Ախտանիշներ - Մեզոթելիոմա

Մեզոթելիոմայի գանգատներն ու ախտանիշները տարբերվում են՝ կախված քաղցկեղի առաջացման վայրից:

Պլևրալ մեզոթելիոման, որն ախտահարում է թոքերը ծածկող հյուսվածքը՝ թոքամիզը (պլևրա), կարող է առաջացնել՝

• կրծքավանդակի ցավ
• ցավոտ հազ
• դժվարաշնչություն կամ շնչարգելություն
• կրծքավանդակի մաշկի տակ անսովոր հյուսվածքային գոյացություն
• անբացատրելի քաշի կորուստ:

Պերիտոնեալ մեզոթելիոման, որն առաջանում է որովայնի խոռոչի օրգանները ծածկող հյուսվածքում՝ որովայնամզում (պերիտոնեում), կարող է առաջացնել՝

• որովայնային ցավ
• որովայնի այտուց (ասցիտ)
• սրտխառնոց
• անբացատրելի քաշի կորուստ:

Մեզոթելիոմայի այլ ձևեր

Մեզոթելիոմայի այլ տեսակների գանգատներն ու ախտանիշները հստակ չեն, քանի որ հիվանդության այս ձևերը հանդիպում են խիստ հազվադեպ:

Պերիկարդիալ մեզոթելիոման, որն ախտահարում է սիրտը ծածկող հյուսվածքը՝ պերիկարդը, կարող է առաջացնել դժվարաշնչություն, հատկապես՝ պառկած դիրքում և կրծքավանդակային ցավեր:

Տունիկա վագինալիսի մեզոթելիոման, որն ախտահարում է ամորձիները ծածկող հյուսվածքը, սկզում կարող է ի հայտ գալ որպես ամորձու վրա այտուց կամ գոյացություն:

Ե՞րբ դիմել բժշկին

Այցելեք ձեր բժշկին, եթե ունեք գանգատներ և ձեզ անհանգստացնող ախտանիշներ: Մեզոթելիոմայի գանգատներն ու ախտանիշները առանձնահատուկ չեն և, ելնելով հիվանդության ցածր տարածվածությունից, ավելի հավանական է, որ կապված լինեն այլ վիճակների հետ: Եթե որևէ մշտական գանգատ և ախտանիշ թվում է անսովոր կամ անհանգստացնող, խնդրեք ձեր բժշկին գնահատել դրանք: Տեղեկացրեք ձեր բժշկին, եթե երկար ժամանակի ընթացքում ենթարկվել եք ասբեստի ազդեցությանը: