Գրադարան
Շագանակագեղձի ադենոմա. ախտանիշներ
2 րոպե
Շագանակագեղձի մեծացում ունեցող մարդկանց մոտ ախտանիշների ծանրության աստիճանը տարբեր է, սակայն ախտանշաններն ունեն ժամանակի ընթացքում աստիճանաբար վատթարանալու հակում:
Շագանակագեղձի բարորակ հիպերպլազիայի ընդհանուր գանգատներն ու ախտանիշները ներառում են՝
- հաճախակի կամ հրատապ միզելու անհրաժեշտություն (հաճախամիզություն)
- գիշերը միզելու հաճախության ավելացում (նոկտուրիա)
- միզելը սկսելու դժվարություն
- մեզի թույլ շիթ կամ շիթ, որը դադարում և սկսվում է
- միզելու վերջում մեզի արտահոսք
- միզապարկն ամբողջությամբ դատարկելու անկարողություն (կամ նման զգացողություն):
Ավելի քիչ տարածված գանգատներից ու ախտանիշներից են՝
- միզուղիների վարակ
- միզելու անկարողություն (միզակապություն)
- արյուն մեզի մեջ (արյունամիզություն)
Շագանակագեղձի չափը պարտադիր չէ, որ կանխորոշի ախտանիշների ծանրությունը: Միայն թեթևակի մեծացած շագանակագեղձով որոշ տղամարդիկ կարող են ունենալ զգալի ախտանիշներ, մինչդեռ շատ մեծացած շագանակագեղձ ունեցող մյուս տղամարդիկ կարող են ունենալ միայն թեթև միզարձակման ախտանիշներ:
Որոշ տղամարդկանց մոտ ախտանշաններն ի վերջո կայունանում են և ժամանակի ընթացքում կարող են նույնիսկ բարելավվել:
Միզարձակման ախտանիշների այլ հնարավոր պատճառներ
Մեծացած շագանակագեղձի նման ախտանիշներ կարող են առաջացնել այլ հիվանդություններ ևս, որոնցից են՝
- միզուղիների վարակ
- շագանակագեղձի բորբոքում (պրոստատիտ)
- միզուկի նեղացում (ստրիկտուրա)
- նախորդ վիրահատության հետևանքով միզապարկի վզիկի սպի
- միզապարկի կամ երիկամի քարեր
- միզապարկը վերահսկող նյարդերի հետ կապված խնդիրներ
- շագանակագեղձի կամ միզապարկի քաղցկեղ:
Ե՞րբ դիմել բժշկին
Եթե ունեքմիզելու հետ կապված խնդիրներ, քննարկեք դրանք ձեր բժշկի հետ: Նույնիսկ եթե այդ խնդիրներն անհանգստացնող չեք համարում, կարևոր է գտնել կամ բացառել հիմքում ընկած պատճառները: Չբուժված միզարձակության խնդիրները կարող են հանգեցնել միզուղիների խցանման:
Եթե դուք չեք կարողանում միզել, անհապաղ դիմեք բժշկի:
Հոդվածը տեղադրվել է՝ 07-04-2021 վերանայվել է՝ 10-03-2023
Հեղինակ
Հեղինակային բոլոր իրավունքները պատկանում են Մեդեքսին։
Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:
