Կանխարգելում - Երիկամային հիվանդություն

Կան ձեր երիկամներն առողջ պահպանող բազմաթիվ միջոցներ։

Դրանց մեծ մասը կապված է առողջ ապրելակերպի հետ, որն առօրյայի մի մասը դարձնելով ձեզ որոշակիորեն կապահովագրեք տարբեր քրոնիկ հիվանդություններից, ինչպես նաև կնպաստեք երիկամային հիվանդության կանխարգելմանը։

Ահա դրանցից ամենակարևորները։

• Հսկեք ձեր մարմնի քաշը. ավելորդ կիլոգրամները բարձրացնում են դիաբետի և բարձր արյան ճնշման (հիպերտենզիա) ռիսկերը, որոնք իրենց հերթին մեծացնում են երիկամային հիվանդության զարգացման հավանականությունը։
• Սնվեք առողջ. լավագույն տարբերակը մրգերով և բանջարեղեններով հարուստ, ինչպես նաև աղից, շաքարից և ճարպերից աղքատ սննդակարգն է։
• Խմեք առատ ջուր և խուսափեք քաղցրահամ ըմպելիքներից
• զբաղվեք կանոնավոր ֆիզիկական վարժանքներով. ֆիզիկական ակտիվությունը բարելավում է ձեր ինքնազգացողությունը և ընդհանուր առողջական վիճակը, օրինակ՝ կանխարգելում արյան շրջանառության խանգարումները, այդ թվում՝ օգնում երիկամների նորմալ արյունամատակարարմանը։
• Մի՛ ծխեք. ծխախոտի ծխում պարունակվող թունավոր նյութերի մի մասն օրգանիզմից հեռանում է երիկամներով՝ վնասելով դրանց նուրբ կծիկները։
• Քչացրեք ալկոհոլի օգտագործումը. ալկոհոլի մեծ քանակները կարող են վնասել երիկամները։
• Կրճատեք սթրեսի վնասակար ազդեցությունը. հոգ տարեք սթրեսը նվազեցնելու մասին և ժամանակ առ ժամանակ «թուլացրեք» ձեր մարմինն ու ուղեղը։
• Ուշադիր եղեք ռիսկի գործոնների նկատմամբ. եթե դրանք ձեզ մոտ առկա են, կանոնավոր կերպով ստուգեք ձեր երիկամների գործունեությունը։

Ի՞նչ անել, եթե ես «բարձր ռիսկի» մեջ եմ

Եթե ձեզ մոտ առկա է երիկամային հիվանդության ռիսկի գործոններից մեկը կամ մի քանիսը, երիկամների առողջ վիճակի պահպանումը և դրանց գործունեության կանոնավոր ստուգումը դառնում են առավել կարևոր։

Օրինակ, եթե ունեք դիաբետ, շատ կարևոր է, որ ձեր արյան շաքարը պահեք մշտական հսկողության ներքո, պարբերաբար ստուգեք ձեր արյան ճնշումը, խոլեստերինի մակարդակը և կանխարգելեք կամ վաղ բուժեք հնարավոր միզուղիների վարակը։