Ալերգիա ձվից (հավկիթից)

4 րոպե

Ձվից կամ հավկիթից ալերգիան երեխաների շրջանում գրանցվող ալերգիաների ամենատարածված տեսակն է:

Այն սովորաբար ի հայտ է գալիս երեխայի փոքր տարիքում։ Բարեբախտաբար, երեխաների մեծ մասը հաղթարում է ալերգիայի այս տեսակը մինչև դպրոցական տարիքին հասնելը: Այնուամենայնիվ, քանի դեռ երեխայի մոտ ձվից կամ ձու պարունակող սննդատեսակներից առաջանում են ալերգիայի ախտանիշներ, պետք է նրա սննակարգից բացառել դրանք:

Ձվի ո՞ր բաղադրիչն է առաջացնում ալերգիա

Տիպիկ դեպքերում ալերգիկ ռեակցիաները պատճառվում են ձվի սպիտակուցից, սակայն ձվի դեղնուցը նույնպես կարող է հանդես գալ որպես ալերգեն:

Քիչ թվով երեխաների մոտ ավելի հավանական է, որ հում, քիչ խաշած կամ թվածքներում առկա քիչ քանակությամբ ձուն առաջացնի ալերգիկ ռեակցիա: Սակայն, ձվից ալերգիա ունեցող երեխաների համար սնունդ գնելիս կամ պատրաստելիս ավելի անվտանգ է խուսափել ձու պարունակող բոլոր սննդատեսակներից:

Նորածիններին ձու տալը

Հնուց եկած վարկած կա, որ նորածիններին ձվից և համանման «ալերգիկ» սննդամթերքներից հեռու պահելը կարող է օգնել ալերգիաների կանխարգելմանը, որը, սակայն, հետազոտություններով չի հաստատվում: Նորածնի արդեն 6 ամսական տարիքում, եթե շարունակվում է կրծքի կաթով կերակրումը, պետք է սկսել տարբեր տեսակի մթերքների, այդ թվում՝ եփած ձվի փորձարկումը: Շատ կարևոր է, որ երեխային տաք եփած ձու, քանի որ հում ձուն կարող է պարունակել բակտերիաներ:

Ինչպես բոլոր նոր սննդամթերքների, այնպես էլ ձվի դեպքում ավելի լավ է եփած ձուն փորձել առանց որևէ այլ սննդամթերքի կամ, ծայրահեղ դեպքում, երեխային արդեն հայտնի սննդատեսակների հետ միասին: Նման դեպքում կարող եք հեշտությամբ արձանագրել որևէ կողմնակի ռեակցիան, որը կարող է վկայել ալերգիկ ռեակցիայի մասին։

Ձվից ալերգիայի ախտանիշները

Ձվից ալերգիայի նշանները սովորաբար սկսվում են ձու կամ ձու պարունակող մթերք ընդունելուց րոպեներ հետո: Երբեմն ալերգիայի նշանները կարող են հետաձգվել մինչև մի քանի ժամ:

Թեթև ախտանիշներից են՝

• եղնջացան (ալերգիկ եղնջայտուց)
• դեմքի, շրթունքների կամ կոպերի այտուցվածություն
• քթի փակվածություն, քթահոսություն կամ փռշտոց (ալերգիկ հարբուխ)
• բերանում ծակծկոցներ
• մարսողական խնդիրներ՝ որովայնային կծկանքներ, սրտխառնոց կամ փսխում:

Ավելի ծանր դեպքերում կարող են զարգանալ ասթմայի նոպա հիշեցնող անաֆիլաքսիայի նշաններ, այդ թվում՝

• դժվարացած շնչառություն կամ սուր շնչարգելություն և հևոց
• լեզվի կամ ըմպան-կոկորդի այտուց
• ձայնի խռպոտում կամ խոսքի դժվարացում
• շնչելիս խզզոցներ կամ կայուն հազ
• մաշկային ծածկույթների գունատություն և կպչուն քրտինք
• գլխապտույտ կամ արյան ճնշման կտրուկ անկում (կոլապս):

Եթե ձեր երեխայի կամ որևէ մեկ այլ մարդու մոտ առաջացել են ծանր ալերգիայի նշաններ, անհապաղ զանգեք 1-03 և կանչեք շտապ օգնություն:

Ձվից ալերգիայի ախտորոշումը

Եթե կասկածում եք, որ ձեր երեխայի մոտ զարգացել է ձվից ալերգիա, անմիջապես կապ հաստատեք նրա բժշկի հետ: Որոշ արյան թեստեր կարող են հայտնաբերել ալերգիկ ռեակցիայի պատճառը (կոչվում են ալերգիկ թեստեր): Մի՛ հավատացեք առցանց կամ ոչ պատշաճ բժշկական կրթությամբ մարդկանց կողմից առաջարկվող այլ ախտորոշիչ մեթոդներին:

Բազմաթիվ երեխաներ տարիքի հետ ձերբազատվում են ձվից զարգացող ալերգիայից: Եթե ցանկանում եք ճշտել, թե երեխայի մոտ դեռևս առկա է, թե անհետացել է ձվից ալերգիան, հանդիպեք ձեր բժշկին և քննարկեք ալերգիկ թեստ անցկացնելու նպատակահարմարությունը:

Մթերքներ, որոնք կարող են պարունակել ձու

Փաթեթավորված մթերքների պիտակներում, որպես կանոն, թվարկված են բոլոր սննդային բաղադրիչները, այդ թվում՝ ձվի կամ դրա առանձին մասերի առկայությունը և քանակները: Ուստի, միշտ ստուգեք սննդային արտադրանքի պիտակը, հատկապես, եթե պատրաստվում եք գնել որևէ բան, որը նախկինում ձեր երեխան չի օգտագործել:

Կարևոր է իմանալ, որ սննդամթերքի պիտակում որպես բաղադրիչ կարող է ոչ թե ուղղակիորեն նշված լինել ձու, այլ դրանում պարունակվող սպիտակուցները, օրինակ՝ ալբումին, գլոբուլին, լեյցիտին, լիվետին, լիզոզիմ, վիտելին, «օվա» կամ «օվո» նախածանցներով սկսվող բառեր (օրինակ՝ օվալբումին, օվոգլոբուլին):

Ձու կամ ձվի բաղադրամասեր պարունակող ամենատարածված սննդամթերքներից են՝

• տորթեր, կեքսներ, կրուասաններ և թխվածքաբլիթներ
• խմորեղեն, նրբաբլիթներ, պիկլետներ, բլիթներ, բեզե, բրիոշ, մարցիպան և այլն
• դեսերտներ, օրինակ՝ եփած կրեմ, մուս, պուդինգներ, պավլավա, պաղպաղակ և պաղպաղակային այլ արտադրանքներ
• շոկոլադ, զեֆիր և հրուշակեղենային արտադրանքներ
• ծեծած կամ փխրունացված սննդամթերքներ, օրինակ՝ «ձկան մատիկներ» (рыбные палочки) կամ շնիցել
• փքաբլիթներ (оладья)
• բուրգերների, այդ թվում՝ բուսական բուրգերների տարբեր տեսակներ
• «հալած» ըմպելիքներ (солодовые напитки) և ըմպելիքային փոշիներ, որոնք կարող են ավելացվել կաթին
• ձվային արիշտա կամ մակարոնեղեն
• ֆրանսիական տոստ
• ֆրիտատա և քիշ
• տապակած բրինձ և այլ ասիական ճաշատեսակներ
• մայոնեզներ
• կիտրոնային կարագ
• սոուսներ:

Հացի և բուլկիների որոշ տեսակներ ունեն փայլուն մակերևույթ, քանի որ թխելուց առաջ օծվում են ձվային գլազուրով:

Եթե ցանկանում եք գնել տեղում պատրաստվող և որևէ պիտակ չպարունակող որևէ ըմպելիք, հարցրեք վաճառողից, թե արդյոք այն պարունակում է ձու կամ, ընդհանուր առմամբ, ինչից է պատրաստված:

Առանց ձվի սննդի պատրաստում

Բազմաթիվ կերակուրներ և այլ սնունդ պատրաստելիս ձուն կարող է փոխարինվել մեկ այլ սննդամթերքով: Նման ռեցեպտներ կարող եք գտնել առցանց աղբյուրներից: Օրինակ, մեկ ձուն կարող է փոխարինվել 1 թեյի գդալ կերակրի սոդայի, ջրի և սպիտակ քացախի խառնուրդով:

Նույն կերպ, բուրգեր պատրաստելիս բաղադրամասերը միմյանց «սոսնձելու» համար ձվի փոխարեն կարող եք օգտագործել 1/4 բաժակ կարտոֆիլային կամ դդմի պյուրե:

Ձվից ալերգիան և պատվաստումները

Որոշ պատվաստանյութեր աճեցվում են ձվերում: Սակայն պատվաստանյութ ստանալուց հետո դրանցում պարունակվող ձվի սպիտակուցի քանակը չնչին է (օրինակ՝ գրիպի պատվաստանյութում՝ 1 միկրոգրամից պակաս): Հետևյալ պատվաստանյութերը կարող են պարունակել ձվի սպիտակուցի խիստ փոքր, մնացորդային քանակներ՝

• սեզոնային գրիպի ոչ ակտիվացված պատվաստանյութեր
• դեղին տենդի պատվաստանյութ
• Q տենդի պատվաստանյութ:

Սովորաբար պատվաստվելուց հետո առաջարկվում է 15 րոպե մնալ հսկողության ներքո, որ ստուգվի հնարավոր կողմնակի երևույթների զարգացումը: Եթե անհանգստացած եք ձեր երեխայի մոտ ալերգիկ ռեակցիաների դրսևորումից, հերթական պատվաստումը ստանալուց հետո կարող եք բժշկական հսկողության ներքո մնալ ավելի երկար ժամանակի ընթացքում: