Շագանակագեղձի ադենոմա. պատճառներ

Շագանակագեղձը գտնվում է միզապարկի ետևում: Մեզը միզապարկից դեպի առնանդամ տեղափոխվում է նեղ խողովակով՝ միզուկով, որն անցնում է շագանակագեղձի կենտրոնով:

Երբ շագանակագեղձը մեծանում է (գերաճ կամ հիպերպլազիա), սկսում է խոչընդոտել մեզի հոսքը:

Տղամարդկանց մեծ մասի շագանակագեղձը կյանքի ընթացքում աստիճանաբար և շարունակաբար մեծանում է: Բազմաթիվ տղամարդկանց շագանակագեղձը կարող է այնքան մեծանալ, որ առաջացնի միզային ախտանիշներ կամ արգելափակի մեզի հոսքը՝ առաջացնելով սուր միզակապություն:

Դեռևս լիարժեք պարզ չէ, թե ինչու է որոշ տղամարդկանց շագանակագեղձը մեծանում: Այնուամենայնիվ, սա կարող է կապված լինել մեծ տարիքում զարգացող սեռական հորմոնների հավասարակշռության շեղումների հետ:

Ռիսկի գործոններ

Շագանակագեղձի ադենոմայի առաջացմանը կարող են նպաստել մի շարք գործոններ:

• Տարիք. մեծացած շագանակագեղձը հազվադեպ է խնդիրներ առաջացնում մինչև 40 տարեկան տղամարդկանց շրջանում: Սակայն, արդեն 60 տարեկանում տղամարդկանց շուրջ մեկ երրորդի, իսկ 80-ում՝ շուրջ կեսի մոտ ի հայտ են գալիս շագանակագեղձի ադենոմայի չափավորից մինչև ծանր ախտանիշներ:
• Ընտանեկան պատմություն. շագանակագեղձի ադենոմայով արյունակից հարազատ՝ հայր կամ եղբայր ունենալը մեծացնում է ձեզ մոտ նույն հիվանդության զարգացման հավանականությունը:
• Դիաբետ և սրտային հիվանդություն. հետազոտությունները վկայում են, որ դիաբետը, ինչպես նաև սրտային հիվանդությունը և բետա-բլոկատորների օգտագործումը կարող է բարձրացնել շագանակագեղձի բարորակ հիպերպլազիայի ռիսկը:
• Կենսակերպ. գիրությունը բարձրացնում է շագանակագեղձի բարորակ հիպերպլազիայի ռիսկը, մինչդեռ ֆիզիկական վարժանքները կարող են նվազեցնել այդ ռիսկը: