Բուժում - Պանկրեատիտ

Պանկրեատիտի բուժումը կախված է հիվանդության ընթացքից և հաճախ ներառում է քաղցած մնալը, դեղամիջոցները կամ վիրահատությունը:

Որպես կանոն, սուր պանկրեատիտի բուժումը կազմակերպվում է հիվանդանոցում, վիրաբուժական կամ, ծանր դեպքերում, անհետաձգելի բուժօգնության բաժանմունքներում: Քրոնիկ պանկրեատիտի բուժումը սովորաբար անցկացվում է տնային պայմաններում, քանի դեռ ցավերը ուժեղ չեն և չեն զարգացել բարդություններ:

Հիվանդանոցում նախանական բուժումը կարող է ներառել հետևյալ մոտեցումները:

• Քաղց. բժիշկը խորհուրդ կտա, որ հիվանդանոցային բուժման առաջին մի քանի օրը զերծ մնաք սնունդ ընդունելուց, որը ենթաստամոքսային գեղձին տալիս է «հանգստանալու» և վերականգնվելու ժամանակ և հնարավորություն: Երբ գեղձի բորբոքումը մեղմանա, բժիշկը կթույլատրի, որ խմեք թափանցիկ հեղուկներ (ջուր) և ստանաք դյուրամարս սնունդ: Ժամանակի ընթացքում կարող եք աստիճանաբար վերադառնալ նորմալ՝ առողջ սննդակարգին: Եթե պանկրեատիտը շարունակվում է և դեռևս նշում եք սնունդ ընդունելուն հաջորդող որովայնային ցավեր, բժիշկը կարող է խորհուրդ տալ, որ ձեր սնուցումը կազմակերպվի ձեր ստամոքսի մեջ քթով տեղադրված բարակ խողովակով (նազոգաստրալ զոնդ):
• Ցավազրկողներ. պանկրեատիտը կարող է առաջացնել սուր ցավեր: Նման դեպքերում նշանակվում են ուժեղ ցավազրկող դեղամիջոցներ:
• Ներերակային հեղուկներ. ենթաստամոքսային գեղձի վերականգնումը օրգանիզմից պահանջում է բավականաչափ էներգիա և հեղուկներ: Սա կարող է բերել ջրազրկման, ուստի հիվանդանոցում տրվում են լրացուցիչ ներերակային հեղուկներ:

Երբ պանկրեատիտի ընթացքը դառնում է վերահսկելի, բժիշկը անցնում է հիվանդություն առաջացնող պատճառի բուժմանը: Կախված բորբոքման պատճառից, բուժումը կարող է ներառել հետևյալ միջամտությունները:

• Լեղուղիների խցանումները վերացնող միջամտություններ. եթե պանկրեատիտի պատճառը լեղածորանի խցանումն է, կարող է առաջանալ այս ուղին բացող կամ լայնացնող միջամտությունների անհրաժեշտություն, օրինակ՝ էնդոսկոպիկ ռետրոգրադ խոլանգիոպանկերատոգրաֆիա (ERCP), որի օգնությամբ հայտնաբերվում և հեռացվում են պանկրեասի լեղու արտահոսքն ապահովող ծորանների խցանման պատճառները (օրինակ՝ լեղապարկի քարեր): Մեծ տարիքով մարդկանց մոտ ERCP-ն կարող է բերել սուր պանկրեատիտի:
• Լեղապարկի վիրահատություն. եթե պանկրեատիտի պատճառը լեղապարկի քարերն են, ձեր բժիշկը հավանաբար խորհուրդ կտա հեռացնել լեղապարկը (խոլեցիստէկտոմիա):
• Ենթաստամոքսային գեղձի վիրահատություն. վիրահատության անհրաժեշտություն կարող է առաջանալ, որ դատարկվի ենթաստամոքսային գեղձում կուտակված հեղուկը կամ հեռացվեն ախտահարված կամ վարակված հյուսվածքները:
• Ալկոհոլային կախվածության բուժում. տարիներ ձգվող ալկոհոլի չարաշահումը կարող է առաջացնել պանկրեատիտ: Եթե պանկրեատիտի պատճառը ալկոհոլն է և չեք կարողանում դադարեցնել օգտագործումը, բժիշկը կարող է խորհուրդ տալ, որ անցնեք ալկոհոլային կախվածության բուժման ծրագիր: Ալկոհոլից չհրաժարվելը կարող է վատթարացնել պանկրեատիտի ընթացքը և հանգեցնել ծանր բարդությունների:

Քրոնիկ պանկրեատիտի լրացուցիչ բուժումները

Կախված իրավիճակից, քրոնիկ պանկրեատիտը կարող է պահանջել լրացուցիչ բուժումներ:

• Ցավի կառավարում. քրոնիկ պանկրեատիտը կարող է առաջացնել մշտական որովայնային ցավեր: Նման դեպքերում բժիշկը կարող է խորհուրդ տալ ցավը մեղմացնող դեղամիջոցներ:
• Մարսողությունը բարելավող ֆերմենտներ (էնզիմներ). ենթաստամոքսային գեղձի ֆերմենտների հավելումները կարող են օգնել, որ օրգանիզմը լիարժեք յուրացնի սննդով ստացված սննդանյութերը: Պանկրեատիկ հավելումները սովորաբար ընդունվում են սննդի հետ:
• Սննդակարգի կարգավորում. բժիշկը խորհուրդ կտա, որ սննդակարգում կրճատեք ճարպերի չափաբաժինը: Դիետոլոգը կարող է օգնել, որ անցնեք ճարպերից աղքատ և սննդանյութերով հարուստ սննդակարգի: