Եթե ունեք էմֆիզեմա, կարող եք ձեռնարկել մի շարք քայլեր հիվանդության հարաճուն զարգացումը կասեցնելու և բարդություններից պաշտպանվելու համար:
- Դադարեցրեք ծխելը. սա ամենակարևոր բանն է, որը պետք է անեք ձեր ընդհանուր առողջության համար և միակը, որը կարող է դանդաղեցնել կամ դադարեցնել էմֆիզեմայի զարգացումը: Միացեք ծխելը դադարեցնելու ծրագրին, եթե ինքնուրույն ծխախոտից ձերբազատվել չի հաջողվում: Հնարավորինս խուսափեք պասիվ ծխելուց (երկրորդային ծխից):
- Խուսափեք այլ շնչառական գրգռիչներից. դրանցից են ներկերի և ավտոմեքենաների արտանետումների գոլորշիները, ճաշ պատրաստելու որոշ հոտերը, որոշ օծանելիքները, նույնիսկ վառվող մոմերը և խունկը: Պարբերաբար փոխեք վառարանի և օդորակիչի ֆիլտրերը՝ օդն աղտոտող նյութերը կրճատելու համար:
- Պարբերաբար ֆիզիկական վարժանքներ արեք. փորձեք թույլ չտալ, որ ձեր շնչառական խնդիրները ձեզ հեռացնեն կանոնավոր վարժանքներից, որոնք կարող են զգալիորեն մեծացնել ձեր թոքերի ունակությունը:
- Պաշտպանեք ձեզ սառը օդից. սառը օդը կարող է առաջացնել բրոնխիալ անցուղիների կծկանք (սպազմ)՝ էլ ավելի դժվարացնելով շնչելը։ Ցուրտ եղանակին դուրս գալուց առաջ ձեր բերանը և քիթը ծածկեք փափուկ շարֆով կամ դրեք դիմակ, որ տաքացնեք ներշնչվող օդը:
- Ստացեք առաջարկվող պատվաստումները. համոզվեք, որ ստանում եք գրիպի և թոքաբորբի դեմ ամենամյա պատվաստումները՝ ինչպես խորհուրդ է տվել ձեր բժիշկը:
- Կանխարգելեք շնչառական վարակները. ամեն ինչ արեք մրսածություն կամ գրիպ ունեցող մարդկանց հետ անմիջական շփումից խուսափելու համար: Եթե մրսածության և գրիպի սեզոնին ստիպված եք շփվել մարդկանց մեծ խմբերի հետ, կրեք շնչադիմակ, հաճախակի լվացեք ձեր ձեռքերը և ձեզ մոտ պահեք ալկոհոլային հիմքով ձեռքերն ախտահանող միջոց՝ անհրաժեշտության դեպքում օգտագործելու համար:
Հոդվածը հրապարակվել է՝ 02-04-2023
Վերջին վերանայում՝ 23-04-2024