Կանխարգելում - Պառկելախոց

Դուք կարող եք օգնել պառկելախոցերի կանխարգելմանը ձեր մարմնի դիրքը հաճախակի փոփոխելով, որի շնորհիվ մաշկի խոցելի շրջանները ժամանակավորապես ազատվում են մշտական սեղմված վիճակից:

Պառկելախոցերի կանխարգելման այլ մոտեցումներից են մաշկի պատշաճ խնամքը, առողջարար սննդի և բավարար չափով հեղուկների ընդունումը, ծխախոտից հրաժարվելը, հուզական լարվածության կառավարումը և ամենօրյա վարժանքները:

Մարմնի դիրքի փոփոխության (ռեպոզիցիա) հմտություններ

• Հաճախակի փոփոխեք ձեր մարմնի ծանրության կենտրոնը. խնամողի կամ հարազատների օգնությամբ յուրաքանչյուր ժամը մեկը փոփոխեք ձեր դիրքը:
• Հնարավորության դեպքում, բարձրացրեք ինքներդ ձեզ. եթե ձեր մարմնի վերին կեսի ուժը պահպանված է, ժամանակ առ ժամանակ ձեռքերի վրա հենվելով բարձրացրեք ձեր մարմինը և կտրվեք աթոռի նստատեղից՝ մնալով այս դիրքում մի քանի րոպե:
• Օգտագործեք հատուկ հնարավորություններով անվասայլակներ. որոշ անվասայլակներ թույլ են տալիս թեքել նստատեղը, որի շնորհիվ թուլանում է փափուկ հյուսվածքների վրա ճնշումը:
• Օգտագործեք այնպիսի բարձեր կամ ներքնակներ, որոնք թուլացնում են ճնշումը. շատ փափուկ ներքնակները կարող են ուժեղացնել հարակից շրջանների ճնշումը:
• Պառկեք հարթ, առանց կարերի սավանով ներքնակի վրա. սրբոսկրի և պոչուկի տակ կարելի է դնել ռետինե օղակ կամ գիշերանոթ, կրունկների տակ` բամբակե-թանզիֆե բարձիկ։
• Ճիշտ հարմարեցրեք մահճակալի դիրքը. շատ մի՛ բարձրացրեք մահճակալի գլխամասը (աշխատեք չանցնել 30 աստիճանը), որ կանխարգելեք անկողնում դեպի ներքև մարմնի սահումը:

Մաշկի խնամքի հմտություններ

• Պահեք մաշկը մաքուր և չոր. մաքրեք մաշկը թույլ մաքրող միջոցներով և զգուշորեն չորացրեք: Կանոնավոր մաքրեք մաշկը, որ նվազեցնեք խոնավության, մեզի կամ կղանքի գրգռիչ ազդեցությունը: Անմիջապես փոխեք թաց կամ աղտոտված սպիտակեղենը:
• Պաշտպանեք ձեր մաշկը. օգտագործեք խոնավապաշտպան նրբաքսուքներ (կրեմներ), որ մաշկն «առանձնացնեք» մեզից և կղանքից: Ըստ անհրաժեշտության հաճախակի փոխեք անկողնային սպիտակեղենը և ներնքազգեստը: Ուշադրություն դարձրեք մաշկը գրգռող կամ վնասող կոճակներին, կարերին կամ ծալքերին:
• Ամեն օր զննեք ձեր մաշկը. ուշադիր ստուգեք ձեր մաշկը՝ հնարավորինս վաղ հայտնաբերելու պառկելախոցերի նախազգուշացնող նշանները:
• Հետևեք ձեր բժշկի խորհուրդներին. ձեր բժիշկը կարող է առաջարկել մաշկի առավել հարվող հատվածների կանխարգելիչ նրբաքսուքներ կամ լուծույթներ, ինչպես նաև թեթև մերսում: