Ախտանիշներ - Պարվովիրուս

Պարվովիրուսով վարակված մարդկանց մեծամասնությունը գանգատներ կամ ախտանիշներ չունի:

Երբ ախտանշանները հայտնվում են, դրանք զգալիորեն տարբերվում են՝ կախված նրանից, թե քանի տարեկանում եք վարակվել այս վիրուսով:

Պարվովիրուսի ախտանիշները երեխաների մոտ

Երեխաների մոտ պարվովիրուսային վարակի վաղ գանգատներն ու ախտանիշները կարող են ներառել՝

• ջերմություն
• ստամոքսի խանգարում
• գլխացավ
• քթահոսություն (հարուխ):

Բնորոշ դիմային ցան

Վաղ ախտանիշների ի հայտ գալուց մի քանի օր հետո ձեր երեխայի դեմքին, սովորաբար՝ երկու այտերի վրա կարող է հայտնվել վառ կարմիր ցան, որը նաև կոչվում է ապտակի ախտանիշ (ապտակված այտեր): Ի վերջո, այն կարող է տարածվել ձեռքերի, իրանի, ազդրերի և հետույքի վրա, որտեղ ցանն ունի վարդագույն, ժանյակավոր, մի փոքր բարձրացած տեսք: Ցանը, հատկապես ոտնաթաթերի ներբանների վրա, կարող է հարուցել քոր։

Ցանը սովորաբար հայտնվում է հիվանդության ավարտին մոտ: Հնարավոր է պարվովիրուսային ցանը շփոթել այլ վիրուսային ցանի կամ դեղամիջոցի հետ կապված ցանի հետ: Ցանը կարող է առաջանալ և շարունակվել մինչև երեք շաբաթ և ավելի տեսանելի դառնալ, երբ ձեր երեխան ենթարկվում է տաքության ազդեցությանը կամ ժամանակ է անցկացնում արևի տակ:

Պարվովիրուսի ախտանիշները չափահասների մոտ

Չափահասների մոտ սովորաբար ապտակի ախտանիշ չի առաջանում: Դրա փոխարեն, չափահասների շրջանում պարվովիրուսային վարակի առավել դիտարժան ախտանիշը հոդացավն է, որը տևում է օրերից մինչև շաբաթներ: Առավել հաճախ ախտահարվում են ձեռքերի, դաստակների, ծնկների և կոճերի հոդերը:

Ե՞րբ դիմել բժշկին

Ընդհանուր առմամբ, պարվովիրուսային վարակի համար բժշկին այցելելու կարիք չկա: Սակայն, եթե դուք կամ ձեր երեխան ունեք որևէ այլ հիվանդություն կամ առողջական խնդիր, որը կարող է մեծացնել բարդությունների ռիսկը, պայմանավորվեք ձեր բժշկի հետ արտահերթ այցի համար: Նմանատիպ խնդիրներից են՝

• մանգաղաբջջային սակավարյունություն (անեմիա)
• թուլացած իմունային համակարգ
• հղիություն: