Ախտանիշներ - Գլխուղեղային ուռուցք

Գլխուղեղի ուռուցքի գանգատներն ու ախտանիշները կախված են ուռուցքի չափից և տեղակայումից:

Ախտանիշները նաև կարող են կախված լինել նրանից, թե որքան արագ է աճում գլխուղեղի ուռուցքը, որը նաև կոչվում է ուռուցքի ագրեսիվություն կամ ուռուցքի աստիճան:

Ընդհանուր գնգատները և ախտանիշները, որոնք առաջանում են գլխուղեղի ուռուցքներից, կարող են ներառել հետևյալը՝

• գլխացավ կամ ճնշում գլխում, որն ավելի է վատթարանում առավոտյան
• գլխացավեր, որոնք ավելի հաճախակի են առաջանում և ավելի սուր են թվում
• գլխացավեր, որոնք երբեմն նկարագրվում են որպես լարվածության գլխացավ կամ միգրեն
• սրտխառնոց կամ փսխում
• տեսողության հետ կապված խնդիրներ, ինչպիսիք են մշուշոտ տեսողությունը, երկտեսությունը կամ տեսողության կորուստը
• ձեռքի կամ ոտքի զգացողությունը կամ շարժունակության կորուստ
• հավասարակշռության հետ կապված խնդիրներ
• խոսքի հետ կապված խնդիրներ
• ծայրահեղ հոգնածության զգացում
• աօրյա հարցերում խառնաշփոթ
• հիշողության խնդիրներ
• պարզ հրահանգներին հետևելու անկարողություն
• անձնային կամ վարքի փոփոխություններ
• ցնցումներ, հատկապես եթե էպիլեպսիայի պատմություն (անամնեզ) չկա
• լսողության խնդիրներ
• գլխապտույտ կամ զգացում, որ կարծես աշխարհը պտտվում է, որը նաև կոչվում է վերտիգո
• խիստ քաղցի զգացում և քաշի ավելացում:

Գլխուղեղի ուռուցքները, որոնք քաղցկեղային չեն և նաև կոչվում են գլխուղեղի բարորակ ուռուցքներ, ավելի հաճախ առաջացնում են ախտանիշներ, որոնք դանդաղ են զարգանում: Դրանք կարող են առաջացնել թեթև ախտանիշներ, որոնք սկզբում կարող եք և չնկատել: Ախտանիշները կարող են վատթարանալ ամիսների կամ տարիների ընթացքում:

Գլխուղեղի քաղցկեղային ուռուցքներն առաջացնում են ախտանիշներ, որոնք արագորեն վատթարանում են: Գլխուղեղի քաղցկեղային ուռուցքները նաև կոչվում են գլխուղեղի քաղցկեղ կամ գլխուղեղի չարորակ ուռուցքներ: Դրանք հաճախ առաջացնում են հանկարծակի ի հայտ եկող ախտանիշներ: Դրանք վատթարանում են մի քանի օրվա կամ շաբաթվա ընթացքում:

Գլխուղեղի ուռուցքի գլխացավեր

Գլխացավը գլխուղեղի ուռուցքների ամենատարածված ախտանիշն է: Գլխացավ նշում են գլխուղեղի ուռուցք ունեցող մարդկանց մոտ կեսը: Գլխացավը կարող է առաջանալ, եթե գլխուղեղի աճող ուռուցքը ճնշում է իր շուրջը գտնվող առողջ բջիջները: Կամ ուղեղի ուռուցքը կարող է առաջացնել գլխուղեղի այտուց, որը մեծացնում է ճնշումը գլխում և հանգեցնում գլխացավի:

Գլխացավի ցավը, որն առաջանում է գլխուղեղի ուռուցքներից, հաճախ ավելի վատթարանում է, երբ առավոտյան արթնանում եք: Սակայն, դա կարող է տեղի ունենալ ցանկացած պահի: Որոշ մարդիկ քնից արթնանում են գլխացավերի պատճառով: Գլխուղեղի ուռուցքային գլխացավերը հակված են ցավ պատճառելու, որն ավելի է սաստկանում հազալիս կամ լարվելիս: Գլխուղեղի ուռուցք ունեցող մարդիկ առավել հաճախ նշում են, որ իրենց գլխացավը նման է լարվածության գլխացավին: Որոշ մարդիկ էլ իրենց գլխացավը նմանեցնում են միգրենին:

Գլխի ետին մասում գտնվող գլխուղեղի ուռուցքները կարող են առաջացնել պարանոցի ցավով ուղեկցվող գլխացավ: Եթե ​​գլխուղեղի ուռուցքն առաջանում է գլխի առջևի մասում, գլխացավը կարող է զգացվել որպես աչքի ցավ կամ հարքթային խոռոչների` սինուսային ցավ:

Գլխուղեղի ուռուցքի ախտանիշներն ըստ ուռուցքի տեղակայման

Գլխուղեղի հիմնական մասը կոչվում է ծայրային ուղեղ կամ մեծ կիսագնդեր (ցերեբրում): Գլխուղեղի տարբեր բաժինների գլխուղեղի ուռուցքները կարող են տարբեր ախտանիշներ առաջացնել:

• Գլխուղեղի առջևի (ճակատային շրջանի) ուռուցքներ. ճակատային բլթերը գտնվում են գլխուղեղի առջևի մասում: Դրանք վերահսկում են մտածողությունը և շարժումները: Ճակատային բլթի գլխուղեղային ուռուցքները կարող են առաջացնել հավասարակշռության խանգարումներ և քայլքի դժվարություններ: Կարող են նաև զարգանալ անձնային փոփոխություններ, ինչպիսիք են մոռացկոտությունը և սովորական գործունեության նկատմամբ հետաքրքրության կորուստը: Երբեմն ընտանիքի անդամները գլխուղեղի ուռուցք ունեցող անձի մոտ նկատում են վարքային փոփոխություններ:
• Գլխուղեղի միջին շրջանի ուռուցքներ. գագաթային բլթերը գտնվում են գլխուղեղի վերին միջին մասում։ Դրանք օգնում են հպման, համի, հոտի, տեսողության և լսողության մասին տեղեկատվության մշակմանը: Քունքային բլթի գլխուղեղային ուռուցքները կարող են առաջացնել զգայարանների հետ կապված խնդիրներ, օրինակ՝ տեսողության և լսողության խանգարումներ:
• Գլխուղեղի ետին շրջանի ուռուցքներ. ծոծրակային բլթերը գտնվում են գլխուղեղի ետին մասում: Դրանք վերահսկում են տեսողությունը: Ծոծրակային բլթի գլխուղեղային ուռուցքները կարող են առաջացնել տեսողության կորուստ:
• Գլխուղեղի ստորին շրջանի ուռուցքներ. քունքային բլթերը գտնվում են գլխուղեղի կողքում: Դրանք մշակում են հիշողություններն ու զգացողությունները: Քունքային բլթի գլխուղեղային ուռուցքները կարող են առաջացնել հիշողության հետ կապված խնդիրներ: Դրանք կարող են պատճառ դառնալ, որ ինչ-որ մեկը տեսնի, համտեսի կամ հոտոտի մի բան, որը գոյություն չունի (ցնորք կամ հալյուցինացիա): Երբեմն համը կամ հոտը դառնում են տհաճ կամ անսովոր:

Ախտանիշները երեխաների մոտ

Երեխաների մոտ գլխուղեղի ուռուցքների ախտանիշները կախված են նրանց տարիքից, ուռուցքի տեսակից ու տեղակայումից: Ավելի հաճախ երեխաների մոտ ի հայտ են գալիս անհասկանալի համառ գլխացավեր, կրկնակի փսխումներ, վարքային խանգարումներ և աչքերի ոչ նորմալ շարժունակություն:

Երեխաների մոտ գլխուղեղի ուռուցքները նաև կարող են առաջացնել ցնցումներ, որոնք կապ չունեն ջերմության հետ: Նման դեպքերում զանգեք 1-03 և կանչեք շտապ օգնություն:

Իմացե՛ք ավելին երեխաների մոտ գլխուղեղի ախտանիշների առանձնահատկությունների մասին:

Գլխուղեղի ուռուցքների բուժմամբ պատճառված ախտանիշներ

Վիրահատությունը, ճառագայթային թերապիան, քիմիոթերապիան կամ բուժման այլ մեթոդները նույնպես կարող են առաջացնել որոշ ախտանիշներ: Օրինակ, որպես կողմնակի ազդեցություն ճառագայթային թերապիան կարող է առաջացնել ստխառնոց և գլխացավեր, իսկ քիմիոթերապիան՝ փսխումներ, թուլության ու հոգնածության զգացում:

Ե՞րբ դիմել բժշկին

Պայմանավորվեք և այցելեք ձեր բժշկին, եթե ունեք մշտական ​​գանգատներ և ախտանիշներ, որոնք անհանգստացնում են ձեզ: Եթե անհանգստացած եք ձեր երեխայի մոտ գլխուղեղային որևէ հիվանդության հնարավոր առկայությունից, դիմեք ձեր երեխայի բժշկին: