Շագանակագեղձի ադենոմա. բուժում

Շագանակագեղձի ադենոմա. բուժում

Առկա է շագանակագեղձի բարորակ հիպերպլազիայի բուժման լայն տեսականի, այդ թվում՝ դեղեր, նվազագույն ինվազիվ թերապիաներ և վիրահատություն:

Ձեզ համար բուժման լավագույն ընտրությունը կախված է մի քանի գործոններից, այդ թվում՝

  • ձեր շագանակագեղձի չափը
  • ձեր տարիքը
  • ձեր ընդհանուր առողջական վիճակը
  • ձեր անհարմարավետության (դիսկոմֆորտ) կամ ձեզ պատճառվող անհանգստության չափը:

Եթե ձեր ախտանիշները տանելի են, դուք կարող եք որոշել հետաձգել բուժումը և պարզապես հետևել ձեր ախտանիշներին: Որոշ տղամարդկանց մոտ ախտանշանները կարող են թեթևանալ առանց բուժման:

Դեղորայքային բուժում

Դեղորայքային բուժումը շագանակագեղձի մեծացման մեղմ և չափավոր ախտանիշների ամենատարածված բուժումն է: Ընտրանքները ներառում են հետևյալը:

  • Ալֆա պաշարիչներ (բլոկատորներ). այս դեղամիջոցները թուլացնում են միզապարկի վզիկի և շագանակագեղձի հարթ մկանաթելերը՝ հեշտացնելով միզելը: Ալֆա պաշարիչները սովորաբար արագ են ազդում համեմատաբար փոքր շագանակագեղձ ունեցող տղամարդկանց մոտ: Օրինակներից են՝ Ալֆուզոսին (Ուրոքսատրալ), Դոքսազոսին (Կարդուրա), Տամսուլոսին (Ֆլոմաքս) և Սիլոդոսին (Ռապաֆլո): Կողմնակի ազդեցություններից են՝ գլխապտույտ և մի անվնաս վիճակ, երբ սերմնահեղուկը առնանդամի ծայրից դուրս գալու փոխարեն վերադառնում է միզապարկ (հետադարձ սերմնաժայթքում):
  • 5-ալֆա ռեդուկտազի արգելակիչներ (ինհիբիտորներ). այս դեղամիջոցները փոքրացնում են ձեր շագանակագեղձը` կանխելով հորմոնալ փոփոխությունները, որոնք առաջացնում են շագանակագեղձի աճ: Օրինակներից են՝ Ֆինաստերին (Պրոսկար) և Դուտաստերիդ (Ավոդարտ): Այս դեղամիջոցների բուժական ազդեցությունը կարող է դրսևորվել մինչև վեց ամիս օգտագործելուց հետո: Կողմնակի ազդեցություններից է հետադարձ սերմնաժայթքումը:
  • Համակցված դեղորայքային բուժում. ձեր բժիշկը կարող է խորհուրդ տալ միաժամանակ ընդունել ալֆա-պաշարիչ և 5-ալֆա ռեդուկտազի արգելակիչ, եթե դրանցից մեկնումեկն առանձին արդյունավետ չէ:
  • Տադալաֆիլ (Սիալիս). հետազոտությունները ցույց են տալիս, որ սովորաբար էրեկտիլ դիսֆունկցիայի բուժման մեջ նշանակվող Տադալաֆիլը կարող է բուժել շագանակագեղձի մեծացումը:

Նվազագույն ինվազիվ կամ վիրահատական բուժում

Բուժման այս տարբերակը կարող է առաջարկվել, եթե՝

  • ձեր ախտանիշները միջինից ծանր են
  • դեղամիջոցները չեն մեղմացրել ձեր ախտանիշները
  • դուք ունեք միզուղիների խցանում, միզապարկի քարեր, մեզում արյուն կամ երիկամների հետ կապված խնդիրներ
  • դուք նախընտրում եք վերջնական բուժում:

Նվազագույն ինվազիվ կամ վիրահատական բուժում չի առաջարկվում, եթե ունեք՝

  • չբուժված միզուղիների վարակ
  • միզուկի նեղացման (ստրիկտուրային) հիվանդություն
  • շագանակագեղձի ճառագայթային բուժման կամ միզուղիների վիրահատության պատմություն
  • նյարդաբանական խանգարումներ, ինչպիսիք են Պարկինսոնի հիվանդությունը կամ ցրված սկլերոզը:

Շագանակագեղձի ցանկացած տեսակի միջամտություն կարող է առաջացնել կողմնակի ազդեցություններ: Կախված ձեր ընտրած միջամտությունից, բարդությունները կարող են ներառել՝

  • սերմնահեղուկը ետ է հոսում միզապարկ՝ սերմնաժայթքման ժամանակ առնանդամի միջով դուրս գալու փոխարեն (հետադարձ սերմնաժայթքում)
  • միզելու ժամանակավոր դժվարություն
  • միզուղիների վարակ
  • արյունահոսություն
  • էրեկտիլ դիսֆունկցիա
  • շատ հազվադեպ՝ միզապարկի վերահսկողության կորուստ (անմիզապահություն):

Կան նվազագույն ինվազիվ կամ վիրահատական բուժման մի քանի տեսակներ:

Շագանակագեղձի ներմիզուկային մասնահատում (տրանսուրետրալ ռեզեկցիա, TURP)

Միզուկով ներմուծված էնդոսկոպով հեռացվում է արտաքին մասից բացի ամբողջ շագանակագեղձը: TURP-ն, ընդհանուր առմամբ, արագորեն թեթևացնում է ախտանիշները, և տղամարդկանց մեծամասնության մոտ միջամտությունից անմիջապես հետո մեզի հոսքն ուժեղանում է: TURP-ից հետո կարող է ժամանակավորապես անհրաժեշտ լինել կաթետեր՝ ձեր միզապարկի դատարկման համար:

Շագանակագեղձի ներմիզուկային հատում (տրանսուրետրալ ինցիզիա, TUIP)

Միզուկով ներմուծված էնդոսկոպով վիրաբույժը մեկ կամ երկու փոքր կտրվածք է անում շագանակագեղձի մեջ, որը հեշտացնում է մեզի անցումը միզուկով: Այս վիրահատությունը կարող է առաջարկվել, եթե ունեք փոքր կամ չափավոր մեծացած շագանակագեղձ, հատկապես, եթե ունեք առողջական խնդիրներ, որոնք չափազանց ռիսկային են դարձնում այլ վիրահատությունները:

Տրանսուրետրալ միկրոալիքային թերմոթերապիա (TUMT)

Բժիշկը ձեր միզուկով դեպի շագանակագեղձ ներմուծում է հատուկ էլեկտրոդ: Էլեկտրոդից ստացվող միկրոալիքային էներգիան ոչնչացնում է մեծացած շագանակագեղձի ներքին մասը՝ փոքրացնելով այն և հեշտացնելով մեզի արտահոսքը: TUMT-ը կարող է միայն մասամբ թեթևացնել ձեր ախտանիշները, և արդյունքները կարող են դրսևորվել որոշ ժամանակ հետո: Այս վիրահատությունը սովորաբար օգտագործվում է միայն փոքր շագանակագեղձի համար հատուկ իրավիճակներում, քանի որ կարող է անհրաժեշտ լինել կրկնակի բուժում:

Տրանսուրետրալ ասեղային աբլացիա (TUNA)

Այս միջամտությամբ ձեր միզուկում տեղադրված էնդոսկոպով շագանակագեղձի մեջ տեղադրվում են ասեղներ: Ռադիոալիքներն անցնում են ասեղներով՝ տաքացնելով և ոչնչացնելով շագանակագեղձի ավելցուկային և մեզի հոսքն արգելափակող հյուսվածքը: Այս միջամտությունը կարող է առաջարկվել որոշ դեպքերում, սակայն ներկայում հազվադեպ է օգտագործվում:

Լազերային բուժում

Բարձր էներգիայի լազերը ոչնչացնում կամ հեռացնում է շագանակագեղձի գերաճած հյուսվածքը: Լազերային թերապիան, ընդհանուր առմամբ, անմիջապես թեթևացնում է ախտանիշները և ունի կողմնակի ազդեցությունների ավելի քիչ ռիսկ, քան ոչ լազերային վիրահատությունը: Լազերային թերապիան կարող է օգտագործվել այն տղամարդկանց մոտ, ովքեր չեն կարող շագանակագեղձի այլ միջամտություններ անցնել, քանի որ ընդունում են արյունը նոսրացնող դեղամիջոցներ (հակամակարդիչներ):

Բաց կամ ռոբոտ–օժանդակող պրոստատէկտոմիա

Վիրաբույժը կատարում է որովայնի ստորին շրջանում լայնակի կտրվածք, հասնում շագանակագեղձին և հեռացնում այն: Բաց շագանակագեղձի հեռացումը սովորաբար կատարվում է, եթե դուք ունեք շատ մեծ շագանակագեղձ, միզապարկի վնասում կամ այլ բարդացնող գործոններ: Վիրահատությունից հետո դուք կարճ ժամանակ եք անցկացնում հիվանդանոցում: Վիրահատությունն ունի արյունահոսության և արյան փոխներարկման անհրաժեշտության բարձր ռիսկ:

Հոդվածը վերանայվել է՝ 06-02-2023