Շագանակագեղձի մեծացումն ախտորոշելիս բժիշկը կարող է առաջարկել հետևյալ նախնական հետազոտությունները։
Ուղիղաղիքային մատնային քննություն. այս հետազոտությամբ, նախապես տեղեկացվնելով անհրաժեշտության մասին, բժիշկը ձեր կանգնած, կողքի պառկած կամ չորեքթաթ դիրքում (արմունկներն ու ծնկները հենած սեղանին) իր մատը ձեր հետանցքով մտցնում է ուղեղ աղիք և շոշափելով ստուգում ձեր շագանակագեղձի չափերը, կոնսիստենցիան, գեղձի մակերեսին լորձաթաղանթի շարժունակությունը, փափկությանը և այլն:
Արյան մեջ պրոստատ-սպեցիֆիկ հակածինի թեստ (PSA). PSA-ն ձեր շագանակագեղձում արտադրվող նյութ է: Շագանակագեղձի ադենոմայի ժամանակ PSA-ի մակարդակը կարող է բարձրանալ: Սակայն, PSA-ի մակարդակի բարձրացում կարող է գրանցվել նաև վերջերս կատարված միջամտությունների, վարակների, վիրահատության և հատկապես բարձր թվերի հասնել շագանակագեձի քաղցկեղի դեպքում:
Վերոնշյալից հետո բժիշկը կարող է խորհուրդ տալ լրացուցիչ հետազոտություններ, որոնք օգնում են շագանակագեղձի բարորակ հիպերպլազիայի ախտորոշման հաստատմանը և այլ հիվանդությունների ժխտմանը:
Միզարձակության հոսքի թեստ. այս դեպքում դուք միզում եք հատուկ հարմարեցված սարքի մեջ, որը չափում է ձեր մեզի հոսքի ուժգնությունը և քանակը: Թեստը նաև թույլ է տալիս որոշել ժամանակի ընթացքում ձեր հիվանդության բարելավումը կամ վատթարացումը:
Հետմիզարձակման մնացորդային ծավալի թեստ. այս հետազոտությամբ չափվում է միզելուց հետո միզապարկի դատարկման չափը: Մնացորդային մեզի ծավալը գնահատվում է սոնոգրաֆիայով կամ միզելուց հետո տեղադրված միզային կաթետերով:
Միզարձակումների 24-ժամյա օրագիր. միզարձակման հաճախականության և քանակների գրանցումը կարող է առանձնահատուկ օգտակար լինել, եթե ձեր շուրջօրյա միզարձակման շուրջ մեկ երրորդը տեղի է ունենում գիշերային ժամերին:
Ավելի բարդ դեպքերում բժիշկը կարող է խորհուրդ տալ հետևյալ հետազոտությունները:
Տրանսռեկտալ սոնոգրաֆիա. սա նույն սոնոգրաֆիան է, որի ժամանակ օգտագործվում է ուղիղաղիքային տվիչ (датчик): Գերձայնային հետազոտությունը հնարավորություն է տալիս չափել և գնահատել ձեր շագանակագեղձը:
Շագանակագեղձի բիոպսիա. այս դեպքում տրանսռեկտալ սոնոգրաֆիայի հսկողությամբ շագանակագեղձից բարակ ասեղով վերցվում է փոքր հյուսվածքային կենսանմուշ, որի բջջաբանական կամ հյուսվածաբանական հետազոտությունն օգնում է շագանակագեղձի քաղցկեղի ախտորոշմանը կամ ժխտմանը:
Ուրոդինամիկ և ճնշման հոսքի հետազոտություններ. այս հետազոտություններով միզային կաթետերով միզապարկը լցվում է ջրով կամ, ավելի հազվադեպ, օդով, որից հետո բժիշկը չափում է ներմիզապարկային ճնշումը և որոշում, թե ինչ չափով է պահպանված ձեր միզապարկի մկանային տոնուսը: Հետազոտությունները ցուցված են միայն այն դեպքերում, երբ կասկածվում է նյարդաբանական խնդիրների առկայություն կամ բուժական միջամտությունից հետո ախտանիշները պահպանվում են:
Ցիստոսկոպիա. ցիստոսկոպիան էնդոսկոպիկ հետազոտության տեսակ է, որի ժամանան ձեր միզուկով միզապարկ է ներմուծվում ազատ ծայրում լույսի աղբյուր և փոքր տեսախցիկ ունեցող ճկուն խողովակ (ցիստոսկոպ) և «ներսից» զննվում է ձեր միզուկը և միզապարկը: Ցիստոսկոպիայից առաջ սովորաբար կատարվում է տեղային անզգայացում:
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը: Հեղինակային բոլոր իրավունքները պատկանում են Մեդեքսին։
