Բարդություններ - Պարվովիրուս

Որոշ իրավիճակներում պարվովիրուսային վարակը կարող է հանգեցնել լուրջ բարդությունների:

Պարվովիրուսը և սակավարյունությունը

Սակավարյունություն (անեմիա) ունեցող մարդկանց մոտ պարվովիրուսային վարակը կարող է հանգեցնել լուրջ բարդությունների: Անեմիան մի վիճակ է, երբ այն բջիջները, որոնք թթվածին են տեղափոխում ձեր մարմնի բոլոր շրջանները (արյան կարմիր բջիջներ կամ էրիթրոցիտներ), սպառվում են ավելի արագ, քան ձեր ոսկրածուծը կարող է արտադրել և փոխարինել դրանք: Անեմիա ունեցող մարդկանց մոտ պարվովիրուսային վարակը կարող է դադարեցնել արյան կարմիր բջիջների արտադրությունը և առաջացնել անեմիայի սրացում (կրիզ): Առանձնահատուկ ռիսկի են ենթարկվում հատկապես մանգաղաբջջային անեմիա ունեցող մարդիկ:

Պարվովիրուսը նաև կարող է անեմիա և հարակից բարդություններ առաջացնել հետևյալ խմբերում՝

• հղիության ընթացքում պարվովիրուսով վարակված կանանց չծնված երեխաներ (պտուղ)
• թուլացած իմունային համակարգով մարդիկ:

Պարվովիրուսային վարակը հղիության ընթացքում

Հղիության ընթացքում պարվովիրուսային վարակը երբեմն ախտահարում է պտղի կարմիր արյան բջիջները (էրիթրոցիտներ): Սա հազվադեպ բարդություն է, սակայն կարող է առաջացնել ծանր սակավարյունություն (անեմիա), իսկ վերջինս՝ հանգեցնել վիժման կամ մեռելածնության: Պտղի մոտ խնդիրների առաջացման ռիսկն, ըստ երևույթին, ամենամեծն է հղիության առաջին կեսին:

Պարվովիրուսը թուլացած իմունային համակարգով մարդկանց մոտ

Պարվովիրուսային վարակը նաև կարող է առաջացնել ծանր սակավարյունություն (անեմիա) այն մարդկանց մոտ, ովքեր ունեն իմունային համակարգի խանգարումներ, որը կարող է զարգանալ հետևյալ դեպքերում՝

• ՄԻԱՎ վարակ
• քաղցկեղի դեմ բուժումներ
• օրգանների փոխպատվաստումից հետո օգտագործվող իմունային համակարգն ընկճող դեղամիջոցներ: