Շագանակագեղձի ադենոմա. բարդություններ

Շագանակագեղձի ադենոմա. բարդություններ

Մեծացած շագանակագեղձը կարող է հանգեցնել մի շարք բարդությունների:

  • Սուր միզակապություն. սուր միզակապությունը պահանջում է միզապարկի կաթետերիզացիա, որը թույլ է տալիս դատարկել միզապարկում «խցանված» մեզը: Միզակապության որոշ տեսակների դեպքում նաև կարող է առաջարկվել մեզի արտահոսքը վերականգնող վիրահատական միջամտություն:
  • Միզուղիների վարակներ. միզապարկն ամբողջությամբ դատարկելու անհնարինությունը կարող է բարձրացնել միզուղիների վարակի ռիսկը: Միզուղիների վարակի հաճախակի կրկնությունը կարող է դառնալ շագանակագեղձի մի մասի հեռացման ցուցում:
  • Միզապարկի քարեր. միզապարկի ոչ լրիվ դատարկումը և մնացորդային (կանգային) մեզը նաև կարող է նպաստել միզապարկի խոռոչում քարերի առաջացմանը: Միզապարկի քարերն իրենց հերթին կարող են առաջացնել վարակ, միզապարկի գրգռում, մեզում արյուն (հեմատուրիա) կամ մեզի հոսքի խցանում:
  • Միզապարկի վնասում. միզելուց հետո միզապարկի ոչ լիարժեք դատարկումը (մնացորդային մեզ) կարող է բերել միզապարկի ձգման, որը ժամանակի ընթացքում հանգեցնում է թուլության: Արդյունքում, միզապարկի մկանային պատն այլևս չի կարողանում նորմալ կծկվել, որն ավելի է դժվարացնում միզապարկի դատարկումը:
  • Երիկամի վնասում. միզակապությանն ուղեկցող միզապարկի ներսում բարձր ճնշումը կարող է ուղղակիորեն վնասել երիկամները կամ նպաստել միզապարկի վարակի վերել տարածմանը դեպի երիկամներ:

Մեծացած շագանակագեղձով տղամարդկանց մեծ մասի մոտ այս բարդությունները չեն զարգանում: Սակայն սուր միզակապությունը և երիկամների վնասումը կարող են բերել լուրջ առողջական հետևանքների:

Մեծացած շագանակագեղձ ունենալը դեռ չի նշանակում, որ ունեք շագանակագեղձի քաղցկեղի զարգացման ավելի բարձր ռիսկ:

Հոդվածը վերանայվել է՝ 07-04-2021