Բուժում - Տակոցուբո

Կոտրված սրտի համախտանիշի կամ սթրեսային (տակոցուբո) կարդիոմիոպաթիայի ստանդարտ բուժում չկա:

Այն նման է սրտամկանի ինֆարկտի բուժմանը՝ մինչև ախտորոշումը պարզ լինի: Մարդկանց մեծամասնությունը ստանում է հիվանդանոցային բուժում:

Կոտրված սրտի համախտանիշ ունեցող բազմաթիվ մարդիկ լիարժեք ապաքինվում են մինչև մեկ-երկու ամսվա ընթացքում: Էխոսրտագրությունը կատարվում է առաջին ախտանիշներից մոտ 4-6 շաբաթ հետո՝ համոզվելու, որ սիրտն ավելի լավ է կծկվում: Երբեմն, կոտրված սրտի համախտանիշը կրկնվում է բուժումից հետո:

Դեղորայքային բուժում

Երբ հաստատվում է, որ ախտանիշների պատճառը կոտրված սրտի համախտանիշն է, կարող են նշանակվել դեղամիջոցներ սրտի վրա լարվածությունը նվազեցնելու համար: Դեղորայքը նաև կարող է օգնել կանխել հիվանդության ապագա դրվագները:

Դեղորայքը կարող է ներառել հետևյալը՝

• անգիոտենզին-փոխակերպող ֆերմենտի (ԱՓՖ) արգելակիչներ կամ ինհիբիտորներ
• անգիոտենզին 2 ընկալիչի պաշարիչներ
• բետա-բլոկերներ (բետա պաշարիչներ)
• միզամուղներ
• արյունը ջրիկացնող (հակամակարդիչ) դեղամիջոցներ, եթե առկա է արյան մակարդուկ (թրոմբ) կամ այն առաջանալու ռիսկ:

Սթրեսային իրավիճակների կառավարումը հետագայում կարող է օգնել նոր դրվագների առաջացմանը:

Վիրահատություններ կամ այլ միջամտություններ

Սրտամկանի ինֆարկտի բուժման մեջ հաճախ օգտագործվող վիրահատությունները և միջամտությունները կոտրված սրտի համախտանիշի բուժման համար օգտակար չեն: Նման բուժումների նպատակը խցանված պսակային զարկերակները բացելն է: Խցանված պսակային զարկերակները չեն առաջացնում կոտրված սրտի համախտանիշ: