Պատճառներ - Մանկաբարձական խոլեստազ

Հղիության կամ մանկաբարձական խոլեստազի ճշգրիտ պատճառը պարզ չէ:

Խոլեստազը, որը թարգմանվում է որպես լեղու կանգ, նվազեցնում կամ դադարեցնում է լեղու հոսքը: Լեղին լյարդում արտադրվող մարսողական հեղուկ է, որն օգնում է սննդով ստացված ճարպերի տրոհմանը (քայքայմանը): Խոլեստազի դեպքում լյարդից բարակ աղիներ արտահոսելու փոխարեն լեղին մնում և կուտակվում է լյարդում, որտեղ վնասում է բջիջները (հեպատոցիտներ) և ի վերջո մուտք գործում արյան հուն: Ըստ երևույթին, արյան մեջ լեղաթթուների բարձր մակարդակն էլ առաջացնում է հղիության խոլեստազին բնորոշ քորը, այլ ախտանիշներն ու բարդությունները:

Հղիության հորմոնները, գենետիկան և շրջակա միջավայրը կարող են դեր խաղալ:

• Հորմոններ. հղիության հորմոնների մակարդակն աճում է, որքան մոտենում եք ծննդաբերության ժամկետին: Սա կարող է դանդաղեցնել լեղու հոսքը:
• Գեներ (ժառանգականություն). երբեմն, այս վիճակը հանդիպում է որոշ ընտանիքներում: Հայտնաբերվել են որոշակի գենային փոփոխություններ (մուտացիաներ), որոնք կարող են կապված լինել հղիության խոլեստազի հետ:
• Շրջակա միջավայր. թեև ճշգրիտ միջավայրային գործոնները պարզ չեն, հղիության խոլեստազի ռիսկը փոփոխվում է ըստ աշխարհագրական դիրքի և սեզոնի: Օրինակ, այն ավելի տարածված է հնդկական և պակիստանյան արմատներով հղի կանանց շրջանում:

Ռիսկի գործոններ

Որոշ գործոններ կարող են մեծացնել հղիության խոլեստազի զարգացման ռիսկը: Դրանցից են՝

• հղիության խոլեստազի անձնական կամ ընտանեկան պատմություն (անամնեզ)
• լյարդի վնասման կամ հիվանդության պատմություն, ինչպիսիք են հեպատիտ C-ն և լեղապարկի քարերը
• բազմապտուղ հղիություն
• հղիություն ավելի մեծ՝ 35 տարեկան և ավելի բարձր տարիքում:

Եթե ունեք նախորդ հղիության ժամանակ խոլեստազի պատմություն, ապա մեկ այլ հղիության ընթացքում նույն խանգարումը զարգանալու ձեր ռիսկը մեծ է: Կանանց 60%-ից 70%-ի մոտ այն կրկնվում է: Սա կոչվում է կրկնություն: Ծանր դեպքերում կրկնության ռիսկը կարող է հասնել մինչև 90%: