Էմֆիզեման և թոքերի քրոնիկ օբստրուկտիվ հիվանդությունը (ԹՔՕՀ) չեն կարող վերջնական բուժվել, սակայն բուժումները կարող են օգնել ախտանիշների թեթևացմանը և հիվանդության զարգացման դանդաղեցմանը:
Դեղորայքային բուժում
Կախված ձեր ախտանիշների ծանրության աստիճանից, բժիշկը կարող է խորհուրդ տալ հետևյալը:
- Բրոնխալայնիչներ (բրոնխոդիլատորներ). այս դեղերը կարող են օգնել հազի, շնչարգելության ու հևոցի և շնչառության հետ կապված այլ խնդիրների մեղմացմանը՝ թուլացնելով և լայնացնելով օդուղիները (բրոնխները):
- Ինհալացիոն ստերոիդներ. կորտիկոստերոիդային դեղամիջոցները, որոնք ներշնչվում են որպես աերոզոլային ցողացիրներ (սփրեյ), նվազեցնում են բորբոքումը և կարող են օգնել շնչարգելության և հևոցի մեղմացմանը:
- Հակաբիոտիկներ. եթե ունեք թոքերի բակտերիալ վարակ, ինչպիսին է սուր բրոնխիտը կամ թոքաբորբը (պնևմոնիա), հակաբիոտիկները կարող են օգնել:
Ոչ դեղորայքային բուժումներ (թերապիա)
- Թոքերի վերականգնում (ռեաբիլիտացիա). թոքային վերականգնման ծրագիրը ձեզ սովորեցնում է շնչառական վարժություններ և մեթոդներ, որոնք կարող են օգնել ձեր շնչարգելության ու հևոցի մեղմացմանը և ֆիզիկական վարժանքներ կամ գործեր անելու ձեր ունակության բարելավմանը:
- Սնուցման թերապիա. դուք նաև խորհուրդներ կստանաք ճիշտ սնվելու վերաբերյալ: Էմֆիզեմայի վաղ փուլերում գեր մարդիկ պետք է նիհարեն, մինչդեռ ուշ փուլում հյուծված մարդիկ՝ քաշ ավելացնեն:
- Լրացուցիչ թթվածին (օքսիգենոթերապիա). եթե ունեք արյան մեջ թթվածնի ցածր մակարդակով ծանր էմֆիզեմա, տանը կանոնավոր կերպով թթվածնի օգտագործումը կամ ֆիզիկական գործ անելիս թթվածին շնչելը կարող են որոշակի թեթևացում ապահովել: Բազմաթիվ մարդիկ օրական 24 ժամ օգտագործում են թթվածին: Այն սովորաբար իրականացվում է քթանցքի մեջ տեղադրված նեղ խողովակով (կանյուլա):
Վիրահատություն
Կախված ձեր էմֆիզեմայի ծանրության աստիճանից՝ ձեր բժիշկը կարող է առաջարկել մեկ կամ մի քանի տարբեր տեսակի վիրահատություններ:
- Թոքերի ծավալի կրճատման վիրահատություն. այս միջամտության ժամանակ վիրաբույժները հեռացնում են թոքերի ախտահարված հյուսվածքը: Հիվանդ հյուսվածքի հեռացումն օգնում է թոքերի մնացած հյուսվածքի ավելի լավ ընդլայնմանը և ավելի արդյունավետ գործելուն, ինչպես նաև շնչառության բարելավմանը:
- Թոքի փոխպատվաստում. սա կարող է քննարկվել, եթե ունեք թոքերի ծանր ախտահարում, և բուժման այլ տարբերակները օգուտ չեն տվել:
Հոդվածը հրապարակվել է՝ 17-05-2018
Վերջին վերանայում՝ 23-04-2024