Skip to main content

Բուժում - ​Բարտոլինյան կիստա

Հաճախ բարտոլինյան գեղձի կիստան բուժում չի պահանջում, հատկապես, եթե այն գանգատներ կամ ախտանիշներ չի առաջացնում:

Անհրաժեշտության դեպքում բուժումը կախված է կիստայի չափից, ախտանիշների ծանրության աստիճանից և կիստայի վարակված լինելուց, որը կարող է հանգեցնել թարախակույտի (աբսցես):

Ձեր բժշկի առաջարկած բուժման տարբերակները ներառում են հետևյալը:

  • Նստած վաննաներ. երեք-չորս օրվա ընթացքում օրական մի քանի անգամ տաք ջրով լցված լոգարանի մեջ նստելը կարող է օգնել, որ փոքրիկ, վարակված կիստան պատռվի և ինքնուրույն արտահոսի (դատարկվի):
  • Վիրահատական դատարկում (դրենավորում). ձեզ կարող է անհրաժեշտ լինել վիրահատություն՝ վարակված կամ շատ մեծ կիստայի արտահոսք ապահովելու և ամբողջապես դատարկելու համար: Կիստայի դրենավորումը կարող է իրականացվել տեղային անզգայացման կամ հանգստացնողների միջոցով: Միջամտության համար ձեր բժիշկը փոքրիկ կտրվածք է անում կիստայի վրա, թույլ է տալիս, որ այն արտահոսի, որից հետո վերքի մեջ տեղադրում է փոքրիկ ռետինե խողովակ (կաթետեր): Կաթետերը տեղում մնում է մինչև վեց շաբաթ՝ կտրվածքը բաց պահելու և ամբողջական արտահոսք ապահովելու համար:
  • Հակաբիոտիկներ. բժիշկը կարող է հակաբիոտիկ նշանակել, եթե ձեր կիստան վարակված է կամ եթե լաբորատոր թեստը ցույց է տալիս, որ ունեք սեռական ճանապարհով փոխանցվող վարակ: Այնուամենայնիվ, եթե թարախակույտը պատշաճ կերպով դատարկվի, հնարավոր է, որ հակաբիոտիկների կարիք չունենաք:
  • Մարսուպիլիզացիա. եթե կիստաները կրկնվում կամ անհանգստացնում են ձեզ, մարսուպալիզացիայի միջամտությունը կարող է օգնել: Ձեր բժիշկը կարեր է դնում դրենաժային կտրվածքի յուրաքանչյուր կողմում՝ մոտ 6 միլիմետր երկարությամբ մշտական բացվածք ստեղծելու համար: Միջամտությունից հետո մի քանի օրվա ընթացքում նաև կարող է տեղադրվել կաթետեր՝ արտահոսքը խթանելու և կրկնությունը կանխարգելելու համար:

Հազվադեպ, չապաքինվող կիստաների դեպքում, որոնք արդյունավետորեն չեն բուժվում վերոնշյալ միջոցառումներով, ձեր բժիշկը կարող է խորհուրդ տալ բարտոլինյան գեղձի հեռացման վիրահատություն: Վիրահատական հեռացումը սովորաբար կատարվում է հիվանդանոցում՝ ընդհանուր անզգայացման պայմաններում: Գեղձի վիրահատական հեռացումը կարող է մեծացնել միջամտությունից հետո արյունահոսության կամ բարդությունների ռիսկը:

Հոդվածը հրապարակվել է՝ 24-07-2023
Վերջին վերանայում՝ 06-04-2024