Ախտանիշներ - Պանկրեատիտ

Պանկրեատիտը կարող է սկսվել հանկարծակի (սուր պանկրեատիտ) կամ երկար ժամանակի ընթացքում կրկնվել ավելի նվազ սրությամբ (քրոնիկ պանկրեատիտ):

Սուր պանկրեատիտի ախտանիշները

Սուր պանկրեատիտի բնորոշ ախտանիշներից են՝

• որովայնի վերին հատվածի (վերորովայն կամ էպիգաստրիում) հանկարծակի սաստիկ ցավ
• որովայնային ցավ, որը ձախ կողմով տարածվում է դեպի մեջք
• որովայնային ցավ, որը սաստկանում է սնունդ ընդունելուց հետո կամ քիչ մեղմանում իրանն առաջ թեքելիս
• ջերմություն
• արագացած սրտազարկ (տախիկարդիա)
• սրտխառնոց
• փսխում
• որովայնին դիպչելիս՝ ցավոտություն։

Սուր պանկրեատիտի ախտանիշները կարող են նմանվել այլ անհետաձգելի վիճակների, օրինակ՝ սրտամկանի ինֆարկտի նշաններին։

Քրոնիկ պանկրեատիտի ախտանիշները

Քրոնիկ պանկրեատիտի ախտանիշներից են՝

• որովայնի վերին հատվածի տևական բութ ցավեր
• չնախատեսված քաշի կորուստ
• ճարպոտ, զուգարանակոնքից դժվար մաքրվող, անդուր հոտով կղանք (ստեատորեա):

Քրոնիկ պանկրեատիտը կարող է ընթանալ վատթարացման՝ սուր պանկրեատիտի կրկնվող դրվագներով։

Քրոնիկ պանկրեատիտ ունեցող մարդիկ սովորաբար նշում են ալկոհոլի օգտագործման երկարատև պատմություն։

Ծանր դեպքերում ենթաստամոքսային գեղձը սկսում է արտադրել շաքարի (գլյուկոզի) նյութափոխանակությունը կարգավորող հորմոնի՝ ինսուլինի ոչ բավարար քանակներ, որն առաջացնում է շաքարային դիաբետ։ Քրոնիկ պանկրեատիտը նաև համարվում է ենթաստամոքսային գեղձի քաղցկեղի ռիսկի գործոն։

Ե՞րբ դիմել բժշկին

Այցելեք ձեր բժշկին, եթե ունեք մշտական որովայնային ցավեր:

Դիմեք անհետաձգելի բուժօգնության, եթե որովայնի ցավերն այնքան ուժեղ են, որ չեք կարողանում հանգիստ նստել կամ հարմար դիրք ընտրել: