեխաները, ովքեր ստանում են ինտենսիվ, անհատականացված վարքային միջամտություններ, հաճախ լավ առաջընթաց են ցուցաբերում:
• Ընտանեկան թերապիաներ. ծնողները և ընտանիքի մյուս անդամները կարող են սովորել, թե ինչպես խաղալ և շփվել իրենց երեխաների հետ այնպես, որ խթանեն սոցիալական շփման հմտությունները, կառավարեն խնդրահարույց վարքագիծը և սովորեցնեն առօրյա ապրելու և հաղորդակցման հմտություններ: Ընտանեկան թերապիան նաև կարող է օգնել ընտանիքի անդամների հույզերի կառավարմանը և նրանց կյանքի որակի բարելավմանը:
• Այլ թերապիաներ. կախված ձեր երեխայի կարիքներից՝ խոսքի թերապիան՝ հաղորդակցման հմտությունները բարելավելու համար, աշխատանքային թերապիան՝ ամենօրյա գործունեության ուսուցման համար, և ֆիզիոթերապիան՝ շարժումը և հավասարակշռությունը բարելավելու համար կարող են օգտակար լինել: Հոգեբանը կարող է խորհուրդ տալ խնդրահարույց վարքագծի հաղթահարման ուղիներ:
• Դեղորայք. ոչ մի դեղամիջոց չի կարող բարելավել աուտիստիկ սպեկտրի խանգարման հիմնական նշանները, սակայն որոշակի դեղամիջոցները կարող են օգնել ախտանիշների վերահսկմանը: Օրինակ, որոշ դեղամիջոցներ կարող են նշանակվել, եթե ձեր երեխան գերակտիվ է, հակափսիխոտիկ դեղամիջոցները երբեմն օգտագործվում են ծանր վարքաբանական խնդիրների բուժման համար, իսկ անհանգստության դեպքում կարող են նշանակվել հակադեպրեսանտներ: Տեղեկացրեք բոլոր բժիշկներին ձեր երեխայի ընդունած ցանկացած դեղամիջոցի կամ հավելումների վերաբերյալ: Որոշ դեղամիջոցներ և հավելումներ կարող են փոխազդել՝ առաջացնելով վտանգավոր կողմնակի բարդություններ:

Առողջական և հոգեկան առողջության այլ խնդիրների կառավարումը

Աուտիստիկ սպեկտրի խանգարումից բացի երեխաները, դեռահասները և չափահասները կարող են նաև առնչվել հետևյալ խնդիրների հետ:

• Ֆիզիկական առողջության խնդիրներ. աուտիստիկ սպեկտրի խանգարում ունեցող երեխաները նաև կարող են ունենալ այլ առողջական խնդիրներ, ինչպիսիք են էպիլեպսիան, քնի խանգարումները, սննդի սահմանափակ նախապատվությունները կամ ստամոքսի հետ կապված խնդիրներ: Հարցրեք ձեր երեխայի բժշկին, թե ինչպես միասին լավագույնս կառավարել այս վիճակները:
• Հասուն տարիքի անցման հետ կապված խնդիրներ. աուտիստիկ սպեկտրի խանգարում ունեցող դեռահասները և երիտասարդները կարող են դժվարություններ ունենալ սեռահասունացմանն ուղեկցող մարմնական փոփոխությունները հասկանալու համար: Բացի այդ, դեռահասության շրջանում սոցիալական իրավիճակները գնալով ավելի բարդ են դառնում, և դուք կարող եք առնչվել անհատական տարբերությունների նկատմամբ ավելի ցածր հանդուրժողականության խնդրին: Դեռահասության տարիներին վարքաբանական խնդիրները նույնպես կարող են դժվարանալ: Զրուցեք այս թեմայով դեռահասությունից չափահաս կյանք անցնող երեխայի բժշկի հետ:
• Հոգեկան առողջության այլ խանգարումներ. աուտիստիկ սպեկտրի խանգարում ունեցող դեռահասները և չափահասները հաճախ ունենում են հոգեկան առողջության այլ խանգարումներ, ինչպիսիք են անհանգստությունը և դեպրեսիան: Ձեր բժիշկը, հոգեկան առողջության մասնագետը և համայնքային խորհրդատուն կարող են օգնություն առաջարկել:

Ապագայի պլանավորում

Աուտիստիկ սպեկտրի խանգարում ունեցող երեխաները սովորաբար շարունակում են սովորել և հաղթահարել խնդիրները ողջ կյանքի ընթացքում, բայց նրանցից շատերը կշարունակեն որոշակի մակարդակի աջակցություն պահանջել: Ձեր երեխայի ապագա հնարավորությունների պլանավորումը, ինչպիսիք են զբաղվածությունը, քոլեջը, կենսապայմանները, անկախությունը և աջակցության համար անհրաժեշտ ծառայությունները, կարող են այս գործընթացը դարձնել ավելի հարթ: