Գրադարան

Միզապարկի քաղցկեղ. ախտորոշում

Միզապարկի քաղցկեղ. ախտորոշում

Time Read 3 րոպե

Միզապարկի քաղցկեղի ախտորոշման համար օգտագործվող հետազոտություններն ու միջամտությունները կարող են ներառել հետևյալը:

  • Միզապարկի ներսից դիտում (ցիստոսկոպիա). ցիստոսկոպիա կատարելու համար ձեր բժիշկը ձեր միզուկով ներմուծում է փոքր, բարակ խողովակ (ցիստոսկոպ): Ցիստոսկոպն ունի ոսպնյակ, որը թույլ է տալիս ձեր բժշկին անցնել ձեր միզուկի և միզապարկի ներսը՝ հետազոտելու այս կառույցները հիվանդության նշանների համար: Ցիստոսկոպիան կարող է կատարվել բժշկի գրասենյակում կամ հիվանդանոցում:
  • Հյուսվածքի նմուշի հեռացում հետազոտության համար (բիոպսիա): ցիստոսկոպիայի ընթացքում ձեր բժիշկը կարող է հատուկ գործիք անցկացնել ցիստոսկոպի միջով և ձեր միզապարկից բջիջների նմուշ հավաքելել՝ հետազոտության համար (բիոպսիա): Այս միջամտությունը երբեմն անվանում են միզապարկի ուռուցքի տրանսուրետրալ ռեզեկցիա (TURBT): TURBT-ը կարող է օգտագործվել նաև միզապարկի քաղցկեղի բուժման համար:
  • Մեզի նմուշի բջջաբանական հետազոտություն (մեզի ցիտոլոգիա). ձեր մեզի նմուշը դիտվում է մանրադիտակի տակ՝ ստուգելու քաղցկեղային բջիջների առկայությունը:
  • Պատկերման հետազոտություններ. պատկերային հետազոտությունները, ինչպիսիք են համակարգչային տոմոգրաֆիկ (ԿՏ) ուրոգրաֆիան կամ ռետրոգրադ պիելոգրաֆիան, թույլ են տալիս ձեր բժշկին հետազոտել ձեր միզուղիների կառուցվածքները: ԿՏ ուրոգրաֆիայի ժամանակ գունանյութը (կոնտրաստ), որը ներարկվում է ձեր ձեռքի երակից, ի վերջո հասնում է և հոսում է ձեր երիկամներով, միզածորաններով և միզապարկով: Հետազոտության ընթացքում արված ռենտգենյան պատկերները մանրամասն պատկերացում են տալիս ձեր միզուղիների մասին և օգնում ձեր բժշկին բացահայտելու այն շրջանը, որը կարող է քաղցկեղ լինել: Ռետրոգրադ պիելոգրաֆիային ռենտգեն հետազոտություն է, որն օգտագործվում է վերին միզուղիների մանրամասն պատկերներ ստանալու համար: Այս թեստի ընթացքում ձեր բժիշկը բարակ խողովակ (կաթետեր) է անցկացնում միզուկով միզապարկի մեջ՝ միզածորանների մեջ կոնտրաստային ներկ ներարկելու համար: Այնուհետև ներկը հոսում է ձեր երիկամների մեջ՝ մինչ կատարվում են ռենտգենյան նկարահանվումներ:

Միզապարկի քաղցկեղի տարածման որոշում

Ձեր միզապարկի քաղցկեղը հաստատելուց հետո ձեր բժիշկը կարող է խորհուրդ տալ լրացուցիչ հետազոտություններ՝ պարզելու, թե արդյոք ձեր քաղցկեղը տարածվել է ձեր ավշային հանգույցներում կամ ձեր օրգանիզմի այլ շրջաններում:

Հետազոտությունները կարող են ներառել՝

  • ԿՏ սքան
  • մագնիսա-ռեզոնանսային տոմոգրաֆիա (ՄՌՏ)
  • պոզիտրոնային էմիսիոն տոմոգրաֆիա (ՊԷՏ)
  • ոսկրերի սքանավորում
  • կրծքավանդակի ռենտգեն հետազոտություն:

Ձեր բժիշկն օգտագործում է այս միջոցառումներից ստացված տեղեկությունները՝ ձեր քաղցկեղի փուլը սահմանելու համար: Միզապարկի քաղցկեղի փուլերը նշվում են հռոմեական թվանշաններով՝ 0-ից IV: Ամենացածր փուլերը ցույց են տալիս քաղցկեղ, որը սահմանափակված է միզապարկի ներքին շերտերով և չի աճել միզապարկի մկանային պատի վրա: Ամենաբարձր փուլը՝ IV փուլը, ցույց է տալիս քաղցկեղը, որը տարածվել է դեպի մարմնի հեռավոր շրջաններում գտնվող ավշային հանգույցներ կամ օրգաններ։

Միզապարկի քաղցկեղի աստիճանը

Միզապարկի քաղցկեղը հետագայում դասակարգվում է այն բանի հիման վրա, թե ինչպիսի տեսք ունեն քաղցկեղային բջիջները մանրադիտակի տակ: Սա հայտնի է որպես աստիճան, և ձեր բժիշկը կարող է նկարագրել միզապարկի քաղցկեղը որպես ցածր կամ բարձր աստիճանի:

  • Միզապարկի ցածր աստիճանի քաղցկեղ. քաղցկեղի այս տեսակը կազմված է բջիջներից, որոնք արտաքին տեսքով և կազմակերպվածությամբ ավելի մոտ են նորմալ բջիջներին (լավ տարբերակված են): Ցածր աստիճանի ուռուցքը սովորաբար ավելի դանդաղ է աճում և ավելի քիչ հավանական է, որ ներխուժի միզապարկի մկանային պատի հաստության մեջ, քան բարձր կարգի ուռուցքը:
  • Միզապարկի բարձր աստիճանի քաղցկեղ. քաղցկեղի այս տեսակը կազմված է բջիջներից, որոնք ունեն ոչ նորմալ տեսք և չունեն որևէ նմանություն նորմալ տեսք ունեցող հյուսվածքների հետ (վատ տարբերակված են): Բարձր աստիճանի ուռուցքը հակված է ավելի ագրեսիվ աճի, քան ցածր աստիճանի ուռուցքը, և կարող է ավելի մեծ հավանականությամբ տարածվել միզապարկի մկանային պատի հաստության մեջ և այլ հյուսվածքներ և օրգաններ:

Հոդվածը տեղադրվել է՝ 10-02-2021 վերանայվել է՝ 22-04-2023

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով