Մաստէկտոմիա

Մաստէկտոմիա

Մաստէկտոմիան կրծքագեղձի ամբողջական հեռացման վիրահատությունն է, որը սովորաբար կատարվում է կրծքագեղձի քաղցկեղը բուժելիս:

Կրկնակի մաստէկտոմիան երկու կրծքագեղձերի հեռացումն է:

Կրծքագեղձի քաղցկեղը կրծքագեղձից սկսվող չարորակ նորագոյացություն է: Քաղցկեղային բջիջները կարող են աճել կրծքագեղձում և զարգացման ավելի ուշ փուլերում տարածվել օրգանիզմի այլ շրջաններ: Վիրահատությունը կրծքագեղձի քաղցկեղի բուժման մեթոդներից զուտ մեկն է:

Կրծքագեղձի քաղցկեղի վիրահատության երկու հիմնական տարբերակներն են՝

  • կրծքագեղձապահպան վիրահատություն (մասնակի ռեզեկցիա), երբ հեռացվում է կրծքագեղձի միայն քաղցկեղով ախտահարված մասը
  • մաստէկտոմիա, երբ հեռացվում է ամբողջ կրծքագեղձը:

Մաստէկտոմիա կարող է առաջարկվել, երբ քաղցկեղը (համեմատած կրծքագեղձի չափսերի հետ) մեծ է կամ կրծքագեղձում կան մեկից ավելի քաղցկեղային օջախներ:

Կրծքագեղձի քաղցկեղի նկատմամբ բարձր ռիսկով կանանց կարող է առաջարկվել այս վիրահատությունը, որ կրճատվի քաղցկեղի զարգացման ռիսկը (կանխարգելիչ կամ պրոֆիլակտիկ մաստէկտոմիա):

մաստէկտոմիա

Ինչպե՞ս նախապատրաստվել մաստէկտոմիային

Մինչև վիրահատությունը կհանդիպեք վիրաբույժի և անեսթեզիոլոգի հետ, որ քննարկեք բուն վիրահատության և հետվիրահատական բուժման հետ կապված հարցերը: Վիրաբույժը կարող է առաջարկել մաստէկտոմիայից անմիջապես հետո կրծքագեղձի վերաձևում (ռեկոնստրուկցիա), որը կարող եք քննարկել պլաստիկ վիրաբույժի հետ:

Ի՞նչ է կատարվում մաստէկտոմիայի ընթացքում

Վիրահատությունն իրականացվում է ընդհանուր անզգայացման ներքո, ուստի մաստէկտոմիայի ողջ ընթացքն անցկացնելու եք քնած վիճակում և որևէ ցավ չեք զգալու: Վիրաբույժը կրծքագեղձի շուրջբոլորը կատարում է կտրվածք, որ հեռացնի գեղձային հյուսվածքը: Կրծքագեղձը ծածկող մաշկը և պտուկը նույնպես կարող են հեռացվել: Վիրահատությունը սովորաբար տևում է 1-2 ժամ կամ ավելի երկար, եթե մաստէկտոմիայից հետո իրականացվելու է նաև կրծքագեղձի վերականգնում (ռեկոնստրուկցիա):

Ի՞նչ ակնկալել միջամտությունից հետո

Կախված իրավիճակից, մաստէկտոմիայից հետո կարիք կունենաք հիվանդանոցում մնալ մեկ օրից մինչև մեկ շաբաթ: Քանի դեռ վիրահատական վերքը լավանում է, կարող եք նշել որոշակի ցավեր, անհարմարավետություն կամ կրծքագեղձի կամ թևատակի շրջանում թմրածություն: Երբեմն սպիի շուրջ կուտակվում է հեղուկ (սերոմա), որը դրենավորվում և չորացվում է: Զրուցեք բժշկի հետ վիրահատության հնարավոր կողմնակի ազդեցությունների մասին: Հիշեք, որ դրանց մեծ մասը կարող է վերահսկվել կամ մեղմացվել:

Ի՞նչ բարդություններ կարող են առաջանալ

Եթե կրծքագեղձի հետ միասին հեռացվում են նաև հարակից՝ ուսագոտու և թևատակի ավշային հանգույցները, կարող եք նույն շրջաններում զգալ թմրածություն: Թեև ժամանակի ընթացքում գանգատը կարող է թեթևանալ, սակայն որոշ զգացողություններ կարող են կրել երկարատև կամ մշտական բնույթ:

Ավշային հանգույցների հեռացումը նաև բարձրացնում է լիմֆոդեմա կոչվող առողջական խնդրի զարգացման ռիսկը: Նման վիճակի զարգացման մասին կարող են վկայել վիրահատությունից շաբաթներ անց զարգացող կրծքի, ձեռքի, ձեռնաթաթի կամ կրծքավանդակի այտուցվածությունը:

Մաստէկտոմիան և ձեր զգացումները

Յուրաքանչյուր վիրահատություն սթրեսով և հույզերով լի իրադարձություն է: Նման դեպքերում խնամողի, բուժքրոջ կամ բժշկի հետ զրույցները կարող են նպաստել ստեղծված վիճակին ինչպես ֆիզիկապես, այնպես էլ հուզականորեն հարմարվելուն:

Կրծքագեղձի քաղցկեղը և դրա բուժումը, օրինակ՝ մաստէկտոմիան, կարող են զգալիորեն ազդել մարմնակառուցվածքի, կանացիության զգացողության և ինքնագնահատականի վրա: Օրինակ, վիրահատությունից ամիսներ անց կարող եք զգալ սեռական ցանկության թուլացում և որոշակի հոգեբանական ընկճվածություն:

Եթե այս վիճակն ինքնուրույն հաղթահարել չի հաջողվում, զրուցեք բժշկի հետ հոգեթերապևտի հնարավոր օժանդակության մասին: Որոշակի ինքնավստահություն նաև կարող է տալ մաստէկտոմիայից հետո կրծքագեղձանման պրոթեզի կամ իմպլանտի կրումը, որը թաքցնում է կրծքագեղձի բացակայության փաստը:

Նման դեպքերում ճիշտ կլինի հոգ տանել ձեր մասին՝ որպես անձի, այլ ոչ թե կենտրոնանալ մարմնի ձևափոխված շրջանի վրա:

Լրացուցիչ տեղեկատվություն

Կրծքագեղձի քաղցկեղի մասին

Այցելե՛ք Մեդեքսի կրծքագեղձի քաղցկեղ էջը, որ ծանոթանաք հիվանդության և բուժման տարբերակների մասին:

Վիրահատական միջամտությունների մասին

Այցելե՛ք Մեդեքսի վիրահատական միջամտությունների համապատասխան էջերը, որ լրացուցիչ ընդհանուր բնույթի տեղեկություններ ստանաք վիրահատությունների վերաբերյալ, այդ թվում՝

Հոդվածը վերանայվել է՝ 09-06-2021