Արգանդի պարանոցի քաղցկեղ. ախտանիշներ

Արգանդի պարանոցի քաղցկեղ. ախտանիշներ

Արգանդի պարանոցի (վզիկի) քաղցկեղի նշանները ոչ միշտ են ցայտուն տարբերակելի և ոչ միշտ է այս հիվանդությունն իր զարգացման վաղ փուլերում դրսևորում որևէ լուրջ գանգատ:

Սովորաբար պարանոցի քաղցկեղի բնորոշ ախտանիշներն ի հայտ են գալիս և սկսում են անհանգստացնող բնույթ կրել հիվանդության ավելի ուշ փուլերում:

Արտասովոր հեշտոցայի արյունահոսություն

Դեպքերի մեծ մասի ժամանակ հեշտոցային արյունահոսությունը կամ արյունային արտադրուկը արգանդի վզիկի քաղցկեղի ուշադրության արժանի առաջին գանգատներն են: Դրանք սովորաբար հայտնաբերվում են սեռական հարաբերությունից հետո (կոչվում է նաև պոստ-կոիտալ արյունահոսություն):

Ընդհանուր առմամբ, դաշտանային ցիկլից դուրս մյուս բոլոր հեշտոցային արյունահոսությունները կարելի է դիտարկել որպես «արտասովոր» կամ շեղված:

Նմանատիպ «չակնկալված» արյունահոսությունը կարող է առաջանալ նաև դաշտանադադարից հետո (երբ կնոջ դաշտանները պետք է այլևս չլինեին):

Բոլոր դեպքերում, երբ ձեզ մոտ առկա է «արտասովոր» կամ «չակնկալված» հեշտոցային արյունահոսություն, առանց ուշացնելու դիմեք ձեր բժշկին:

Երբեմն արյունահոսության փոխարեն կարող է գրանցվել արյունային արտադրություն, որը նույնպես բժշկին այցելելու առիթ է:

Արգանդի պարանոցի քաղցկեղի այլ ախտանիշները

Պարանոցի քաղցկեղի մյուս նշանները կարող են ներառել՝

  • ցավոտ սեռական հարաբերություն, երբ սեռական ակտից հետո առաջանում են հեշտոցի և հարակից շրջանների ցավ կամ անախորժ զգացողություններ
  • տհաճ հոտով հեշտոցային արտադրուկ
  • միզարձակությանն ուղեկցող ցավեր:

Պարանոցի քաղցկեղի ուշ շրջանի ախտանիշներ

Եթե քաղցկեղը արգանդի պարանոցից տարածվում է դեպի հարակից օրգաններ և հյուսվածքներ, հիվանդության նշանները դառնում են ավելի արտահայտված: Նման դեպքերում զարգացող ախտանիշները կախված են լինում այն հանգամանքից, թե որ օրգաններում է ներաճել քաղցկեղը: Պարանոցի քաղցկեղի ուշացած գանգատները և նշանները կարող են ներառել՝

  • փորկապություն
  • արյունամիզություն (հեմատուրիա)
  • միզելու նկատմամբ հսկողության կորուստ (անմիզապահություն)
  • ոսկրային ցավեր
  • գոտկային ցավեր
  • ոտքերից մեկնումեկի այտուցվածություն
  • երիկամային ցավեր
  • աղիների գործունեության սովորույթի փոփոխություններ
  • ախորժակի անկում
  • մարմնի կշռի անկում
  • ընդհանուր թուլություն և աշխատունակության անկում:

Ե՞րբ դիմել բժշկին

Խորհուրդ է տրվում այցելել ձեր բժշկին, եթե ձեզ մոտ առկա են հետևյալ գանգատները՝

  • սեռական հարաբերությանը հաջորդող (պոստ-կոնիտալ) արյունահոսություն
  • նորմալ դաշտանից դուրս արյունահոսություններ
  • դաշտանադադարից հետո ի հայտ եկող արյունահոսություններ։

Հեշտոցային արյունահոսությունը շատ տարածված է և կարող է զարգանալ բազմաթիվ պատճառներից։ Եթե ձեզ մոտ նկատել եք ոչ նորմալ արյունահոսություն կամ արյունային արտադրուկ, դեռ չի նշանակում, որ ձեզ մոտ առկա է արգանդի պարանոցի քաղցկեղ։

Այունամենայնիվ, արտասովոր հեշտոցային արյունահոսության ցանկացած դրվագ ունենալիս դուք պետք է դիմեք ձեր բժշկին։

Հոդվածը վերանայվել է՝ 02-02-2021