Ֆիբրոմիալգիա. բուժում

2 րոպե

Ընդհանուր առմամբ, ֆիբրոմիալգիայի բուժումը ներառում է ինչպես դեղորայքային բուժման, այնպես էլ ինքնօգնության մոտեցումներ:

Շեշտը դրվում է ախտանիշները նվազագույնի հասցնելու և ընդհանուր առողջության բարելավման վրա: Ոչ մի բուժում չի գործում բոլոր ախտանիշների դեպքում, սակայն բուժման տարբեր մոտեցումների փորձարկումը կարող է ունենալ կուտակային ազդեցություն:

Դեղորայքային բուժումներ

Դեղորայքը կարող է օգնել նվազեցնելու ֆիբրոմիալգիայի ցավը և բարելավել քունը: Ընդհանուր տարբերակները ներառում են հետևյալը:

• Ցավազրկողներ. սովորական ցավազրկողներ, ինչպիսիք են Ացետամինոֆենը (Պարացետամոլ, Թայլենոլ և այլն), Իբուպրոֆենը (Ադվիլ, Մոտրին IB և այլն) կամ Նապրոքսեն նատրիումը (Ալեվե և այլն) կարող են օգտակար լինել: Օփիոիդային դեղամիջոցները խորհուրդ չեն տրվում, քանի որ կարող են հանգեցնել զգալի կողմնակի ազդեցությունների և կախվածության և ժամանակի ընթացքում վատթարացնեն ցավը:
• Հակադեպրեսանտներ. Դուլոքսետինը (Ցիմբալտա) և Միլնացիպրանը (Սավելլա) կարող են օգնել ֆիբրոմիալգիայի հետ կապված ցավի և հոգնածության թեթևացմանը: Ձեր բժիշկը նաև կարող է նշանակել Ամիտրիպտիլին կամ մկանային ռելաքսանտ համարվող Ցիկլոբենզապրին՝ քունը խթանելու համար:
• Հակացնցումային դեղամիջոցներ. էպիլեպսիայի բուժման համար նախատեսված դեղամիջոցները հաճախ օգտակար են որոշակի տեսակի ցավերի նվազեցման համար: Գաբապենտինը (Նեյրոնտին) երբեմն օգտակար է ֆիբրոմիալգիայի ախտանիշները նվազեցնելու համար, մինչդեռ Պրեգաբալինը (Լիրիկա) առաջին դեղամիջոցն էր, որը հաստատվել է ԱՄՆ Սննդի և դեղերի գործակալության (FDA) կողմից՝ ֆիբրոմիալգիայի բուժման համար:

Թերապիաներ

Բազմաթիվ տարբեր թերապիաներ կարող են օգնել ձեր օրգանիզմի և ձեր կյանքի վրա ֆիբրոմիալգիայի ազդեցության կրճատմանը: Օրինակները ներառում են հետևյալը:

• Ֆիզիոթերապիա. Ֆիզիոթերապևտը կարող է ձեզ սովորեցնել վարժանքներ, որոնք կբարելավեն ձեր ուժը, ճկունությունը և տոկունությունը: Ջրային վարժանքները կարող են առանձնահատուկ օգտակար լինել:
• Զբաղվածության (մասնագիտական) թերապիա. զբաղվածության թերապևտը կարող է օգնել ձեզ ճշգրտումներ կատարելու ձեր աշխատանքային միջավայրի կամ որոշակի առաջադրանքների կատարման ձևի մեջ, որոնք ավելի քիչ լարվածություն կառաջացնեն ձեր մարմնի վրա:
• Խորհրդատվություն. խորհրդատուի հետ զրուցելը կարող է օգնել ամրապնդելու ձեր հավատը ձեր ունակությունների նկատմամբ և սովորեցնել ձեզ սթրեսային իրավիճակների դիմակայման և հաղթահարման մոտեցումները: