Ցիստիտ. ինքնօգնություն

Ցիստիտ. ինքնօգնություն

Ցիստիտը սովորաբար ընթանում է միզարձակության հետ կապված գանգատներով:

Դուք կարող եք նշել միզելու ուժեղ մշտական ցանկություն, միզելու ավարտին այրոցի զգացում կամ ցավեր (կոչվում է «դիզուրիա»), հաճախամիզություն և զուգարան գնալիս մեզի միայն փոքր քանակների միզում: Որոշ դեպքերում ձեր որովայնի ստորին շրջաններում կարող են հայտնվել մշտական բութ ցավեր, որոնք կուժեղանան միզելիս:

Ցիստիտը բուժելիս բժիշկը կնշանակի ձեր վիճակի համար ընտրված որևէ հակաբիոտիկ և կառաջարկի, որ մի քանի օր դուք գտնվեք հանգիստ պայմաններում (ցանկալի է՝ անկողնային ռեժիմ):

Մինչև այս բուժումը կմեղմացնի ձեր գանգատները, դուք ինքներդ կարող եք օգնել հիվանդության արագ լավացմանը:

Ահա մի քանի օգտակար խորհուրդներ:

  • խմեք առատ հեղուկներ (ջուր)՝ օրական մինչև 10-14 բաժակ
  • հիմնայնացրեք ձեր մեզը՝ օրվա ընթացքում մի քանի անգամ խմելով թույլ սոդայաջուր (1 թեյի գդալ կերակրի սոդան լուծեք 1 լիտր ջրում) կամ կարող եք դեղատնից գնել սոդա (բիկարբոնատ) պարունակող և մեզը հիմնայնացնող հաբեր
  • ընդունեք տաք լոգանք, պառկեք տաք անկողնում, օգտագործեք ջեռակ (որովայնին կամ մեջքին), եթե չունեք ջերմության բարձրացում
  • կրճատեք միզամուղ ազդեցությամբ և միզապարկը գրգռող հեղուկների ընդունումը՝ թեյ, սուրճ և ալկոհոլային խմիչքներ
  • սաստիկ ցավերը մեղմացնելու համար կարող եք ընդունել սովորական ցավամոքիչ դեղեր:

Հոդվածը վերանայվել է՝ 07-04-2021