Պատճառներ - Էմֆիզեմա

Էմֆիզեմայի հիմնական պատճառը օդածին գրգռիչների երկարատև ազդեցությունն է:

Այդպիսի օդածին գրգռիչների օրինակներից են՝

• ծխախոտի ծուխ
• մարիխուանայի ծուխ
• աղտոտված կամ փոշոտ օդ
• քիմիական գոլորշիներ և փոշիներ:

Հազվադեպ էմֆիզեմա առաջանում է թոքերի առաձգական կառուցվածքները պաշտպանող սպիտակուցի ժառանգական անբավարարությունից: Սա կոչվում է ալֆա-1-անտիտրիպսինի անբավարարության էմֆիզեմա:

Ռիսկի գործոններ

Էմֆիզեմայի զարգացման ռիսկը մեծացնող գործոնները ներկայացված են ստորև:

• Ծխելը. էմֆիզեմայի զարգացումն առավել հավանական է գլանակ ծխողների մոտ, սակայն սիգար և ծխամորճ ծխողները նույնպես ենթարկվում են թոքերի վնասման ռիսկին: Ծխողների բոլոր խմբերի համար ռիսկը մեծանում է ծխած տարիների և գլանակների և այլ արտադրանքների քանակի հետ:
• Տարիք. չնայած էմֆիզեմայի առաջացրած թոքերի վնասումը զարգանում է աստիճանաբար, ծխախոտի հետ կապված էմֆիզեմայով տառապող մարդկանց մեծամասնությունը հիվանդության առաջին ախտանիշները սկսում է զգալ 40-ից 60 տարեկանում:
• Երկրորդային ծխի ազդեցություն. երկրորդային ծուխը, որը նաև հայտնի է որպես պասիվ կամ միջավայրային ծխախոտի ծուխ, ծուխ է, որը ակամա շնչում եք, երբ ձեր ներկայությամբ այլ մարդիկ ծխում են ծխախոտ, ծխամորճ ​​կամ սիգար: Պասիվ ծխելը մեծացնում է էմֆիզեմայի ռիսկը:
• Գոլորշիների կամ փոշու աշխատանքային (մասնագիտական) ազդեցություն. եթե ​​շնչում եք որոշակի քիմիական նյութերի գոլորշիներ կամ հացահատիկի, բամբակի, փայտի կամ հանքարդյունաբերության արտադրանքի փոշի, ավելի հավանական է, որ ձեզ մոտ զարգանա էմֆիզեմա: Ռիսկն ավելի մեծ է, երբ դուք նաև ծխող եք:
• Ներսի և դրսի աղտոտվածության ազդեցություն. ներքին աղտոտիչներ, օրինակ՝ ջեռուցման վառելիքի գոլորշիներ, ինչպես նաև արտաքին աղտոտիչներ, օրինակ՝ ավտոմեքենայի արտանետումներ շնչելը մեծացնում է էմֆիզեմայի ռիսկը: