Ախտանիշներ - Ծծմբային խցան

Արտաքին լսողական անցուղում ականջի ծծմբի (ականջագեջ) չափազանց մեծ քանակության կուտակումը կարող է առաջացնել անհարմարավետություն և այլ խնդիրներ:

Ականջի ծծմբային խցանի գանգատներն ու ախտանիշները կարող են ներառել հետևյալը:

• ականջի ցավ
• ականջի մեջ լցվածության զգացում
• ականջում զնգոց կամ աղմուկներ (տինիտուս)
• ծանրալսություն կամ լսողության կորուստ
• գլխապտույտ
• հազ
• քոր ականջի մեջ
• ականջից հոտ կամ արտադրություն
• ցավ կամ վարակ ականջի մեջ:

Ե՞րբ դիմել բժշկին

Ականջի ծծմբի խցանումը, որը չունի ախտանիշներ, երբեմն կարող է ինքնուրույն վերանալ: Այնուամենայնիվ, եթե ունեք ականջի ծծմբային խցանի գանգատներ և ախտանիշներ, խոսեք ձեր բժշկի հետ:

Գանգատներն ու ախտանիշները կարող են վկայել մեկ այլ վիճակի մասին: Ոչ մի կերպ հնարավոր չէ իմանալ, թե արդյոք դուք ունեք չափազանց շատ ականջի ծծումբ (ականջագեջ), քանի դեռ ձեր բժիշկը չի զննել (դիտել) ձեր արտաքին լսողական անցուղիները: Գանգատներ և ախտանիշներ ունենալը, ինչպիսիք են ականջի ցավը կամ լսողության կորուստը, միշտ չէ, որ նշանակում է, որ դուք ունեք ականջի ծծմբի կուտակում կամ ծծմբախցան: Դուք կարող եք ունենալ մեկ այլ առողջական խնդիր, որն ուշադրության և բուժման կարիք ունի:

Ծծմբախցանի հեռացումն ամենաանվտանգ կերպով կատարվում է բուժաշխատողի կողմից: Ձեր արտաքին լսողական անցուղին և թմբկաթաղանթը նուրբ են և կարող են հեշտությամբ վնասվել: Մի՛ փորձեք ինքներդ հեռացնել ականջի ծծումբը` ականջի անցուղու մեջ որևէ բարակ, առավել ևս՝ սրածայր բան մտցնելով, հատկապես, եթե ականջի վիրահատության եք ենթարկվել, ունեք ականջի թմբկաթաղանթի անցք (պերֆորացիա), ականջի ցավ կամ արտադրություն:

Երեխաների ականջները սովորաբար ստուգվում են բժշկական այցերի ժամանակ: Անհրաժեշտության դեպքում բժիշկը կարող է ձեր երեխայի ականջի ավելցուկային ծծումբը հեռացնել հերթական այցելության ժամանակ: