Հեպատիտ B․ կանխարգելում

Հեպատիտ B․ կանխարգելում

Տիպիկ դեպքերում հեպատիտ B-ի պատվաստանյութը տրվում է 6 ամսվա ընթացում 3-4 ներարկումների ձևով:

Դուք չեք կարող պատվաստանյութի պատճառով վարակվել հեպատի B-ով:

Հեպատիտ B-ի պատվաստանյութն անվտանգ և արդյունավետ միջոց է, որն 95% հավանականությամբ պաշտպանում է այս վիրուսով վարակվելուց:

Հեպատիտ B-ի դեմ պատվաստումը խորհուրդ է տրվում հետևյալ խմբերին՝

  • նորածիններ
  • երեխաներ և դեռահասներ, ովքեր ծնվելուց հետո չեն պատվաստվել
  • զարգացման արատներով մարդկանց խնամքի կենտրոնների աշխատակիցներ կամ բնակիչներ
  • բուժաշխատողներ, անհետաձգելի բուժօգնության աշխատակիցներ և այլ մարդիկ, ովքեր աշխատանքի բնույթով շփվում են արյան հետ
  • ցանկացած անձ, ով ունի որևէ սեռական ճանապարհով փոխանցվող հիվանդություն (ՍՃՓՀ), այդ թվում՝ ՄԻԱՎ
  • տղամարդկանց հետ սեռական հարաբերություն ունեցող տղամարդիկ
  • բազմաթիվ սեռական զուգընկերներ ունեցող անձինք
  • հեպատիտ B-ով անձի սեռական զուգընկերներ
  • ապօրինի ներարկային թմրամիջոցներ օգտագործող կամ համատեղ ասեղներ և ներարկիչներ օգտագործող անձինք
  • քրոնիկ լյարդային հիվանդությամբ անձինք
  • երիկամային հիվանդության վերջնային փուլում գտնվող անձինք
  • հեպատիտ B-ի բարձր տարածվածությամբ շրջաններ ճանապարհորդող անձինք:

Հեպատիտ B-ից խուսափելու նախազգուշական միջոցառումներ

Հեպատիտ B-ի ռիսկը նվազեցնող այլ միջոցառումները ներկայացվում են ստորև:

  • Իմացե՛ք ձեր յուրաքանչյուր սեռական զուգընկերոջ հեպատիտ B-ով վարակված լինելու կարգվիճակի մասին. մի վտանգեք ձեր առողջությունն անպաշտպան սեռական հարաբերությամբ, քանի դեռ վստահ չեք, որ ձեր զուգընկերը հեպատիտ B-ով կամ որևէ այլ ՍՃՓՀ-ով վարակված չի եղել:
  • Յուրաքանչյուր սեռական հարաբերության ընթացքում օգտագործե՛ք նոր պոլիուրեթանային պահպանակ. օգտվեք պահպանակից, եթե տեղյակ չեք ձեր զուգընկերոջ առողջական վիճակից: Հիշեք, որ պահպանակը կարող է նվազեցնել, այլ ոչ թե զրոյացնել հեպատիտ B-ի ազդեցությանը ենթարկվելու ռիսկը:
  • Խուսափե՛ք ապօրինի թմրամիջոցների օգտագործումից. եթե օգտագործում եք ապօրինի թմրամիջոցներ,փորձեք օր առաջ ձերբազատվել դրանցից: Եթե չեք կարողանում դադարեցնել ներարկային թմրամիջոցների օգտագործումը, յուրաքանչյուր անգամ օգտագործեք ստերիլ ասեղներ, ներարկիչներ և ներարկման այլ պարագաներ: Երբեք մի փորձեք համատեղ օգտագործել նույն ներարկիչները կամ ներարկման պարագաները:
  • Զգուշորեն վերաբերվե՛ք պիրսինգի և տատուի միջամտություններին. եթե ցանկանում եք ենթարկվել նման միջամտությունների, դիմեք միայն վստահելի լիցենզավորված կենտրոններ: Հարցրեք կամ հետաքրքրվեք, թե արդյոք այդ կենտրոններում օգտագործվում են միանգամյա ստերիլ պարագաներ:
  • Մինչև անծանոթ վայր ճանապարհորդելը հետաքրքրվե՛ք հեպատիտ B-ի դեմ պատվաստանյութ ստանալու մասին. եթե ուղեվորվելու եք հեպատիտ B-ի բարձր տարածվածությամբ որևէ տարածաշրջան, նախապես խորհրդակցեք բժշկի հետ պատվաստում ստանալու նպատակահարմարության մասին:

Հոդվածը վերանայվել է՝ 17-05-2021