Եթե ունեք ստամոքսի կամ մարսողության խանգարում, որն այլ կերպ կոչվում է ֆունկցիոնալ դիսպեպսիա, կարող եք նշել հետևյալ գանգատները:
- Ուտելիս վաղ հագեցման զգացողություն. սա մի վիճակ է, երբ շատ չեք կերել, բայց արդեն կուշտ եք զգում և գուցե չկարողանաք ավարտել ձեր կերակուրը:
- Ուտելուց հետո անհարմար լցվածություն. հագեցվածության զգացումը տևում է ավելի երկար, քան պետք է։
- Անհանգստություն որովայնի վերին մասում. դուք զգում եք թեթևից մինչև ուժեղ ցավ կամ անախորժ զգացողություն ձեր կրծոսկրի ստորին մասի և պորտի միջև ընկած հատվածում:
- Որովայնի վերին մասում այրոցի զգացում. դուք զգում եք անհանգստացնող տաքության կամ այրոցի զգացում ձեր կրծոսկրի ստորին մասի և պորտի միջև ընկած հատվածում:
- Որովայնի վերին մասում փքվածություն. դուք զգում եք անհանգստացնող լարվածություն ձեր որովայնի վերին հատվածում:
- Սրտխառնոց. դուք այնպիսի զգացողություն ունեք, կարծես ուզում եք փսխել:
Ավելի հազվադեպ կարող են առաջանալ փսխում և գղտոց:
Ստամոքսի խանգարում ունեցող մարդկանց մոտ երբեմն առաջանում է նաև այրոցք (изжога): Այրոցքն ուտելու ընթացքում կամ դրանից հետո ձեր կրծոսկրի կենտրոնում ցավի կամ այրոցի զգացում է, որը կարող է ճառագայթվել դեպի պարանոց կամ թիկունք:
Ե՞րբ դիմել բժշկին
Թեթև ստամոքսի խանգարումը սովորաբար անհանգստանալու պատճառ չէ: Խորհրդակցեք ձեր բժշկի հետ, եթե ձեր գանգատները շարունակվում են ավելի քան երկու շաբաթ:
Անմիջապես դիմեք ձեր բժշկին, եթե ցավն ուժեղ է կամ ուղեկցվում է հետևյալ լրացուցիչ ախտանիշներով՝
- հանկարծակի քաշի կորուստ կամ ախորժակի բացկայություն
- կրկնվող փսխումներ կամ արյունային փսխում
- սև, ձութանման կղանք
- կլման հետ կապված խնդիրներ, որոնք աստիճանաբար վատթարանում են
- հոգնածություն կամ թուլություն, որը կարող է վկայել սակավարյունության մասին (անեմիա):
Դիմեք անհետաձգելի բուժօգնության, եթե ունեք՝
- շնչարգելություն կամ հևոց, քրտնարտադրություն կամ ցավ կրծքավանդակում, որը տարածվում է ծնոտի, պարանոցի կամ ձեռքի վրա
- ցավ կրծքավանդակում ֆիզիկական կամ հոգեբանական լարվածության ժամանակ։
Հոդվածը հրապարակվել է՝ 19-02-2023
Վերջին վերանայում՝ 23-04-2024