Արգանդի պարանոցի քաղցկեղ. պատճառներ

Արգանդի պարանոցի քաղցկեղ. պատճառներ

Արգանդի պարանոցի (վզիկի) քաղցկեղի պատճառները լիարժեք բացահայտված չեն, սակայն հայտնի են այն գործոնները, որոնք կարող են զգալի կերպով բարձրացնել հիվանդության զարգացման ռիսկը։

Օրինակ, կան ապացուցված տվյալներ այն մասին, որ վիրուսների որոշ տեսակներով քրոնիկ վարակը կարող է դառնալ վզիկի քաղցկեղի պատճառ։ Եթե պապ թեստով ստացվում է «դրական», այն է՝ ոչ նորմալ պատասխան, ապա գրեթե միշտ հայտնաբերվում է նաև մարդու պապիլոմավիրուս (ՄՊՎ, անգլերեն՝ HPV):

Սեռական կյանքով ապրած յուրաքանչյուր մարդու մոտ կարող է հայտնաբերվել ՄՊՎ։ Վերջինս շատ տարածված է և կարող է կյանքի որոշակի շրջանում հայտնաբերվել յուրաքանչյուր 5 մարդուց 4-ի մոտ։ Դեպքերի մեծ մասում ՄՊՎ-ը «ինքնամաքրվում» է երեք տարվա ընթացքում։ Հազվադեպ, եթե վիրուսը պահպանվում և մնում է չհայտնաբերված, կարող է զարգանալ արգանդի պարանոցի քաղցկեղ։ ՄՊՎ-ի պատճառով քաղցկեղային հիվանդությունը սովորաբար զարգանում է շուրջ 10 տարվա ընթացքում։

Այնուամենայնիվ, լինելով շատ տարածված, ՄՊՎ-ն միայն սակավաթիվ կանանց մոտ է առաջացնում արգանդի վզիկի քաղցկեղ։

Հոդվածը վերանայվել է՝ 02-02-2021