Ախտանիշներ - Աղիքային վարակներ

Աղիքային վարակների ախտանիշները կախված են հարուցիչի տեսակից և դրա առաջացրած հիվանդությունից:

Այնուամենայնիվ, հարուցիչի տեսակից անկախ աղիքային վարակները բնորոշվում են որոշ ընդհանուր ախտանիշների զարգացմամբ, որոնցից են՝

• փորլուծություն
• սրտխառնոց
• փսխում
• կծկանքային բնույթի որովայնի ցավեր
• ջերմություն (կամ տենդ)
• գլխացավ:

Որոշ աղիքային վարակների ժամանակ (օրինակ՝ դիզենտերիա) փորլուծությունը կարող է ուղեկցվել ջրիկ կղանքում արյան և լորձի հայտնվելով:

Ե՞րբ դիմել բժշկին

Այցելեք ձեր բժշկին, եթե՝

• գանգատներն արտահայտված և անհանգստացնող են
• ունեք բարձր ջերմություն (տենդ)
• կղանքում առկա է արյուն կամ լորձ
• լուծը շարունակվում է ավելի քան 2-3 օր
• զարգացել են ջրազրկման նշաններ, օրինակ՝ ծարավի մշտական զգացում և մեզի ծավալի պակասում:

Նորածինների մոտ աղիքային վարակի նշաններ զարգանալիս անհապաղ դիմեք երեխայի բժշկին, եթե՝

• 24 ժամվա ընթացքում լուծը կրկնվել է 6 անգամ կամ ավելի
• 24 ժամվա ընթացքում փսխումը կրկնվել է 3 անգամ կամ ավելի
• առկա են ինքնազգացողության վատթարացման նշաններ՝ թույլ են արձագանքում, բարձր ջերմում են կամ քիչ են միզում
• փսխումները շարունակվում են ավելի քան 1 օր:

Մանկահասակ և ավելի մեծ տարիքով երեխաների դեպքում դիմեք երեխայի բժշկին, եթե՝

• միաժամանակ առկա են փորլուծություն և փսխում
• կղանքային արտաթորանքները կիսաջրիկ են և ավելի քան 2-3 օր պարունակում են արյուն
• առկա է սուր կամ կայուն ստամոքսի ցավ: