Ինքնօգնություն - Հաստ աղիքի քաղցկեղ

​Եթե կոլոռեկտալ քաղցկեղի ախտորոշումը հաստատվելուց հետո ձեր հաստ աղիքի մի մասը հեռացրել են, շատ հավանական է, որ վիրահատությունից հետո ձեր աղիների գործունեությունը խանգարվի:

Օրինակ, դուք կարող եք նշել, որ ձեր կղանքային պարունակությունը դարձել է ավելի ջրիկ: Պատճառն այն է, որ ձեր մնացած հաստ աղիքը, կարճանալով, ավելի քիչ քանակությամբ ջուր կարող է ներծծել:

Սա նշանակում է, որ հաստ աղիքի մասնահատումից հետո դուք կարող եք ունենալ փորլուծության կամ զուգարանից շտապ օգտվելու ցանկության կրկնվող դրվագներ:

Եթե փորլուծությունը ձեզ համար դառնում է խնդրահարույց, տեղեկացրեք այդ մասին ձեր բժիշկներին, քանի որ կան դեղեր, որոնք կարող են մեղմացնել ձեր ախտանիշները:

Դուք նաև կարող եք զգալ, որ վիրահատությունից հետո առաջին մի քանի ամսվա ընթացքում որոշ սննդատեսակներ նպաստում են փորլուծության կամ աղիների գործունեության հետ կապված այլ գանգատների առաջացմանը կամ վատթարացմանը: Այս առումով, խնդրահարույց կարող են դառնալ հետևյալ մթերքները՝

• բջջանքով (բջջանյութով) հարուստ մրգեր և բանջարեղեններ, օրինակ՝ լոբի, կաղամբ, խնձոր և բանան
• գազալցված ըմպելիքներ և գարեջուր:

Նման դեպքերում խորհուրդ է տրվում ժամանակավորապես սահմանափակել ձեր սննդակարգում բջջանքի չափաբաժինը: Բջջանքից աղքատ կարող են լինել՝

• սպիտակ հացամթերքները և սպիտակ ալյուրից պատրաստված արտադրանքները (օրինակ՝ հրուշակեղեն)
• կրեմային կրեկերներ
• թեյի թխվածքաբլիթներ
• եգիպտացորների շիլա կամ փաթիլներ
• լավ եփված և կեղևազերծված բանջարեղեններ և մրգեր:

Օգտակար կարող են լինել նաև հետևյալ խորհուրդները՝

• խմեք առատ հեղուկներ՝ օրական առնվազն 1,5-2 լիտր
• կրճատեք օրվա ընթացքում խմվող սուրճի քանակը, քանի որ կոֆեինը կարող է խթանել աղիների գործունեությունը և վատթարացնել փորկապությունը
• կերեք փոքր չափաբաժիններով և մինչև կուլ տալը լավ ծամեք սնունդը
• անանուխի ջուրը կարող է օգնել կուտակված գազերի հեռացմանը և թեթևացնել աղիների փքվածությամբ պատճառված անհարմարավետության զգացումը:

Օգտակար կարող է լինել, եթե դուք պահեք ձեր սննդի օրագիր և գրանցեք տարբեր մթերքների ազդեցությունը ձեր աղիների գործունեության վրա:

Եթե կարծում եք, որ վիրահատությունից հետո ձեր աղիների հետ կապված խնդիրները երկարաձգվում են կամ չեք կարողանում լիովին պահպանել առողջ սննդակարգ, դիմեք ձեր բժշկին: Անհրաժեշտության դեպքում, ձեզ կարող է խորհուրդներ տալ նաև դիետոլոգը: