Գրադարան
Միզապարկի քաղցկեղ. բուժում
1 րոպե
Միզապարկի քաղցկեղի բուժման մեթոդները կապված են բազմաթիվ գործոններից, օրինակ՝ քաղցկեղի տեսակ, չարորակության աստիճան և փուլ, ընդհանուր առողջական վիճակ և բուժման անհատական նախապատվություն:
Միզապարկի քաղցկեղի բուժումը կարող է ներառել հետևյալը:
- Վիրահատություն, որի նպատակը քաղցկեղային հյուսվածքների վիրահատական հեռացումն է (օրինակ՝ միզապարկի քաղցկեղի տրանսուրետրալ ռեզեկցիա (անգլերեն հապավումը՝ TURBT) կամ միզապարկի ամբողջական (ռադիկալ) կամ մասնակի հեռացում (ցիստէկտոմիա):
- Ներմիզապարկային (ինտրավեզիկալ) քիմիոթերապիա՝ տեղային քիմիոթերապիա, որն օգտագործվում է միզապարկի լորձաթաղանթից ծագած և բարձր չարորակության աստիճան ունեցող քաղցկեղների բուժման մեջ:
- Ամբողջ օրգանիզմի (համակարգային) քիմիոթերապիա, որը թույլ է տալիս կրճատել վիրահատությունից հետո քաղցկեղի կրկնության հավանականությունը կամ կիրառվում է վիրահատության փոխարեն, եթե վերջինս տեխնիկապես կամ այլ պատճառներով չի կատարվում:
- Ճառագայթային թերապիա, որն ուղղված է քաղցկեղային բջիջների ճառագայթային ոչնչացմանը և հաճախ կիրառվում է որպես առաջնային բուժում, եթե վիրահատությունը տեխնիկապես կամ այլ պատճառներով չի կատարվում:
- Իմունային թերապիա, որի նպատակն օրգանիզմի իմունային համակարգը խթանելն է՝ ուղղված քաղցկեղային բջիջների դեմ «բնական» պայքարի ակտիվացմանը:
- Թիրախային թերապիա, որը սովորաբար նշանակվում է տարածված քաղցկեղների ժամանակ, երբ բուժման մյուս մեթոդներն անօգուտ են:
Բժիշկ-ուռուցքաբանը կարող է առաջարկել նաև համակցված բուժում, որը ներառում է մեկից ավելի մեթոդի միաժամանակյա կամ հաջորդական կիրառում:
Հոդվածը տեղադրվել է՝ 10-02-2021 վերանայվել է՝ 06-06-2023
Հեղինակ
Հեղինակային բոլոր իրավունքները պատկանում են Մեդեքսին։
Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:
