Skip to main content

Բուժում - Գինեկոմաստիա

Գինեկոմաստիայի դեպքերի մեծ մասը ժամանակի ընթացքում անհետանում է առանց բուժման:

Այնուամենայնիվ, եթե գինեկոմաստիան առաջանում է մեկ այլ հիվանդության պատճառով, ինչպիսիք են հիպոգոնադիզմը, թերսնուցումը կամ ցիռոզը, հիմքում ընկած վիճակը կարող է բուժման կարիք ունենալ:

Եթե դուք դեղեր եք ընդունում, որոնք կարող են գինեկոմաստիայի պատճառ դառնալ, ձեր բժիշկը կարող է խորհուրդ տալ, որ դադարեցնեք դրանք կամ փոխարինեք այլ դեղամիջոցով:

Դեռահասների մոտ, ովքեր չունեն գինեկոմաստիայի ակնհայտ պատճառ, բացառությամբ սեռական հասունացման ընթացքում հորմոնների բնական տեղաշարժերը, բժիշկը կարող է խորհուրդ տալ կատարել պարբերական՝ երեքից վեց ամիսը մեկ կրկնակի գնահատում՝ ստուգելու, թե արդյոք տվյալ վիճակն ինքնուրույն բարելավվում է: Գինեկոմաստիան դեռահասների մոտ հաճախ անհետանում է առանց բուժման երկու տարուց պակաս ժամկետում:

Բուժման կարիք կարող է առաջանալ, եթե գինեկոմաստիան ինքնուրույն չի բարելավվում կամ զգալի ցավ, ցավոտություն կամ անհանգստություն է առաջացնում:

Դեղորայքային բուժում

Կրծքագեղձի քաղցկեղի և այլ վիճակների բուժման համար օգտագործվող դեղամիջոցները կարող են օգտակար լինել գինեկոմաստիա ունեցող որոշ տղամարդկանց համար: Դրանք ներառում են՝

  • Տամոքսիֆեն (Սոլտրամոքս)
  • Արոմատազի արգելակիչներ, ինչպիսին է Անաստրոզոլը (Արիմիդեքս):

Չնայած այս դեղամիջոցները հաստատված են ԱՄՆ Սննդամթերքի և դեղերի վարչության կողմից (FDA), դրանք հատուկ հաստատված չեն գինեկոմաստիա ունեցող տղամարդկանց օգտագործման համար:

Ավելորդ կրծքագեղձային հյուսվածքի հեռացման վիրահատություն

Եթե կրծքագեղձերի մեծացումը զգալի և անհանգստացնող է նույնիսկ նախնական բուժումից կամ դիտարկումից հետո, ձեր բժիշկը կարող է խորհուրդ տալ վիրահատություն:

Վիրաբույժն ըստ ցուցման կարող է ընտրել գինեկոմաստիայի վիրահատության երկու տարբերակներից մեկնումեկը:

  • Լիպոսակցիա. այս վիրահատությամբ հեռացվում է կրծքագեղձի ճարպը, բայց ոչ՝ կրծքագեղձի հյուսվածքը:
  • Մաստէկտոմիա. այս տեսակի վիրահատությամբ հեռացնում է կրծքագեղձի հյուսվածքը: Վիրահատությունը հաճախ կատարվում է միայն փոքր կտրվածքների միջոցով: Այս ոչ այնքան ինվազիվ վիրահատության տեսակը պահանջում է ավելի քիչ վերականգնման ժամանակ:

Հոդվածը հրապարակվել է՝ 27-07-2023
Վերջին վերանայում՝ 06-04-2024