Արգանդի պարանոցի քաղցկեղ. ախտորոշում

Արգանդի պարանոցի քաղցկեղ. ախտորոշում

Արգանդի պարանոցի քաղցկեղի ախտորոշման ընթացքում բժիշկը կարող է նշանակել մի շարք հետազոտություններ։

Նման ախտորոշիչ հետազոտությունների անհրաժեշտությունը ծագում է հատկապես այն դեպքերում, երբ, ելնելով արգանդի վզիկի քաղցկեղի սքրինինգային «դրական»՝ շեղված պատասխանից և առկա գանգատներից, բժիշկը ձեզ մոտ կասկածում է արգանդի պարանոցի քաղցկեղի կամ նախաքաղցկեղային վիճակի առկայություն։ Հետազոտություններն օգնում են բժշկին, որ նա հաստատի կամ ժխտի ձեզ մոտ քաղցկեղային հիվանդության առկայությունը, ինչպես նաև ախտորոշումը հաստատվելու դեպքում ընտրել հիվանդին համապատասխանող լագագույն բուժման տարբերակը։

Կոլպոսկոպիա

Արգանդի պարանոցի քաղցկեղի կասկածով կանանց մեծ մասին առաջարկվում է կոլպոսկոպիա։ Կոլպոսկոպը նման է մեծ մանրադիտակի, որի միջոցով բժիշկը զննում է կնոջ արգանդի պարանոցի լորձաթաղանթի խոշորացված տեսքը և կարողանում հայտնաբերել վերջինիս լորձաթաղանթի հնարավոր փոփոխությունները։

Կոլպոսկոպիկ հետազոտության ընթացքում բժիշկը կարող է նաև կատարել պարանոցի հյուսվածքի փոքր հատվածի նմուշառում (բիոպսիա):

Բիոպսիա

Բիոպսիան բժշկական միջամտություն է, որի ժամանակ հետազոտվող օրգանից նմուշառվում է հյուսվածքային փոքր հատված և ուղարկվում լաբորատոր բջջաբանական կամ հյուսվածաբանական հետազոտության։ Հյուսվածքի կտորը նմուշառելու պահին դուք կարող եք զգալ կարճատև ցավ կամ ունենալ անհարմարության զգացում (դիսկոմֆորտ)։

Բիոպսիան սովորաբար կատարվում է զննման սենյակում կամ հիվանդանոցային պայմաններում։ Լաբորատոր հետազոտության արդյունքները սովորաբար ստացվում են մինչև մեկ շաբաթվա ընթացքում։

Արգանդի պարանոցի բիոպսիային հաջորդող վարակային բարդություններից խուսափելու համար անհրաժեշտ է առնվազն մի քանի օր խուսափել սեռական հարաբերություններից կամ տամպոնների օգտագործումից։

Այլ թեստեր

Եթե բիոպսիայով արգանդի պարանոցի քաղցկեղի ախտորոշումը հաստատվում է, բժիշկը կարող է նշանակել այլ հետազոտություններ, որոնց նպատակը քաղցկեղային «օջախի» տարածման չափերը գնահատելն է և հեռավոր մետաստազներ հայտնաբերելը։ Այս տվյալները բժիշկը կարող է օգտագործել հիվանդության ծանրության աստիճանը կամ փուլը որոշելու համար, որից ելնելով էլ նա կարող է որոշել, թե բուժման որ մեթոդը կարող է տվյալ դեպքում լինել ձեզ համար ամենահարմարը և ամենաարդյունավետը։

Ի՞նչ կարելի է անել ախտորոշվելուց հետո

Եթե պարանոցի քաղցկեղն ախտորոշվում է զարգացման վաղ փուլերում, այն սովորաբար հնարավոր է լինում բուժել՝ դիմելով առաջին հերթին վիրահատության։ Նման դեպքերում կատարվում է ամբողջական արգանդի հեռացում (հիստերէկտոմիա) կամ, ավելի հազվադեպ, միայն արգանդի պարանոցի հեռացում։ Որպես այլընտրանք, պարանոցի քաղցկեղի վաղ փուլերում կարող է առաջարկվել նաև ճառագայթային բուժում։

Հոդվածը վերանայվել է՝ 16-06-2019