Ինքնօգնություն - Ֆիբրոմիալգիա

Ինքնօգնությունը չափազանց կարևոր է ֆիբրոմիալգիայի կառավարման մեջ:

• Սթրեսի կառավարում. մշակեք գերլարվածությունը և հուզական սթրեսը սահմանափակող կամ դրանցից խուսափելու ծրագիր: Ամեն օր հանգստին ու ժամանցին տրամադրեք բավարար ժամանակ: Սովորեք «ոչ» ասել առանց մեղքի զգացման: Սակայն մի՛ փորձեք գլխիվայր շրջել ձեր առօրյա կյանքը: Աշխատանքից կամ առօրյա զբաղմունքներից կտրուկ հրաժարվող մարդիկ հակված են ավելի վատ վիճակում հայտնվել, քան նրանք, ովքեր շարունակում են մնալ ակտիվ: Փորձեք սթրեսի վերահսկման միջոցներ, օրինակ՝ խոր շնչառական վարժանքներ կամ մեդիտացիա:
• Քնի հիգիենա. հոգնածության զգացումը ֆիբրոմիալգիայի գլխավոր բաղադրիչներն է, ուստի բավարար որակի քունը խիստ կարևոր է: Քնին մեծ ժամանակ հատկացնելուց բացի ամրապնդեք առողջ քնի սովորույթ, օրինակ՝ ամեն օր մտեք անկողին և առավոտյան արթնանցեք համարյա նույն ժամերին կամ սահմանափակեք ցերեկային քունը:
• Կանոնավոր վարժանքներ. նախապես խորհրդակցելով ձեր բժշկի հետ, դանդաղորեն և աստիճանաբար անցեք կանոնավոր վարժանքների: Սկզբում գուցե որոշ մկանային ցավեր կամ անհարմարավետություն զգաք, որը վարժանքները շարունակելու դեպքում հետզհետե կմեղմանա: Փորձեք քայլել, լողալ, հեծանիվ վարել կամ զբաղվել ձեր նախընտրելի, սակայն՝ ոչ խիստ ծանրաբեռնող գործերով (այգեգործություն և այլն)։ Ֆիզիոթերապևտը կարող է օգնել, որ մշակեք տնային վարժանքների ձեր վիճակին համապատասխանող ծրագիր: Ձգումները, կեցվածքն ամրապնդող և թուլացնող վարժանքները նույնպես կարող են օգտակար լինել:
• Ստեղծեք խելամիտ հավասարակշռություն. պահեք ձեր ակտիվությունը համարժեք մակարդակի վրա: Եթե լավ ինքնազգացողության օրերին չարաշահեք ֆիզիկական ակտիվությունը, կարող եք ունենալ ավելի շատ վատ օրեր: Չափավորումը նշանակում է, որ պետք չէ ամեն ինչ անել լավ օրերին և խուսափել որևէ ակտիվությունից վատ օրերին:
• Հետևեք առողջ ապրելակերպին. ձեր սնունդը դարձրեք առողջարար: Մի՛ օգտագործեք ծխախոտային արտադրատեսակներ: Սահմանափակեք կոֆեինի օգտագործումը: Լցրեք ձեր օրը հաճելի զբաղմունքներով:

Այլընտրանքային բժշկություն

Ցավի և սթրեսի կառավարման հավելյալ և այլընտրանքային թերապիաները նորություն չեն: Որոշները, ինչպիսիք են մեդիտացիան և յոգան, կիրառվել են հազարավոր տարիներ: Սակայն դրանց օգտագործումը վերջին տարիներին ավելի տարածված է դարձել, հատկապես այն մարդկանց մոտ, ովքեր ունեն քրոնիկ հիվանդություններ, ինչպիսին է ֆիբրոմիալգիան:

Այս բուժումներից մի քանիսն, ըստ երևույթին, ապահով կերպով թեթևացնում են սթրեսը և նվազեցնում ցավը, իսկ որոշները ընդունվել են հիմնական բժշկության մեջ: Սակայն շատ մեթոդներ մնում են չապացուցված, քանի որ պատշաճ կերպով չեն ուսումնասիրվել:

• Ասեղնաբուժություն. ասեղնաբուժությունը չինական բժշկական համակարգ է, որը հիմնված է կենսական ուժերի նորմալ հավասարակշռության վերականգնման վրա՝ մաշկի մեջ տարբեր խորություններով շատ բարակ ասեղների միջոցով: Ասեղնաբուժության արևմտյան տեսությունների համաձայն՝ ասեղները փոփոխություններ են առաջացնում արյան հոսքի և գլխուղեղի և ողնուղեղի նեյրոհաղորդիչների մակարդակի մեջ: Որոշ ուսումնասիրություններ ցույց են տալիս, որ ասեղնաբուժությունը օգնում է թեթևացնելու ֆիբրոմիալգիայի ախտանիշները, մինչդեռ մյուս հետազոտություններով որևէ օգուտ չի ապացուցվել:
• Բուժական մերսում. սա առողջության պահպանման հնագույն մեթոդներից է, որը դեռևս գործում է: Այն ներառում է տարբեր մանիպուլյատիվ մեթոդների օգտագործում՝ ձեր մարմնի մկաններն ու փափուկ հյուսվածքները շարժելու համար: Մերսումը կարող է նվազեցնել ձեր սրտի հաճախությունը, հանգստացնել ձեր մկանները, բարելավել ձեր հոդերի շարժումների շրջանակը և բարձրացնել ձեր մարմնի բնական ցավազրկողների արտադրությունը: Այն հաճախ օգնում է սթրեսից և անհանգստությունից ազատվելուն:
• Յոգա և տայ չի. այս վարժանքները համատեղում են մեդիտացիան, դանդաղ շարժումները, խորը շնչառությունը և թուլացումը (ռելաքսացիա): Պարզվել է, որ երկուս մոտեցումներն էլ օգտակար են ֆիբրոմիալգիայի ախտանիշների վերահսկման համար: