Սուր և քրոնիկ բրոնխիտներն ունեն առաջացման տարբեր պատճառներ:
- Սուր բրոնխիտը սովորաբար պատճառվում է վիրուսներով, ավելի հաճախ՝ նույն այն վիրուսներով, որոնք առաջացնում են ընդհանուր մրսածություն (սուր շնչառական վիրուսային վարակ, ՍՇՎՎ) և գրիպ։ Հակաբիոտիկները չեն ոչնչացնում վիրուսներին, ուստի դեղամիջոցների այս տեսակը բրոնխիտների մեծ մասի համար անօգուտ է:
- Քրոնիկ բրոնխիտի ամենատարածված պատճառը ծխախոտ ծխելն է: Օդի աղտոտվածությունը և փոշին կամ շրջակա միջավայրում կամ աշխատավայրում առկա թունավոր գազերը նույնպես կարող են նպաստել հիվանդության զարգացմանը:
Ռիսկի գործոններ
Բրոնխիտով հիվանդանալու ձեր ռիսկը կարող են բարձրացնել հետևյալ գործոնները:
- Ծխախոտի ծուխ. ծխող կամ ծխող մարդու հետ ապրող մարդիկ ենթարկվում են ինչպես սուր, այնպես էլ քրոնիկ բրոնխիտով հիվանդանալու ավելի բարձր ռիսկի:
- Ցածր դիմադրողականություն. սա կարող է առաջանալ մեկ այլ սուր հիվանդությունից, օրինակ՝ ընդհանուր մրսածությունից կամ քրոնիկ հիվանդությունից, որոնք թուլացնում են ձեր իմունային համակարգը: Տարեց չափահասները, նորածիններն ու մանկահասակ երեխաներն ունեն վարակի նկատմամբ ավելի մեծ խոցելիություն։
- Աշխատավայրում գրգռիչների ազդեցություն. բրոնխիտի զարգացման ռիսկն ավելի մեծ է, եթե աշխատում եք թոքային գրգռիչներով հարուստ միջավայրում, ինչպիսիք են ձավարեղենի արտադրամասերը կամ տեքստիլ արտադրությունը, կամ ենթարկվում եք քիմիական գոլորշիների ազդեցությանը:
- Ստամոքսային ռեֆլյուքս. սուր այրոցքի կրկնվող դրվագները կարող են գրգռել ձեր կոկորդը և ձեզ ավելի հակված դարձնել բրոնխիտի զարգացման նկատմամբ:
Հոդվածը հրապարակվել է՝ 04-04-2021
Վերջին վերանայում՝ 22-04-2024