Միգրեն․ ախտանիշներ

Միգրեն․ ախտանիշներ

Միգրենները կարող են զարգանալ 4 փուլով՝ նախանշաններ, աուրա, նոպա (գլխացավ) և հետնշաններ:

Այուամենայնիվ, միգրեն ունեցող ոչ բոլոր մարդկանց մոտ են դրսևորվում այս 4 հերթական շրջանները:

Նախանշանների (պրոդրոմալ) փուլ

Միգրենից մեկ կամ երկու օր առաջ կարող են ի հայտ գալ փոփոխություններ, որոնք նախազգուշացնում են մոտակա միգրենի մասին, այդ թվում՝

  • փորկապություն
  • տրամադրության փոփոխություններ՝ սկսած դեպրեսիայից մինչև էյֆորիա
  • սննդային հակումներ
  • պարանոցի կարկամություն
  • բարձրացած միզարձակություն
  • հեղուկների պահում (այտուցներ)
  • հաճախակի հորանջումներ:

Աուրա

Որոշ մարդկանց մոտ միգրեններից առաջ կամ ընթանցքում կարող է ի հայտ գալ աուրա: Սա ներառում է դարձելի նյարդաբանական ախտանիշներ, որոնք գլխավորապես տեսողական բնույթի են, սակայն նաև կարող են լինել զգացողական կամ շարժողական: Յուրաքանչյուր ախտանիշ սովորաբար սկսվում է աստիճանաբար, սաստկանում մի քանի րոպեի ընթացքում և կարող է տևել մինչև 60 րոպե: Այնուամենայնիվ, ավելի հաճախ միգրենի նոպան սկսվում է առանց աուրայի։

Միգրենային աուրաների օրինակներից են՝

  • տեսողական երևույթներ, օրինակ՝ տեսադաշտում տարբեր ֆիգուրների, լուսավոր կետերի կամ առկայծումների առաջացում, որը կարող է խանգարել է կարդալուն կամ մեքենա վարելուն
  • մշուշոտ տեսողություն, տեսադաշտի մի կեսի մթագնում (հեմիանոպսիա) կամ նույնիսկ տեսողության կորուստ
  • ձեռքերում կամ ոտքերում ծակծկոցներ
  • դեմքի կամ մարմնի մի կեսի թուլություն կամ թմրածություն
  • խոսքի խանգարում
  • գլխապտույտ:

Գլխացավի նոպա

Չբուժելիս միգրենը սովորաբար տևում է 4-72 ժամ: Տարբեր մարդկանց մոտ միգրենային նոպաների հաճախականությունը կարող է լինել տարբեր: Դրանք կարող են ի հայտ գալ խիստ հազվադեպ կամ անհանգստացնել ամսական կամ երբեմն՝ նաև շաբաթական մի քանի անգամ:

Միգրենի ընթացքում կարող եք նշել՝

  • սովորաբար գլխի մի կեսի՝ միակողմանի, սակայն հաճախ՝ երկկողմանի գլխացավեր
  • բաբախող կամ պուլսացվող գլխացավեր
  • լույսի, ձայնի և երբեմն՝ հոտերի կամ հպման նկատմամբ գերզգայունություն
  • ինքնազգացողության վատացում, սրտխառնոց և փսխում:

Հետնշանային (պոստդրոմալ) փուլ

Միգրենային նոպայից հետո կարող եք զգալ մինչև մեկ օր տևող գերհոգնածություն, շփոթվածություն կամ թուլություն: Որոշ մարդկանց մոտ կարող է ի հայտ գալ տրամադրության բարձրացում։ Գլխի կտրուկ շարժումը կարող է կարճատև վերականգնել ցավը:

Միգրենի նոպաների միջև ընկած ժամանակահատվածում ձեզ առողջ եք զգում և որևէ գանգատ չեք ներկայացնում։

Ե՞րբ դիմել բժշկին

Միգրենները հաճախ մնում են չախտորոշված և չբուժված: Եթե ունեք միգրեն հիշեցնող կանոնավոր գանգատներ և ախտանիշներ, լրացրեք նոպաների և դրանց բուժման մեթոդների օրագիր, որից հետո պայմանավորվեք, այցելեք բժշկին և միասին քննարկեք գլխացավերը:

Նույնիսկ եթե բժիշկը տեղյակ է ձեր գլխացավերի մասին, այցելեք կամ տեղեկացրեք նրան, եթե զգում եք դրանց բնույթի փոփոխություններ:

Անհապաղ տեղեկացրեք բժշկին կամ զանգեք 1-03 և կանչեք շտապօգնություն, եթե ունեք հետևյալ ախտանիշներից մեկնումեկը, որոնք կարող են վկայել ավելի ծանր առողջական խնդրի առկայության մասին՝

  • հանկարծակի սկսված և խիստ սաստիկ գլխացավեր
  • գլխացավեր, որոնք ուղեկցվում են ջերմության բարձրացմամբ, պարանոցի կարկամությամբ, ցնցումներով, երկտեսությամբ, մարմնի որևէ շրջանի թմրածությամբ կամ թուլությամբ, որոնք կարող են ահազանգել ինսուլտի մասին
  • գլխացավեր, որոնք ի հայտ են եկել գլխի վնասվածքից հետո
  • քրոնիկ գլխացավ, որը վատթարանում է հազալիս, լարվելիս, ձգվելիս կամ գլուխը կտրուկ շարժելիս
  • 50 տարեկանից հետո ի հայտ եկած նոր գլխացավեր։

Հոդվածը վերանայվել է՝ 22-07-2021