Գրադարան

Միգրեն․ պատճառներ

Միգրեն․ պատճառներ

Time Read 2 րոպե

Միգրենի պատճառները լիովին հասկանալի չեն, սակայն գենետիկան և արտաքին միջավայրի գործոնները կարող են որոշակի դեր խաղալ:

Ուղեղաբնի և դրա հետ եռորյակ նյարդի փոխազդեցությունների՝ ցավի գլխավոր հաղորդման ուղու փոփոխությունները նույնպես կարող է ներգրավված լինել: Նույնը վերաբերվում է գլխուղեղում առկա քիմիական նյութերի հավասարակշռությանը, այդ թվում՝ սերոտոնինին, որոնք օգնում են նյարդային համակարգում ցավի կարգավորմանը:

Հետազոտողները շարունակում են հետազոտել միգրենների մեջ սերոտոնինի, կալցիտոնին գենի հետ կապված պեպտիդի և այլ նեյրոմեդիատորների դերը:

Միգրենի տրիգերները (հրահրիչ գործոններ)

Կան միգրենների առաջացումը հրահրող բազմաթիվ գործոններ՝ տրիգերներ: Միգրենի ախտանիշները որպես կանոն սկսվում են տրիգերի ազդեցությունից հետո 24 ժամվա ընթացքում:

  • Կանանց մոտ հորմոնային փոփոխություններ. էստրոգենի մակարդակների տատանումները, օրինակ՝ դաշտանային ցիկլից առաջ և ընթացքում, հղիության և դաշտանադադարի ժամանակ հավանաբար խթանում են բազմաթիվ կանանց մոտ գլխացավերի նոպայի առաջացմանը: Հորմոնային դեղամիջոցները, օրինակ՝ բեղմնականխման հաբերը նույնպես կարող են վատթարացնել միգրենների ընթացքը: Այնուամենայնիվ, որոշ կանայք նշում են, որ այս դեղամիջոցների ընդունման ժամանակ միգրենների հաճախականությունը կրճատվում է:
  • Ըմպելիքներ. այս խումբը ներառում է ալկոհոլը, հատկապես՝ գինին և մեծ քանակով կոֆեինը, օրինակ՝ սուրճը։
  • Սթրես. աշխատավայրում կամ տանն առկա սթրեսը կարող է առաջացնել միգրեն:
  • Զգայական խթանիչներ. վառ կամ թարթող լույսերը, ինչպես նաև բարձր ձայները կարող են հարուցել միգրեններ: Օծանելիքի, ներկանյութերի կամ ծխախոտի ծխի և այլ սուր հոտերը կարող են որոշ մարդկանց մոտ հրահրել միգրենները:
  • Քնի փոփոխություններ. որոշ մարդկանց շրջանում քնի կորուստը կամ չափից դուրս երկար քունը կարող են խթանել միգրենի առաջացմանը:
  • Ֆիզիկական գործոններ. ֆիզիկական գերծանրաբեռնվածությունը, այդ թվում՝ սեռական գործունեությունը կարող է առաջացնել միգրեններ:
  • Եղանակային փոփոխություններ. եղանակի կամ մթնոլորտային ճնշման տատանումները կարող են դրդել միգրենի առաջացումը:
  • Դեղամիջոցներ. ներքին ընդունման (օրալ) բեղմնականխիչները և անոթալայնիչները (օրինակ՝ Նիտրոգլիցերին) կարող են խորացնել միգրենը:
  • Սննդամթերքներ. հնեցված պանիրները և աղի ու վերամշակված սննդային արտադրատեսակները կարող են նպաստել միգրենի առաջացմանը: Նույնը վերաբերվում է ճաշերը բաց թողնելուն:
  • Սննդային հավելումներ. ասպարմատային քաղցրացնող նյութը և մոնոսոդիումի գլուտամատ կոչվող կոնսերվանտը, որոնք առկա են բազմաթիվ սննդամթերքներում, կարող են առաջացնել միգրենային գլխացավեր:

Ռիսկի գործոններ

Որոշ գործոններ կարող են բարձրացնել միգրեններ ունենալու հավանականությունը:

  • Ընտանեկան պատմություն (անամնեզ). եթե ունեք միգրենով ընտանիքի անդամ, ձեզ մոտ նույն հիվանդության զարգացման ռիսկը բարձրանում է (միգրենի դեպքերի երկու երրորդն ունի ընտանեկան պատմություն):
  • Տարիք. միգրենը կարող է սկսվել ցանկացած տարիքում, սակայն ավելի հաճախ սկսվում է դեռահաս տարիքում։ Միգրենային գլխացավերը հակված են իրենց գագաթնակետին հասնելու 30-ին մոտ տարիքում, որից հետո հաջորդ տասնամյակների ընթացքում աստիճանաբար մեղմանում և դառնում են ավելի հազվադեպ:
  • Սեռ. միգրենը կանանց շրջանում մոտ 3 անգամ ավելի տարածված է, քան տղամարդկանց շրջանում:
  • Հորմոնային տեղաշարժեր. միգրեն ունեցող կանանց մոտ գլխացավերը կարող են սկսվել դաշտանից անմիջապես առաջ կամ սկսվելուց հետո շատ չանցած: Դրանք նաև կարող են փոփոխվել հղիության կամ դաշտանադադարի ընթացքում: Ընդհանուր առմամբ, դաշտանադադարից հետո միգրենային գլխացավերը մեղմանում են:

Հոդվածը տեղադրվել է՝ 22-07-2021 վերանայվել է՝ 14-03-2023

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով