Միգրեն

Միգրեն
Անգլերեն անվանումը՝ Migraine

Միգրենը բավականին տարածված և տանջող գլխացավեր հարուցող հիվանդություն է։

Կան միգրենի կանխարգելման, ինչպես նաև արդյունավետ բուժման տարբեր մեթոդներ։

Միգների ախտանիշները

Միգրեն ունեցող բազմաթիվ մարդկանց մոտ մինչև ախտանիշների ի հայտ գալը, 1-2 օր առաջ հայտնվում են որոշ նախանշաններ (ինքնազգացողության վատթարացում)։

Որոշ մարդկանց մոտ կարող է առաջ գալ այսպես կոչված «աուրա»՝ աչքերի դիմաց կայծեր, առկայծումներ կամ տեսողության այլ խանգարումներ, խոսքի խանգարումներ, վերջույթներում ծակծկոցի զգացում։ Այս երևույթները կարող են նախորդել կամ սկսվել բուն միգրենի ընթացքում։ Սա միգրենի «աուրայով» տեսակն է։ Աուրան դարձելի է և նոպայի ընթացքում կամ նոպայից հետո վերանում է։ Սակայն, ավելի հաճախ (շուրջ 80%) միգրենի նոպան սկսվում է առանց աուրայի։

Միգրենն ընթանում է որպես գլխացավերի նոպա։ Երբ գլխացավերը սկսվում են, իրենց բնույթով դրանք լինում են չափավորից մինչև ուժեղ՝ խանգարելով առօրյա գործունեությունը և աշխատանքը։ Ձեր գլուխը կարծես սկսում է «բաբախել» (պուլսացվել), առաջ են գալիս լուսավախություն և ձայնավախություն (դուք գերզգայուն եք դառնում լույսի կամ ձայների նկատմամբ՝ փորձելով կկոցել կամ փակել ձեր աչքերը և ականջները)։ Կարող են զարգանալ նաև ինքնազգացողության վատացում և փսխումներ։

Միգրենային գլխացավը սովորաբար տեղակայվում է գլխի մի կեսում, թեև աջ ու ձախ կողմերի գլխացավերը կարող են հաջորդել մեկը մյուսին։ Գլխի երկկողմանի գլխացավը միգրենին բնորոշ չէ, թեև հազվադեպ կարող է հանդես գալ։ Գլխացավերը կարող են շարունակվել մի քանի ժամից մինչև մի քանի օր (ավելի հաճախ՝ 4 ժամից մինչև 3 օր)։

Միգրենի նոպաների միջև ընկած ժամանակահատվածում դուք ձեզ առողջ եք զգում և որևէ գանգատ չեք ներկայացնում։

Միգրենի առաջացման պատճառները

Միգրենի պատճառները մինչև վերջ բացահայտված չեն։ Որոշ մարդիկ միգրենի նոպայի դրսևորումը կապում են որոշ նպաստող գործոնների (դրդապատճառներ կամ տրիգերներ) հետ, օրինակ՝

  • պանրի, կարմիր գինու և գլյուտամատ պարունակող սննդի օգտագործում
  • սթրես և փոփոխություններ առօրյա կյանքում
  • եղանակային կտրուկ փոփոխություններ
  • հորմոնային տեղաշարժեր, կանանց դեպքում՝ նաև հորմոնային հակաբեղմնավորիչ հաբերի ընդունում
  • ալկոհոլային խմիչքներ (հատկապես՝ կարմիր գինի և գարեջուր)։

Միգրենի ախտորոշումը

Բժիշկը կարող է ձեզ մոտ միգրենն ախտորոշել՝ ելնելով ձեր գանգատներից և ձեր զննման արդյունքներից։ Միգրենի ախտորոշման համար որևէ հատուկ հետազոտություն կամ լաբորատոր թեստ գոյություն չունի։ Սակայն ձեր բժիշկը կարող է նշանակել որոշ հետազոտություններ, որ բացառի գլխացավի այլ պատճառները։

Միգրենի բուժումը

Եթե կասկածում եք, որ միգրեն ունեք, դուք կարող եք ձեր գլխացավերը մեղմացնել՝ խմելով դեղատոմս չպահանջող որոշ ցավազրկողներ։ Որոշ մարդիկ նշում են, որ իրենց հաջողվում է միգրենային գլխացավը կանխել, եթե վաղ են սկսում բուժումը։ Զրուցեք ձեր բժշկի հետ գլխացավը մեղմացնող դեղերի մասին։

Գլխացավի ընթացքում ընտրեք հանգիստ, մթնեցված և լուռ սենյակ։ Փորձեք գլխացավի ժամանակ ձեր աշխատանքային գործընկերներին կամ ընտանիքի անդամներին փոխանցել ձեր կիսատ մնացած աշխատանքները։

Եթե միգրենը հաճախակի կրկնվելու հակում ունի, կանխարգելիչ բուժումը կարող է օգտակար լինել։

Եթե ձեզ մոտ նոր է առաջացել միգրեն, դուք կարող եք պահել օրագիր, որը թույլ կտա հասկանալ, թե գլխացավն ինչ իրավիճակներում կամ ինչ գործոնների ազդեցության ներքո է առաջանում։

Հոդվածը վերանայվել է՝ 23-06-2019