Պատճառներ - Պանկրեատիտ

Պանկրեատիտը զարգանում է, երբ ենթաստամոքսային գեղձում գտնվող և դեռևս ծորանով չհեռացած մասողական ֆերմենտներն ակտիվանում են՝ գրգռելով գեղձային բջիջները և առաջացնելով բորբոքում:

Սուր պանկրեատիտի կրկնվող դրվագների պատճառով ենթաստամոքսային գեղձը վնասվում է (գեղձային հյուսվածքների ինքնալուծում կամ աուտոլիզ, որը բերում է այտուցի, արյունազեղման և բորբոքման) և զարգանում է քրոնիկ պանկրեատիտ, երբ ձևավորվում է սպիական հյուսվածք և գեղձի գործունեությունը թուլանում է: Վատ գործող ենթաստամոքսային գեղձը կարող է առաջացնել մարսողական խնդիրներ և շաքարային դիաբետ:

Պանկրեատիտ առաջացնող հիվանդություններից են՝

• որովայնային վիրահատություններ
• ալկոհոլի տևական չարաշահում կամ ալկոհոլիզմ
• որոշ դեղամիջոցներ
• կիստոզ ֆիբրոզ
• լեղապարկի քարեր
• արյան կալցիումի բարձր մակարդակներ (հիպերկալցեմիա), որը կարող է զարգանալ գերակտիվ հարվահանաձև գեղձի պատճառով (հիպերպարաթիրեոզ)
• արյան տրիգլիցերիդի բարձր մակարդակներ (հիպերտրիգլիցերիդեմիա)
• վարակ
• որովայնի վնասվածքներ
• գիրություն
• ենթաստամոքսային գեղձի քաղցկեղ:

Լեղապարկի քարերի բուժման միջամտություններից էնդոսկոպիկ ռետրոգրադ խոլանգիոպանկրեատոգրաֆիան նույնպես կարող է հանգեցնել պանկրեատիտի:

Երբեմն պանկրեատիտի պատճառը երբեք չի հայտնաբերվում:

Ռիսկի գործոններ

Կան մի շարք գործոններ, որոնք բարձրացնում են պանկրեատիտի ռիսկը:

• Ալկոհոլի մեծ քանակների օգտագործում. հետազոտությունները վկայում են, որ ալկոհոլի չարաշահումը (օրական 4-5 չափաբաժին) բարձրացնում է պանկրեատիտի ռիսկը:
• Ծխախոտ. ծխողների շրջանում քրոնիկ պանկրեատիտի ռիսկը մոտ 3 անգամ աճում է, իսկ ծխախոտի օգտագործման դադարեցումը կիսով չափ կրճատում է նույն ռիսկը:
• Գիրություն. ավելորդ քաշի պայմաններում պանկրեատիտի հավանականությունը բարձրանում է:
• Պանկրեատիտի ընտանեկան պատմություն (անամնեզ). քրոնիկ պանկրեատիտի զարգացման մեջ կարևորվում է գենետիկայի դերը: Եթե ունեք պանկրեատիտ ունեցող ընտանիքի անդամ, ձեզ մոտ հիվանդության ռիսկը բարձրանում է, հատկապես, եթե ուղեկցվում է այլ ռիսկի գործոնների հետ: