Գոնորեա. պատճառներ

Գոնորեա. պատճառներ

Գոնորեան հարուցվում է Neisseria gonorrhoeae բակտերիայով, որը լայն շրջանակներում առավել հայտնի է «գոնոկոկ» անվան ներքո:

Գոնոկոկն իրենից ներկայացնում է զույգ կոկ (դիպլոկոկ), որի երկու կոկերը ձևով հիշեցնում են սուրճի հատիկներ՝ գոգավոր կողմերով միմյանց վրա դրված և նեղ ճեղքով բաժանված։

Neisseria gonorrhoeae բակտերիան ախտահարում է միզուկը, արգանդի վզիկի խողովակը, երբեմն՝ միզասեռական ուղու վերին հատվածի օրգանները, ինչպես նաև ուղիղ աղին, կոկորդը և աչքի շաղկապենին պատող էպիթելը։

Վարակի աղբյուրը գոնորեայով հիվանդ մարդն է, իսկ վարակման հիմնական ճանապարհը՝ սեռական հարաբերությունը, ներառյալ՝ բերանային (օրալ), հետանցքային (անալ) կամ հեշտոցային (վագինալ): Հազվադեպ, գոնորեայով կարող են վարակվել նաև վարակված անձանց օգտագործած իրերի հետ շփվելիս (սպիտակեղեն, երեսի սրբիչ, գիշերանոց և այլն)։

Ռիսկի գործոններ

Գոնորեայով վարակվելու բարձր ռիսկի խմբին պատկանում են սեռական ակտիվ կյանք վարող մինչև 25 տարեկան կանայք և տղամարդկանց հետ սեռական հարաբերություն ունեցող տղամարդիկ:

Գոնորեայով վարակման այլ ռիսկի գործոններից են՝

  • նոր սեռական զուգընկեր ունենալը
  • այնպիսի սեռական զուգընկեր ունենալը, ով ունի այլ սեռական զուգընկերներ
  • մեկից ավելի սեռական զուգընկերներ ունենալը
  • նախկինում գոնորեա կամ մեկ այլ սեռական ճանապարհով փոխանցվող հիվանդություն (ՍՃՓՀ) ունենալը:

Հոդվածը վերանայվել է՝ 30-03-2021