Քլամիդիա. ախտանիշներ

Քլամիդիա. ախտանիշներ

Քլամիդիայի մեծ խնդիրը առանց գանգատների ընթացքն է, որի պատճառով վարակված անձինք մնում են չախտորոշված։

Արդյունքում, քլամիդիայով հիվանդները սեռական ճանապարհով կարող են վարակել իրենց սեռական զուգընկերներին։

Ավելին, անախտանիշ ընթացող քլամիդիան տարիներ անց կարող է հանգեցնել լուրջ բարդությունների։

Եթե, այնուամենայնիվ, քլամիդիայի ախտանիշները զարգանում են, դրանք ի հայտ են գալիս վարակված անձի հետ սեռական հարաբերություն ունենալուց մի քանի շաբաթ անց։

Վարակված կանանց մոտ կարող են զարգանալ դաշտանային ցիկլի տարբեր խանգարումներ, հեշտոցից մեղմ արյունահոսություն կամ ցավ սեռական հարաբերության ընթացքում կամ դրանից հետո, միզելիս ցավեր (դիզուրիա), երբեմն՝ թույլ ցավեր վերցայլքային շրջանում և հեշտոցային արտադրություն։ Չբուժվելու դեպքում քլամիդիայով վարակված կանանց մոտ կարող են զարգանալ որոշ բարդություններ։

Քլամիդիայով հիվանդ հղի կանայք ծննդաբերության ընթացքում կարող են վարակը փոխանցել նորածնին, ինչը վերջինիս մոտ կարող է զարգացնել կոնյուկտիվիտ (աչքի շաղկապենու բորբոքում) և թոքաբորբ։

Քլամիդիայով վարակված տղամարդկանց մոտ կարող են զարգանալ ամորձիների այտուցվածություն և ցավ, արտադրություն միզուկից, միզարձակության դժվարացում կամ ցավոտություն (դիզուրիա)։

Chlamydia trachomatis-ը նաև կարող է վարակել ուղիղ աղիքը (ռեկտում)՝ ընթանալով անախտանիշ կամ առաջացնելով ցավեր, արտադրություն կամ արյունահոսություն:

Ե՞րբ դիմել բժշկին

Այցելեք ձեր բժշկին, եթե ունեք արտադրություն հեշտոցից, առնանդամից կամ ուղիղ աղիքից (հետանցքից) կամ եթե նշում եք միզելիս ցավեր: Դիմեք նաև բժշկին, եթե տեղեկացել եք, որ ձեր սեռական զուգընկներն ունի քլամիդիա: Բժիշկը կարող է նշանակել հակաբիոտիկ նույնիսկ որևէ ախտանիշի բացակայության դեպքում:

Հոդվածը վերանայվել է՝ 31-03-2021