Գրադարան

Գլխուղեղի ուռուցք. պատճառներ

Գլխուղեղի ուռուցք. պատճառներ

Time Read 3 րոպե

Գլխուղեղի ուռուցքներն ըստ առաջացման պատճառի բաժանվում են երկու խմբի՝ առաջնային և երկրորդային:

Գլխուղեիղ ուռուցքներ, որոնք սկսվում են գլխուղեղում

Գլխուղեղի ուռուցքները, որոնք սկսվում են որպես գլխուղեղի բջիջների աճ, կոչվում են գլխուղեղի առաջնային ուռուցքներ: Դրանք կարող են սկսվել անմիջապես գլխուղեղից կամ մոտակա հյուսվածքից: Մոտակա հյուսվածքը կարող է ներառել գլխուղեղը ծածկող թաղանթները, որոնք կոչվում են ուղեղաթաղանթներ (մինինգեալ թաղանթներ): Գլխուղեղի ուռուցքները կարող են առաջանալ նաև նյարդերի, մակուղեղի (հիպոֆիզ) և կոնաձև գեղձում:

Գլխուղեղի ուռուցքներն առաջանում են, երբ ուղեղային բջիջների կամ մոտակա բջիջների ԴՆԹ-ն ենթարկվում է որոշակի փոփոխությունների (մուտացիա): Բջջի ԴՆԹ-ն պարունակում է հրահանգներ, որոնք բջիջին թլադրում են, թե ինչ անել: Փոփոխությունները՝ մուտացիաները հրահանում են բջիջներին արագ աճել և շարունակել ապրել, երբ առողջ բջիջները որպես իրենց բնական կյանքի ցիկլի մի մաս մահանում են: Սա գլխուղեղում շատ լրացուցիչ բջիջներ է ստեղծում: Այդ բջիջները կուտակվում են՝ ձևավորելով գոյացություն, որը կոչվում է ուռուցք:

Դեռևս պարզ չէ, թե ինչն է առաջացնում ԴՆԹ-ի փոփոխությունները, որոնք հանգեցնում են գլխուղեղի ուռուցքների: Գլխուղեղի ուռուցք ունեցող մարդկանց մեծ մասի համար պատճառը երբեք հայտնի չէ: Երբեմն ծնողները ԴՆԹ-ի փոփոխություններ են փոխանցում իրենց երեխաներին, որոնք կարող են մեծացնել գլխուղեղի ուռուցք ունենալու վտանգը։ Ժառանգական ծագման այս գլխուղեղի ուռուցքները հազվադեպ են: Եթե ​​ունեք գլխուղեղի ուռուցքների ընտանեկան պատմություն (անամնեզ), խոսեք այդ մասին ձեր բժշկի հետ: Դուք կարող եք խորհրդակցել գենետիկայի ոլորտում վերապատրաստված բժշկի հետ՝ հասկանալու, թե արդյոք ձեր ընտանեկան պատմությունը մեծացնում է գլխուղեղի ուռուցք ունենալու վտանգը:

Երբ գլխուղեղի ուռուցքներն առաջանում են երեխաների մոտ, դրանք, ամենայն հավանականությամբ, գլխուղեղի առաջնային ուռուցքներ են: Չափահասների մոտ գլխուղեղի ուռուցքներն ավելի հավանական է, որ քաղցկեղ են, որոնք սկսվել են այլ տեղից և տարածվել դեպի գլխուղեղ:

Քաղցկեղ, որը տարածվում է դեպի գլխուղեղ

Գլխուղեղի երկրորդային ուռուցքներն առաջանում են, երբ քաղցկեղը սկսվում է մեկ այլ տեղից և տարածվում դեպի գլխուղեղ: Երբ քաղցկեղը տարածվում է, կոչվում է մետաստատիկ քաղցկեղ:

Ցանկացած քաղցկեղ կարող է տարածվել դեպի գլխուղեղ, սակայն տարածված տեսակները ներառում են՝

  • կրծքագեղձի քաղցկեղ
  • հաստ աղիքի քաղցկեղ
  • երիկամի քաղցկեղ
  • թոքի քաղցկեղ
  • մելանոմա (մաշկի քաղցկեղի տեսակ):

Դեռևս պարզ չէ, թե ինչու են որոշ քաղցկեղներ տարածվում դեպի գլխուղեղ, իսկ մյուսներն ավելի հավանական է, որ տարածվեն դեպի այլ շրջաններ:

Գլխուղեղի երկրորդական ուռուցքներն առավել հաճախ հանդիպում են այն մարդկանց մոտ, ովքեր ունեն քաղցկեղի պատմություն: Հազվադեպ, գլխուղեղի ուռուցքը կարող է լինել քաղցկեղի առաջին նշանը, որը սկսվել է մարմնի մեկ այլ վայրում:

Չափահասների մոտ գլխուղեղի երկրորդային ուռուցքները շատ ավելի տարածված են, քան գլխուղեղի առաջնային ուռուցքները:

Ռիսկի գործոններ

Գլխւղեղի առաջնային ուռուցք ունեցող մարդկանց մեծամասնության մոտ պատճառը պարզ չէ: Սակայն բժիշկները նույնականացրել են որոշ գործոններ, որոնք կարող են մեծացնել ռիսկը:

Ռիսկի գործոնները ներառում են հետևյալը:

  • Տարիք. գլխուղեղի ուռուցքները կարող են առաջանալ ցանկացած տարիքում, սակայն դրանք առավել հաճախ ախտորոշվում են չափահասների շրջանում: Գլխուղեղի որոշ ուռուցքներ հիմնականում հանդիպում են չափահասների մոտ, իսկ այլ տեսակի ուռուցքներ առավել հաճախ զարգանում են երեխաների մոտ։
  • Ռասա. յուրաքանչյուր ոք կարող է ունենալ գլխուղեղի ուռուցք: Սակայն գլխուղեղի ուռուցքների որոշ տեսակներ ավելի տարածված են որոշակի ռասայի մարդկանց մոտ: Օրինակ՝ գլիոմաներն ավելի հաճախ հանդիպում են սպիտակամորթ, իսկ մենինգիոմաները՝ սևամորթ մարդկանց մոտ:
  • Ճառագայթման ազդեցություն. մարդիկ, ովքեր ենթարկվել են ուժեղ տեսակի ճառագայթման, ունեն գլխուղեղի ուռուցքի ավելի բարձր ռիսկ: Այս ուժեղ ճառագայթումը կոչվում է իոնացնող ճառագայթում: Այսպիսի ճառագայթումը բավականաչափ ուժեղ է, որ օրգանիզմի բջիջներում առաջացնի ԴՆԹ-ի փոփոխություններ (մուտացիաներ), որոնք կարող են հանգեցնել ուռուցքների և քաղցկեղի: Իոնացնող ճառագայթման օրինակները ներառում են ճառագայթային թերապիան, որն օգտագործվում է քաղցկեղի բուժման համար և ատոմային ռումբերի պայթյունից առաջացող ճառագայթումը: Առօրյա առարկաների ցածր մակարդակի ճառագայթումը կապված չէ գլխուղեղի ուռուցքների հետ: Ճառագայթման ցածր մակարդակը ներառում է բջջային հեռախոսներից և ռադիոալիքներից ստացվող էներգիան: Չկա համոզիչ ապացույց, որ բջջային հեռախոսների օգտագործումն առաջացնում է գլխուղեղի ուռուցք, սակայն այս ուղղությամբ շարունակվում են իրականացվել բազամթիվ հետազոտություններ:
  • Ժառանգական համախտանիշներ, որոնք մեծացնում են գլխուղեղի ուռուցքի ռիսկը. ԴՆԹ-ի որոշ փոփոխություններ (մուտացիաներ), որոնք մեծացնում են ուղեղի ուռուցքի վտանգը, տեղ են գտնում որոշ ընտանիքներում: Օրինակները ներառում են՝ ԴՆԹ-ի մուտացիաներ, որոնք առաջացնում են նեյրոֆիբրոմատոզ 1 և 2, տուբերոզ սկլերոզ, Լինչի համախտանիշ, Լի-Ֆրաումենի համախտանիշ, Ֆոն Հիպել-Լինդաուի հիվանդություն, ընտանեկան ադենոմատոզ պոլիպոզ, Քոուդենի համախտանիշ և Գորլինի համախտանիշ:

Հոդվածը տեղադրվել է՝ 06-04-2023 վերանայվել է՝ 07-11-2023

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով