Պատճառներ - Աճուկային ճողվածք

Որոշ աճուկային ճողվածքներ ակնհայտ պատճառ չունեն:

Մյուսները կարող են առաջանալ հետևյալի հետևանքով`

• որովայնի ներսում (ներորովայնային) ճնշման բարձրացում
• որովայնի պատին նախկինում առկա թույլ կետ
• որովայնի ձգվածություն աղիքների դատարկման կամ միզելու ժամանակ
• լարված ֆիզիկական գործունեություն
• հղիություն
• քրոնիկ հազ կամ փռշտոց:

Բազմաթիվ մարդկանց մոտ որովայնի պատի թուլությունը, որը հանգեցնում է աճուկային ճողվածքի, առաջանում է մինչև ծնվելը, երբ որովայնի պատի մկանների թույլ կետերը պատշաճ կերպով չեն փակվում: Մյուս աճուկային ճողվածքները զարգանում են ավելի ուշ, երբ մկանները թուլանում կամ հյուծվում են ծերացման, ծանր ֆիզիկական ակտիվության կամ ծխելու հետ կապված հազի պատճառով:

Որովայնի պատում թուլություններ նաև կարող են առաջանալ ավելի ուշ կյանքի ընթացքում, հատկապես վնասվածքից կամ որովայնային վիրահատությունից հետո:

Տղամարդկանց մոտ թույլ կետը սովորաբար առաջանում է աճուկային խողովակում, որի միջով սերմնալարը մտնում է ամորձապարկ: Կանանց մոտ աճուկային խողովակով անցնում է կլոր կապանը, որն օգնում է արգանդը տեղում պահելուն, և ճողվածքները երբեմն առաջանում են այնտեղ, որտեղ արգանդից ձգվող շարակցական հյուսվածքը միանում է ցայլոսկրը շրջապատող հյուսվածքին:

Ռիսկի գործոններ

Աճուկային ճողվածքի զարգացմանը նպաստող գործնները ներառում են հետևյալը:

• Արական սեռ. տղամարդկանց մոտ ութ անգամ ավելի հավանական է աճուկային ճողվածքի զարգացումը, քան կանանց մոտ:
• Մեծ տարիք. տարիքի հետ որովայնի պատի մկանները թուլանում են:
• Ռասա․ սպիտակամորթների մոտ աճուկային ճողվածքի առաջացման ռիսկն ավելի մեծ է:
• Ընտանեկան պատմություն (անամնեզ). եթե ունեք մտերիմ ազգական, օրինակ՝ ծնող, քույր կամ եղբայր, ով ունի այդ հիվանդությունը, ձեզ մոտ նույն վիճակի ռիսկը բարձրանում է:
• Քրոնիկ հազ, օրինակ՝ ծխելուց:
• Քրոնիկ փորկապություն. փորկապությունն առաջացնում է աղիքների դժվարացած և գերլարում պահանջող դատարկում:
• Հղիություն. հղի լինելը կարող է թուլացնել որովայնի մկանները և բարձրացնել ներորովայնային ճնշումը:
• Վաղաժամ ծննդաբերություն և ցածր ծննդյան քաշ. աճուկային ճողվածքն ավելի հաճախ հանդիպում է վաղաժամ ծնված կամ ցածր ծննդյան քաշ ունեցող նորածինների և մանկահասակ երեխաների մոտ:
• Նախկին աճուկային ճողվածք կամ ճողվածքի վերականգնում. նույնիսկ եթե ձեր նախորդ ճողվածքն առաջացել է մանկության տարիներին, դուք ենթարկվում եք մեկ այլ աճուկային ճողվածքի զարգացման ավելի մեծ ռիսկի: