Բլեֆարիտ (կոպաբորբ)

2 րոպե

Բլեֆարիտը աչքի կոպերի բորբոքումն է, որն ուղեկցվում է կոպերի ցավոտությամբ, կարմրությամբ և այտուցվածությամբ:

Բլեֆարիտի տեսակներից մեկն է «տիկնակլունձը» (գորդեոլում):

Բլեֆարիտը սովորաբար ախտահարում է զույգ ակնակոպերը: Այն չի առաջացնում տեսողական խնդիրներ, թեև կարող է որոշակի անհարմարավետության զգացում հարուցել:

Բլեֆարիտը կրկնվելու հակում ունի, սակայն դուք կարող եք կանխարգելել այն:

Բլեֆարիտի պատճառները

Բլեֆարիտի ամենահաճախ հանդիպող պատճառը բակտերիալ վարակն է (օրինակ՝ ոսկեզօծ ստաֆիլոկոկ՝ Staph. aureus): Վարակը կարող է տեղակայվել թարթիչների հիմքում կամ կոպեզրի գեղձերում:

Բլեֆարիտի այլ պատճառներից են՝

• կոպեզր բացվող Զեյսի ճարպագեղձերի արտահանող ծորանների խցանում
• աչքի կաթիլների նկատմամբ ալերգիկ ռեակցիաներ
• մաշկային խնդիրներ, օրինակ՝ թեփ կամ ռոզացեա (վարդագույն ակնե):

Բլեֆարիտի ախատնիշները

Եթե դուք ունեք բլեֆարիտ, դուք կարող եք նշել՝

• աչքում օտար մարմնի (փոշու) առկայության զգացողություն
• աչքերի և կոպերի շրջանի քոր կամ այրոցի զգացողություն
• կոպեզրի կարմրություն
• աչքերի արցունքակալում
• լույսի հանդեպ գերզգայունություն (ուժեղ լույսի անտանելիություն)
• առավոտյան արթնանալիս կոպեզրի և թարթիչների հիմքում թեփոտություն և կեղևիկների առկայություն («ճպռոտում»):

Բլեֆարիտների ինքնօգնությունը

Բլեֆարիտը բուժելու համար դուք կարող եք՝

• աչքի դրսային անկյունից դեպի քիթը ուղղությամբ նուրբ մերսել ձեր կոպը
• մաքրել ձեր կոպերը՝
  • մաքուր ջրով
  • կոպերը մաքրող միջոցներով
  • նոսրացված մանկական հիպոալերգիկ շամպունով (2 կաթիլը 1/2 բաժակ գոլ ջրում, որից հետո թրջեք մաքուր անձեռոցիկն այս լուծույթով և նուրբ կերպով մաքրեք ձեր կոպերը):
• օրը մի քանի անգամ օգտագործել տաք կոմպրեսներ (5-10 րոպե):

Եթե կրում եք կոնտակտային լինզաներ, ապա մի քանի օր հրաժարվեք դրանցից, քանի դեռ կոպի այտուցվածությունը չի վերացել:

Ե՞րբ դիմել բժշկին

Եթե մի քանի օրվա ընթացքում բլեֆարիտի նշանները չեն անհետանում, ապա դիմեք ձեր բժշկին:

Բժիշկը կզրուցի ձեզ հետ և կզննի ձեր աչքերը: Եթե նա կասկածի բակտերիալ վարակի առկայություն, ապա կարող է նշանակել հակաբիոտիկային որևէ քսուք, իսկ կոպի այտուցը մեղմացնելու համար՝ ստերոիդային աչքի կաթիլներ:

Բժիշկը կարող է նաև ստուգել և բուժել ուղեկցող հիվանդություններն ու վիճակները, որոնք կարող են հանդիսանալ բլեֆարիտի կրկնվելու պատճառ (օրինակ՝ սեբորեային թեփը կամ չոր աչքերի համախտանիշը):

Բլեֆարիտի կանխարգելումը

Բլեֆարիտի կրկնվելը կանխարգելելու համար հետևեք ձեր կոպերի հիգիենային և մաքրությանը և հրաժարվեք աչքերի շուրջը շպար կամ կոսմետիկ միջոցներ քսելուց: