Ջրազրկում. պատճառներ

Ջրազրկում. պատճառներ

Երբեմն ձեր օրգանիզմը ջրազրկվում է հասարակ պատճառներով, օրինակ՝ չեք խմում բավարար քանակով հեղուկներ, քանի որ վատառողջ եք, խիստ զբաղված եք կամ ճանապարհորդելիս կամ արշավի ընթացքում չունեք անվտանգ խմելու ջրի պաշարներ:

Ջրազրկման այլ պատառճները ներկայացված են ստորև:

  • Փորլուծություն և փսխում. սուր և ծանր փորլուծությունը (որն ի հայտ է գալիս հանկարծակի և ստանում ուժեղ բնույթ) կարող է կարճ ժամանակի ընթացքում առաջացնել ջրի և էլեկտրոլիտների մեծ կորուստ: Եթե փորլուծությունն ուղեկցվում է փսխումներով, դուք կորցվնում եք ավելի մեծ քանակով հեղուկներ և միներալներ: Այսպիսի ջրազրկումը վտանգավոր է հատկապես մանկահասակ տարիքի երեխաների համար:
  • Բարձր ջերմություն և տենդ. ընդհանուր առմամբ, որքան բարձր է ձեր մարմնի ջերմաստիճանը, այդքան ավելի եք ջրազրկվում: Խնդիրն ավելի է վատթարանում, երբ բարձր ջերմության և տենդի հետ մեկտեղ ունեք նաև փորլուծության և փսխում: Բարձր ջերմությունը ջրազրկման պատճառ կարող է դառնալ հատկապես մանկահասակ տարիքի երեխաների մոտ:
  • Առատ քրտնարտադրություն. քրտնելիս դուք կորցնում եք ջուր: Երբ զբաղված եք բարձրացած քրտնարտադրության բերող ֆիզիկական գործով և ընթացքում կորցրած հեղուկները չեք լրացնում (ջուր կամ հեղուկներ չեք խմում), ապա կարող եք ջրազրկվել: Շոգ և խոնավ եղանակը կարող է բարձրացնել քրտնարտադրության չափը և կորցրած հեղուկների քանակը:
  • Բարձրացած միզարձակություն. սա կարող է ի հայտ գալ չախտորոշված կամ չվերահսկվող դիաբետի դեպքում (շաքարախտ)։ Որոշ դեղամիջոցներ, օրինակ՝ միզամուղները և բարձր ճնշման դեղերը, նույնպես կարող են բերել ջրազրկման, քանի որ առաջացնում են հաճախամիզություն:

Ջրազրկում կարող է զարգանալ նաև հետևյալ դեպքերում՝

Ռիսկի գործոններ

Բոլորն էլ կարող են ջրազրկվել, սակայն ախտաբանական ջրազրկումն ավելի արագ զարգանում է մարդկանց որոշ խմբերում:

  • Նորածիններ և երեխաներ. սուր փորլուծություն և փսխումներ ունեցող և ջրազրկման նկատմամբ առավել «խոցելի» ամենահավանական խումբը նորածին և մանկահասակ տարիքի երեխաներն են: Երեխաները նաև հեղուկների ավելի մեծ չափաբաժինների կորուստ են ունենում բարձր ջերմության կամ այրվածքների ժամանակ: Նրանք հաճախ չեն կարող ասել կամ ցույց տալ, որ ծարավ են կամ չեն կարող ինքնուրույն հեղուկներ ընդունել:
  • Մեծ տարիքի չափահասներ. տարիքին զուգահեռ օրգանիզմում հեղուկի պաշարները հյուծվում են, ջրի պահուստավորման ունակությունը նվազում է, իսկ ծարավի զգացողությունը՝ թուլանում: Այս խնդիրներն ավելի են խորանում որոշ դեղամիջոցներ օգտագործելիս կամ քրոնիկ հիվանդությունների ժամանակ (օրինակ՝ դիաբետ և դեմենցիա): Մեծ տարիքի չափահաս մարդիկ նաև կարող են ունենալ շարժունակության խնդիրներ, որը սահմանափակում է ինքնուրույն ջուր գտնելու և խմելու հնարավորությունը:
  • Քրոնիկ հիվանդություններով մարդիկ. չվերահսկվող կամ բուժումից դուրս մնացած դիաբետը բարձրացնում է ջրազրկման ռիսկը: Միզարձակումը խթանող դեղամիջոցները և երիկամային հիվանդությունը նույնպես բարձրացնում են ձեր ռիսկը: Նույնիսկ սովորական մրսածությունը կարող է քրոնիկ հիվանդություններով մարդկանց դարձնել ջրազրկման նկատմամբ ավելի «խոցելի», հատկապես, երբ ընթանում է ինքնազգացողության, ախորժակի և ծարավի զգացողության վատթարացմամբ:
  • Դրսում աշխատող կամ վարժանքներ կատարող մարդիկ. երբ դրսում տոթ և խոնավ է, ջրազրկման և ջերմային հիվանդությունների ռիսկը բարձրանում է: Օդի բարձր խոնավության պայմաններում քրտինքը չի հասցնում բավարար չափով գոլորշիանալ և հովացնել ձեր մարմինը, որը կարող է բերել մարմնի ջերմաստիճանի բարձրացման և հեղուկների ավելի մեծ քանակների պահանջարկի:

Հոդվածը վերանայվել է՝ 10-05-2021