Նյարդացավի բուժումն ընդհանուր առմամբ ներառում է հիմնական հիվանդության և բուն նյարդացավի բուժումը:
Բոլոր դեպքերում, նյարդացավերի մեծ մասը հեշտ չի բուժվում:
Եթե հայտնաբերվում է հիմնական հիվանդությունը, ապա նյարդացավի բուժումը նախ և առաջ ներառում է նյարդացավի պատճառ դարձած այդ հիվանդության վերացումը, իսկ եթե լիարժեք բուժումն անհնար է՝ վերջինիս ընթացքը մեղմացնելը: Օրինակ, առկա դիաբետը (շաքարախտ) կառավարելի դարձնելով և արյան գլյուկոզի մակարդակը կայուն կարգավորելով նյարդացավի ընթացքը կարող է զգալիորեն մեղմացվել: Նույն կերպ, վիտամին B12-ի դեֆիցիտի բուժումը կարող կարող է զգալի օգուտ տալ նյարդացավի բուժման ընդհանուր գործին:
Հակառակ դեպքում, երբ նյարդացավի պատճառը չի հայտնաբերվում, բժիշկը դիմում է բուն ցավի վերացմանը (սա կարող է նշանակվել նաև առաջին դեպքում): Նման դեպքերում բժիշկը կարող է ձեզ նշանակել ինչպես դեղորայքային, այնպես էլ ոչ դեղորայքային բուժումներ կամ զուգակցել այս երկուսը:
Դեղեր
Որոշ նյարդացավեր կարող են մեղմացվել սովորական ցավազրկողներով՝ Ասպիրին, Պարացետամոլ կամ որևէ այլ ոչ ստերոիդ հակաբորբոքային դեղամիջոց (ՈՍՀԲԴ): Սաստիկ և անդիմադրելի ցավերի դեպքում կարող են նշանակվել նաև թմրաբեր ցավազրկողներ, սակայն ոչ թե պլանային բուժման, այլ եզակի օգտագործման համար:
Նյարդացավը կարող է մեղմացվել նաև ոչ ցավազրկող դեղերով: Օրինակ, դեպրեսիայի բուժման (Ամիտրիպտիլին), ցնցումների բուժման (Գաբապենտին կամ Պերգաբալին), սրտանոթային հիվանդությունների բուժման (Մեքսիլետին կամ Ֆլեկաինիդ) կամ հիպերտենզիայի բուժման (Կլոնիդին) դեղերը կարող են հաջող կերպով մեղմացնել կամ հանել նյարդացավը:
Ոչ դեղորայքային բուժումներ
Կան նաև նյարդացավը մեղմացնող այլ՝ ոչ դեղորայքային մեթոդներ, որոնցից են՝
- կրթություն և խորհրդատվություն (ցավի կառավարման հմտություններ)
- որոշ վարժանքներ
- ասեղնաբուժություն
- ռելաքսացիայի մեթոդներ
- հոգեբանական բուժումներ, որոնց նպատակն է ցավերի հոգեբանական կառավարումը և ցավին ուղեկցող անհանգստությունն ու տառապանքը նվազեցնելը
- նյարդի ներմաշկային էլեկտրական խթանում, որը կարող է որոշ չափով ընկճել ցավային գրգիռների հաղորդումը գլխուղեղ:
Երկարատև ձգձգվող նյարդացավի ժամանակ ձեզ կարող են ուղեգրել նաև քրոնիկ ցավով զբաղվող մասնագետի խորհրդատվության:
Հոդվածը հրապարակվել է՝ 10-05-2018
Վերջին վերանայում՝ 23-04-2024